EnjOy mY liFe TogEtheR witH my fAmiLy

享受

2010-07-25T16:19:00.003+08:00

夏天，雖然陽光猛烈，但放假總是覺得要往外走走，這樣，一起放假才來得像樣，彼此更能享受『在一起』的感覺。

要在炎夏活動中去除那『辛苦』的感覺，玩就要玩得涼爽一點，那就離不開『水』了。讓小孩在水中玩個痛快玩個夠，最好爸媽還是少一點干預，弄得整個人也濕透，大不了去換件衫吧。再者，在戶外隨便脫去鞋子，放任地跑，感覺也很好很特別呢。

另一個增添涼快感覺的元素，便要找『風』了，騎著單車，一家人方向相同，目標一致，向前踩啊踩，孩子有涼風之餘也有速度，也有快感，不錯的安排呢。

往戶外走，親近大自然，當然要有綠色，要有綠草。大孩子對大草皮表現興奮是意料中事，小孩子對大草皮的陌生及那不自在的表現，也是預期的，放胆嘗試吧，不論怎樣，爸媽哥哥也和你在一起。

看著你倆一天一天的長大，雖然有無比的興奮，但看見你倆對我的倚賴漸少時，不免會有點失落有點不捨。

享受與你們擁在一起的時刻，享受你睡覺前後都要我在旁陪伴的要求，享受你情願要我這奶瓶也不要配方奶粉和那塑膠奶瓶，享受放工開門被你倆看見而尖叫的聲音，享受你與我分享學校點滴的片刻，享受你每個古靈精怪的表情，享受現在四口子同床的時光，享受放假四人在一起四處去的感覺。

2010年7月25日，星期天@廸欣湖

獨處

2010-07-17T18:14:00.002+08:00

三男子

以相同的睡姿

享受週末輕鬆自在的下午

一女子

趁勢外出吃喝玩樂一番

享受獨處的寧靜

~呼~

帶對馬騮四圍走-D7-機場

2010-05-21T17:51:00.000+08:00

帶對馬騮四圍走-D7-機場，

當行有冷氣的商場，

大少一貫對行商場活動缺乏興趣，

丫環唯有繼續發掘小玩意予主子娛樂，

大少遇上這個要手眼協調的玩具後，

愛不惜手~~

並言重地告知丫環：唔使怕架，呢D水係飲得架！

帶對馬騮四圍走~D6~出國喇~深圳灣海岸城

2010-05-20T01:28:00.000+08:00

帶對馬騮四圍走~D6~出國喇~深圳灣海岸城。

哥哥話要同架跑車影相，哥哥話架車有尾翼，所以係跑車黎架。

弟弟就話要哥哥一齊同叔叔最鐘意嘅甲星影相喎，係呀，799呀！

弟弟第一次出國呀，YEAH！！

食飯喇，中森『明』菜，好舊嘅日本明星喎~~

帶對馬騮四圍走~D5~走到清水灣

2010-05-19T01:04:00.000+08:00

帶對馬騮四圍走~D5~走到清水灣
2010，下水禮。

熱身過後，各自玩船仔。

大少帶左九萬幾樣野黎玩~玩~大玩~特玩！

玩完一大輪之後，開始要玩小動物~

『爸爸，捉蟹仔啦，要幾隻喎！』
唔知點解又會俾老公捉到喎~

又玩完一大輪之後，

『爸爸，去游水啦。』

細少一於好少理，吹住海風瞓個靚覺先~

『噢，哥哥仲未玩完呀？』

帶對馬騮四圍走~D4~山頂

2010-05-18T00:48:00.000+08:00

帶對馬騮四圍走~D4~山頂，

『媽咪，呢個伯伯係咁個黎架，點解我同舅父要同佢影相嘅？』

『冇咩野點解架，佢企o係度咯，咁咪同佢影吓相囉，你睇你同佢影相，佢幾開心！』

纜車站呀~
纜車黎喇~

『哥哥，我第一次搭呢隻車呀。』

『弟弟，我都係呀，你睇吓D屋，斜晒呀~~』

『哥哥，今次輪到我同呢個唔識嘅叔叔影相喇~』

『哥哥，呢個我識呀，同我一齊影相吖。』

行山喇，山頂步行徑，好好行呀。

有地衣摸，有大石爬，仲有馬騮架玩添。

帶對馬騮四圍走~D3~長洲

2010-05-17T00:32:00.000+08:00

帶對馬騮四圍走~D3~長洲

一場黎到，弟弟，快D同包山影相留念啦，星期五呢度插針都插唔入呀！

弟弟，我真係好鬼鐘意你架。
哥哥，唔好咁啦，好鬼熱呀。

撞到飄色姐姐呀~

行到熱晒，要食香蕉船先掂呀~

仲到食埋冰鎮生果串添~

東灣~我黎啦。

帶隻馬騮四圍走~D2~東平洲

2010-05-16T00:11:00.000+08:00

開船喇，出發喇，去東平洲喇~

Connie姐姐有兩隻鴨仔架~

船上遊戲~跨欄！

到喇，到東平洲喇，小朋友自懂事後的『指定動作』~

嘩，媽咪你睇吓~爛屋一間！

嘩~有好多石仔呀。嘩~有沙呀。

同Connie姐姐睇吓鴨仔靚唔靚先~

同Connie姐姐睇吓舊石頭下面有咩野先~

東平洲嘅石頭~真係好平架！

D石頭仲好似樓梯級咁架~

呢個係我地到過嘅第3個海岸公園~

玩完喇，坐船返去喇，返屋企搵弟弟呀。

帶對馬騮四圍走~D1~沙田篇

2010-05-15T23:55:00.001+08:00

假期生活~D1，

帶對馬騮四圍走~沙田篇，

大少步入商場即問：『唔係去公園咩？我想去公園喎。』

『今日我地黎行商場呀』

大少咀扁扁地：『我唔想行商場呀，你一陣同我去公園啦。』

好彩行過一田時見到開心大玩具，大少先開心番咋！

到嬰兒餐廳，當然要帶細少入去留倩影啦，哈哈，仍然好有馬里奧嘅感覺啊！

假期生活好開始

2010-05-14T23:46:00.001+08:00

假期生活好開始，就是看見大少細少開心笑笑笑~~

遊樂場~超市篇

2010-05-10T23:23:00.000+08:00

細少：『媽咪，帶我黎呢度做咩野呀？有好野玩？』
媽咪：『細少，媽咪見你呢排咁鐘意咩鬼都攞，我啱啱執好嘅野你又幫我拎晒出黎，咪帶你黎呢度，等你盡情咁~~拎囉！』

細少：『呢樣未見過喎，食得架？』

細少：『呢兩盒野好似差唔多樣喎，係咪又係食得架？』

細少：『呢樣又係咩東東？』

細少：『呢個我知，好野黎架，我見過哥哥同爸爸食呀，食得架食得架。『

細少：『呢個都係食得架，我見過爸爸臨瞓前食呀~~

媽咪：『係呀，樣樣野都係食得，不過唔係你食喎，1歲前你只可以食由婆婆主理嘅食物咋！『

西貢艇釣

2010-05-04T00:28:00.006+08:00

哥哥：『出發喇出發喇，孭背囊呀落水喇。』

弟弟：『點解我冇涼鞋著嘅，今日好似唔係去行山喎~』
哥哥：『我都冇咁細對嘅涼鞋，你就緊係冇得著啦，求其著住呢對先啦，到你識行就會有涼鞋著架喇。』

哥哥：『落船喇~~做咩野落船呀，我地去釣魚咩？』
爸爸：『係呀，去釣魚呀。』

弟弟：『呢度係咩野地方呀，有咩野玩架？』
爸爸：『冇咩野啱你玩架喎，吹吓海風，曬吓太陽，搖吓搖吓，咁好唔好吖？』

弟弟：『有野俾我揸手企吓咪得囉。』

媽咪：『你唔好襯我睇你唔到嘅時候放隻手入口喎~』

哥哥：『爸爸，釣得魚未呀？』

爸爸：『咁你就要學吓點樣綁魚勾喇。』

~~~~~~~~~~~~~~

上半場完結，下半場上岸，到橋咀島小遊。

哥哥：『嘩，落水喇落水喇。』

水退後可以沿路行到地質公園-橋咀，睇菠蘿石。

仲有哥哥最鐘意嘅戶外活動，擲石頭。

公公婆婆又唔放過弟弟喇，天然腳底按摩~

狗：『你地三個o係度做咩野呀？』

人：『你一個又o係度做咩野呀？』

瘋媽又攪到兩位公子變舊炭喇~

難得哥哥返到屋企之後，仲咁有心機咁同弟弟玩，我地真係飲得杯落喇！

悠閒的星期六早上

2010-05-02T00:03:00.002+08:00

悠閒的星期六早上，4人共進早餐，看見人多才記起今日是公眾假期~

大少出奇地答允到叔叔處理髮，還真的做到『坐定定唔使喊』咁順利完成！

真係成個咸占餅咁呀~~塊面！

中午到100分飯堂，細少進入新階段，可以坐BB椅喇！

悠閒的星期六，我們4人有很多新發現新體驗，享受和你們在一起的每一個時刻。

細少週六的早上

2010-05-01T23:00:00.000+08:00

細少週六的早上，

『你估我o係度等咩野？之唔係等我個司機黎接我去玩囉。』

『等左好鬼耐喇，都唔知佢去左邊，搵D野玩吓好喎，有咩野好玩呀？有喇，有10條野玩呀！』

『除左可以互玩，仲可以食添架。』

『今日傻媽幫我著左對新鞋喎，等我睇吓~~唉，原來又係哥哥D舊野，不過算啦，都係環保D好，唔係我下世就要做樹架喇。』

『呀，司機黎喇。但係點解架車細左咁多嘅？我個架明明係8人轎黎架喎，家吓變左架4人甲蟲！！！算啦，得閒變吓，攪D新意都幾好嘅，襯番我架車嘛。』

東涌-->沙螺灣

2010-04-24T22:57:00.003+08:00

大少細少今日又跟著傻爸傻媽聯同老玩童公公婆婆，一同向郊野進發喇。

是日起點，係東涌--逸東邨。

終點，係沙螺灣--細碼頭。

經過是日實戰，傻爸傻媽嘅結論係：

如果要完成『東涌-->大澳』的旅程，睇怕要等多三五七年喇~

又或者，下次o係東涌call艇直鏟沙螺灣先再起步，

或者都有機會行得晒！

大少今日超額完成，靠自己完成整個旅程，真係大個仔喇。

野外求生，當然要學習當遇上危險時嘅應變方法，學習過後記得將用具放好呀。

每次外出，老玩童婆婆都會擔任『導賞員』，教導大少認識各種各樣大自然知識~

仲會放任地俾大少去經驗、體驗、嘗試~各種o係屋企唔準做嘅活動。

這個中途站，風景同環境都相當好架，仲好大風添！

食飽之後，又再出發喇，今日太陽相當強勁，行到大少口腫面腫咁~

到達沙螺灣細碼頭前，去了探馮太，同欣賞佢種嘅青提~

細少依舊冇著襪出街，今次就被老玩童公公帶佢去踩沙~

事實上，傻爸傻媽帶著又老又嫩郊遊，點都要體貼一吓佢地嘅體力，加上今日實在都幾晒，要佢地走回頭路返東涌，我地怕要call飛行服務隊先掂呀，所以最後都係call艇返去好D，今次都係大少細少嘅第一次喎。

細少終於都被傻媽攪『黑』喇，yeah，可以慳番照燈$$！

老玩童公公婆婆話，呢條路好行，下次要帶多D好食嘅野~例如燒肉、燒鵝之類，同埋要雪多幾罐冰震汽水~

鳴謝『小傑傑』嘅路線提供，下次大少細少嘅戶外露營篇，我預左你喇，哈哈！

微雨的星期天

2010-04-19T21:59:00.005+08:00

哥哥話要同公公去探牛，一行六人開開心心，在戶外呼吸新鮮及帶有牛屎味的空氣，渡過週日早上~
婆婆走到戶外，比哥哥還要高興，自由行比跟團好，就是可以在山頭摘草摘個夠~

上次嬤嬤和表姨也想吃齋，可是人太多改到石崗去，今次總算有位可以吃個飽。弟弟大頭照好像好大個仔咁~~

弟弟因為冇著襪，被公公安排踩草，哥哥見狀也要玩埋一份，原來二人的身高係相差一半~

哥哥話這是『角馬』~

晚上到了爺爺嬤嬤家，攬著爺爺多甜蜜啊~

整天玩得太累了，弟弟很是喜歡這樣睡~~

哥哥則繼續享受『假期生活』！

落田

2010-04-17T22:54:00.003+08:00

爸爸帶著哥哥到親子綠園一嘗翻泥播種，哥哥異常落力，一大清早就問：『我地今日係咪去種菜呀？』

翻好泥土下了肥播了種後，爸爸便教哥哥攞水預備洒水。

之後便要等待種子發芽喇~~

~~~~~~~~~~~~~~~~~~~~

好耐冇幫弟弟影過沖涼照，呵，同哥哥一樣，『肥大肉厚』。

下雨的星期天

2010-04-16T00:06:00.002+08:00

弟弟很喜歡企，欲叫他坐在床仔，他郤把雙腳登直，激死！

上週日，下雨天，未有與他們行山，郤到了像個兒童樂園的宜家~
弟弟拿著紅花不肯放手~

哥哥與其他小朋友在餐廳的遊戲閣追逐了成個鐘，攪到成頭汗~

回家後，又時一個溫馨的休息時間。

爸爸中計~

2010-04-08T22:58:00.003+08:00

某夜，

父子在床上糾纏~~

『瞓好D啦，瞓到歪晒，點攬尿片呀。』

『我唔攬尿片呀~』

『唔攬唔得呀，瞓到懵晒又唔識醒咁又懶尿呀。』

『我唔會懶尿架，我會識得叫醒你同我去廁所架喇~』
(實情係從未試過)

『唔得呀，快D瞓好D~』

勉強包好條片，3秒後~~

撕ssssss，撕ssssss，然後二人對望著~~

『你想點？你係咪想我打pat pat？』

『你打啦~~~』

嘿，嘿，嘿~~
(中計~)

『你係咪真係要我打你pat pat？』

『你打啦~~~』

啪~

鴉雀無聲，二人仍然對望住~

『依家同我瞓好，著尿片。』

o係未有再出現反抗的情況下，

5分鐘後瞓左。

中計

2010-04-08T22:38:00.002+08:00

天天將玩具車掟來掟去，

沒有好好珍惜同愛惜玩具，

知道硬生生的罵他一頓也沒用，

為娘唯有出軟功~

『哎呀，你唔愛錫D玩具呀，佢地就會唔鐘意你架喇，佢地仲會走左去，離開呢個屋企，搵過另一個愛錫佢地嘅小朋友，住o係佢屋企架喇。』

期待著的回應係：
『咁好啦，我唔會掟佢地喇。』

可惜，呢句說話並未有出現~~

我得到的回應，係：
『拿，媽咪，如果你掟我，唔錫我，我就會走去第二個屋企架喇，唔返黎架喇。』

嘿，嘿，嘿~~~

『哦，咁你打算去邊個屋企呢？係咪對面姨姨個度呀？咁你依家想唔想去？如果想咁你就開門自己去啦~~』

『唔好！』

復活節假期第五天~自家遊

2010-04-06T21:22:00.003+08:00

復活節假期第五天，

開開心心地出門口，

哭哭啼啼地回家，

過程約為30分鐘~~

相約公公婆婆舅父勇闖東涌<-->大澳，

大少出門不久就話要抱，

為娘當然未有回應兼又氹又迫咁要佢行啦，

結果撩起佢條扭計蟲：

一定要我抱~

唔俾爸爸掂~

明明應承我抱10聲就落地，結果做唔到，仍然都話要我抱~

到肯落地自己行，又話我行得快~

讓他帶路，用佢認為啱嘅速度行啦，結果係唔行，原地企o係度~

唉，我當然儀態盡失咁變左個當街當巷鬧仔嘅壞娘親啦，

最後仍然克制唔到佢，

唯有即時全家返屋企，冇街去，以示懲罰！

好端端的一個復活節last day就咁泡湯了！

~~~~~~~~~~~~~~~~~

沒有街去的假期，

我的另一好節目，

就係同細少影影影~

第一次坐婆婆家的食飯椅食粥呀~

復活節假期第四天~區內遊

2010-04-05T23:49:00.004+08:00

復活節假期第三天，要返工，

哥哥發燒至103度，不肯進食進飲，

問他可有感到那兒不適，

小手指指著喉嚨，

拿電筒一照~

嘩，成個喉嚨爛晒，滿佈白色一點一點的星星，

可幸假期遇上好大夫，

被診斷為『病毒感染』，是手足口的近親~

好大夫表示快則一兩日退燒，慢則要成個星期，

至於完全康復，則要待兩星期左右~

哥哥食過抗生素後，好快已經退燒，

仲老虎都可以打死幾隻咁成日問住：

『去街未呀？』

不過依然絕食！

~~~~~~~~~~~~~~~~

一晚過後，哥哥又問：『今日去邊度好呢？』

爸爸話：『你仲未好番喎，今日要o係屋企休息呀，唔週圍去喇。』

哥哥話：『唔怕，不如去濕地公園吖！』

媽咪問：『去濕地公園有咩野睇呀？』

哥哥答：『去探貝貝吖嘛。』

爸爸話：『今日假期，濕地公園好多人架，等你好番再同你去過啦。』

哥哥話：『咁，不如我地去嘉道理農場吖。』

媽咪問：『去嘉道理農場有咩野睇呀？』

哥哥話：『去探豬豬吖嘛。』

爸爸話：『去嘉道理農場要去成日架，你晏晝要返黎屋企瞓覺喎，第日再去啦。』

哥哥話：『咁去邊度好呀，爸爸你話啦！』

爸爸話：『不如我地食完早餐去行一陣商場，俾你買一樣玩具吖。』

哥哥話：『唔好，我唔想去商場同唔想買玩具呀，我想去嘉道理農場！』

最後，一行四人到雷公田食早餐兼當行左郊外，

仲多左一隻白色羊喎！

之後，行超級當行左街，

哥哥揸住架手推車當自己揸真車一樣，

手推位置有3個圓形圖案，

當他要開車(推車)時就會按第一個掣，

要停車時就會按第二個掣，

要倒後就會按第三個掣+『咇咇』兩聲，

動作同對白當然係抄襲老公揸車時的情景啦~

買完野，返到屋企，

兩個好似食左興奮劑咁，好耐都唔肯瞓，

唯有又再同大少細少玩餐飽，辛苦過返工~~

就這樣看似輕輕鬆鬆但又忙忙碌碌咁，

過了復活節假期第四天~

復活節假期第二天~後記

2010-04-03T23:37:00.000+08:00

同細少影相，係丫環的重要工作~

一齊玩，係丫環希望見到好耐嘅情景~

若果可以一齊玩到『唔使我在場』，

就更好啊~

復活節假期第二天~大拗門

2010-04-03T23:31:00.004+08:00

得了傷風的大少，

除了係食藥後比較疲倦之外，

沒有其他，同平時一樣~

『今日有冇得坐你架車呀？』

爸爸以『吹5-6級東風坐船會拋到嘔肺』為理由，

拒絕東平洲行程，

改為去同樣有『5-6級東風吹到luck頭』嘅大拗門，

放風箏，因為夠大風。

爸爸示範點樣放~

大少感受緊『拉』嘅力度同感覺~

因為真係好大風，風箏基本上一放就飛左上天，大少情願周圍行~

周圍摸~

細少就有人肉屏風檔住強風~

最後大少亦成功學識『放風箏』~

後記~

回程途中，嬤嬤一摸大少頸項，『咁熱嘅』~

一探熱，嘩，102度喎~

玩出禍！

復活節假期第一天~南生圍

2010-04-02T23:26:00.001+08:00

復活節假期第一天，

0700大鬧鐘細鬧鐘同時响起~

以不同方式~叫同嗌，

來表達『我要飲奶』嘅要求。

家丁帶著軀殼到廚房開奶，

丫環變身乳娘，滿足細少嘅要求。

飲飽食醉後，大少細少開始今日嘅工作~

玩樂和遊戲~

並以獨門武功，大聲尖叫+狂嗌~

喚醒還在同周公子和周公主玩緊捉依恩嘅家丁和丫環~

才0730，同返工一樣的起床時間。

正當丫環梳洗完畢，準備諮詢一下大少細少是日行程之際~

『嘿嚏』~~黃鼻涕隨後趕上~~

大少已經話左俾家丁和丫環知：『唔該今日我要搵梁大夫呀！』

唔明白小朋友點解總會有50%的患病係上現o係父母放假嘅日子中~~

搵完大夫後，大少話要遊車河睇風景，

因為家丁要返P，

所以近近地去左南生圍~~執掍，

睇魚，

爬樹，

睇雀，

周圍行，

家丁上班後，丫環開始下半部份嘅工作，

包括：陪食、陪玩、陪瞓、陪痾、陪洗(澡)、陪睇(書)~~

大少細少輪流發功，要求丫環『吋步不離』

直至家丁收工，回家看見大少細少以差不多的睡姿瞓埋一齊~

『辛苦妳喇~~』

爸爸一問

2010-03-26T00:35:00.002+08:00

這天，公公在家中某角找出上圖相片，將之擺放在下圖相片旁，他們的爸爸回家一看，問：

『邊個係哥哥，邊個係弟弟呀？』

沙灘

2010-03-22T21:43:00.003+08:00

『爸爸，我想去沙灘玩沙呀。』

『好啦，咁我地去啦。』

『爸爸，隻腳板好熱呀~』

『係呀，咁我地快D衝落去D水度啦，衝呀~』
『爸爸，D水好凍呀~』

~~~~~~~

帶著嬤嬤送的3個鏟，玩得好開心~

~~~~~~~~~~~~~~~~

因為在沙灘玩得太耐，去到方舟已經3:30PM，唯有下次再入去玩吧。

到對面睇吓個大螺啦~

天天指手畫腳咁，原來係跟住D紋o係度畫圈~

~~~~~~~~~~~~~~~

對於『返學』這個題目，婆婆千叮萬囑咁提過我好多好多好多次~

唔好成日因為自己放假，就幫個仔請假唔去返學，走左去玩~

婆婆嘅理由係：小朋友要有生活規律，同埋佢會搵藉口逃避唔去返學~

我，明白婆婆的用意~

出發點正確~

我，知道這樣做，我要承擔後果~

理性上，我係錯~

感性上，對於『不是保證』星期六日我倆一定一齊放假的父母來說，我唯有這樣才可以享受家庭樂，再者，我知道，到他們上小學後，我不可能這樣放肆吧~

所以，隨我吧~

鹿頸<-->谷埔

2010-03-21T23:26:00.008+08:00

又係郊遊的好日子，陽光充沛加上陣陣清風，呼~到鹿頸。

弟弟，未出發，先义電，坐在背架上搖呀搖了一小段路已變成咁樣，唯有變陣~

背架，載背囊~

弟弟，背了在孭帶上~

哥哥初段一馬當先，以摩打般的速度帶頭~~上斜~

期間還露兩手，執起大石頭展示一番~

弟弟嘅『野外求生課~食篇』進入第二階段，食粥仔，順利完成~

哥哥就繼續野外大魚大肉，揸住隻鴨脾係咁扯~

回程哥哥露疲憊，老公顯出其『承擔力』，獻出膊頭同手臂，無論平路定上斜，佢都盡其責地奮力完成，勁呀~

難怪弟弟露出滿意是次郊遊的表情啦~

我就同哥哥弟弟一樣，開心到爆啊~

~~~~~~~~~~~~~~~~~~~~~~~~~~~

都係個句，戶外，係另一個大課室，一草一木都係教材，同行的每個都係老師，過程中要互相尊重互相包容互相體諒互相欣賞互相學習。。。

少不了的學習工具--樹枝，可以篤來篤去指來指去fing來fing去，例如婆婆教哥哥睇青口~

老公教哥哥睇小奚中的小魚~

老公執起受傷的草蜢，斷了一隻腳才會被捉得住~

老公教哥哥要翻開石頭才找到蟹仔~

婆婆帶哥哥玩水，教哥哥要企o係啡色頭石上，不要企上綠色石頭上~

公公教哥哥執石頭擲出水度就會dum一聲~

有咁多好玩嘅野，就係吸引哥哥每星期都會話：『我地今日不如去行山吖！』嘅原因~

自然教育徑

2010-03-20T23:17:00.006+08:00

哥哥第一次坐背架行山(上圖)，係11個月大的時候。弟弟今天亦是第一次坐背架行山(下圖)，7個半月大，當然比當時的哥哥輕磅呢！兄弟二人，坐著同一背架，與我們一起行著同一自然教育徑，感覺多好。

~~~~~~~~~~~~~~~

大棠自然教育徑，勝在夠近便而且路程短，就算帶著小朋友老人家一齊行，兩小時內都必定行完，假日帶精力充沛的馬騮來盡情跑盡情跳發洩那多餘精力，的確係好正，不過沿途記住要回應無限個『點解呀』。。。

點解D蛇唔出黎嘅？

會唔會有野豬架？點解嘅？

點解呢度無犀牛嘅？

點解D雀仔要返屋企嘅？

點解我地要走嘅？

點解太陽伯伯要返屋企嘅？

佢屋企係咪o係個山後面呀？點解嘅？

。。。

~~~~~~~~~~~~~~~~

帶小朋友到郊外的好處，係講少好多次『唔好、唔准』，那些平日在家的『唔好爬上窗台度』，『唔准o係張梳化度跳落黎』，『唔好執地吓D野黎玩呀』，『唔好跑咁快呀』等等，黎到郊外都會全部轉為『好吖，你試吓啦』。

『試吓o係草地跑快D係點嘅。』

『試吓爬上樹上面睇吓係點嘅。』

『試吓跳落泥地睇吓係點嘅。』

『試吓執支樹枝黎玩吖。』

這，才配得上『自然教育徑』。

由西走到北

2010-03-14T17:00:00.005+08:00

這天，又是小朋友認識大自然的日子，與嬤嬤和表姨到北面探牛牛，

天天見到牛，『媽咪，原來D牛好大隻架！』

的確，牛好大隻。。。

天天餵牠食草，牛扯了他一下，『媽咪，原來牛好大力架。』

的確，牛好大力。。。

農場叔叔話乳牛好乖好純，可以摸吓，

天天掃牠一下，『媽咪，原來牛好軟好滑架。』

的確，牛好軟好滑。。。

農場叔叔話『你地自由行，可以自己到山上摘新鮮草俾牛仔食』

天天話：『D牛食好多草架，爸爸你快D摘多D多D多D草俾佢地食啦。』

的確，牛食好多草，爸爸到山上摘了四次草。。。

臨走前，你叮囑牛牛『要食多D草先會快高長大架。』

放心，今日有好多本地團到來參觀，你睇，又有一團喇，成四4架大旅遊巴士咁多人呀，佢地會幫手餵牛牛食好多好多草架喇。

~~~~~~~~~~~~~~~~~~~

爸爸駕車到雲泉，噢，今日是特別日子嗎，好多人喎，改地方到石崗啦，很是開心吃了豐富午餐。

回程返到嬤嬤家，你倆都倦透了。。。

由西走到東

2010-03-12T23:54:00.001+08:00

這天，由西走到東，先到洪水橋飲奶茶王做早餐，然後第一站~北潭涌，再到萬宜水庫，尾站布袋澳，由朝早9點玩到晚上6點，爽爽爽。

~~~~~~~~~~~~~~~~~~

弟弟，坐住私家車，又出街，又到戶外走走走。繼上次大美篤學習『野外求生~食』之後，今次要學習『野外求生~出』的技能，要做到在任何環境中都能『食得、玩得、瞓得、去得』這四大絕技，不過今次冇得痾，要留待下次再練習喇！

~~~~~~~~~~~~~~~~~

哥哥繼續玩到癲，實行盡情玩樂，都唔理你喇。咩野都玩得一餐嘅有~企石頭，坐石頭，執石頭，擲石頭，勁跑勁跑勁跑，吹波波，最重要嘅環節係~食，食，同食。有花生，豬肉乾，車厘子，同啜雞腳。

~~~~~~~~~~~~~~~~~~~~

我地倆公婆，就緊係享受做工人跟班陪玩陪食陪瞓啦，咪見老公上斜時手抱40磅再推20磅好似好慘咁，佢都不知幾咁高興，仲全日enjoy做司機添！

週末遊

2010-03-07T22:25:00.003+08:00

弟弟細細個就同我地呢度去個度去四圍去，連食糊仔都在郊外。

哥哥一提起吹波波就會話去柯士甸，因為記得上次在西九海濱公園吹過，又新增一個叫大美篤嘅地方喇。

『爸爸，你隻風箏冇跌落海啊。』

這日無風，風箏上不到天空，但各人都盡慶~

爸爸實現夢想，架車載著我們一家四口郊遊去。

媽咪食了美味泰國菜，正。

哥哥放假就話要戶外去，跑來跑去。

弟弟，同爸爸媽咪哥哥一齊就最開心。

~~~~~~~~~~~~~~~~~~~~~

同場加影，2~3月有成26度的弟弟free move照，幾難得可以輕易咁摸吓排腳趾仔，爽呀。

但係呢個禮拜又話冬喇，又係著到成個機械人咁，翻身都翻唔到呀，陰公。

生命教育

2010-02-27T00:07:00.002+08:00

我：『星期六日我地要去同太太講bye bye喇。』

天：『點解要講bye bye呀，佢要去邊度？』

我：『太太要搬去好遠嘅地方喇，所以咪要講bye bye囉。』

天：『佢要搬去邊呀？』

我：『好遠架~~』(太太拜神的，其實會去邊呢？？)

天：『叫佢搭車返黎咪得囉。』

我：『個度冇車搭返黎架。』

天：『點解呢？』

我~~哎呀，終於問『點解』喇~~

我：『唔，其實太太過左身喇~~(俾個唔明白嘅樣我睇)~~』
我：『太太死左喇。』

天：『係咪好似黃色樹葉跌左落地下咁呀~~佢地都死左喇。』

我~~大喜~~終於係明白喇~~
我：『係喇，好似黃色樹葉咁，唔會再返到上樹木上面喇。』

天：『咁媽咪你係咪仲係綠色呀？』

我~~哈~~咁你都諗到喎~~
我：『係呀，媽咪依家係綠色呀。』

天：『咁幾時會變黃色呀？』

我：『吓，唔知故喎~~~』
我~~真係唔識答喇~~

天：『好啦，媽咪你講完故仔喇，輪到我講喇喎，從前有隻牛，佢個名叫丹丹喎，有一日佢好大力咁鎖住個門，唔俾獅子呀老虎呀豹呀入黎食左佢~~~』

吓~~原來你咁我係度同你講緊故仔架~~我同你做緊生命教育喎~~

弟弟

2010-02-15T17:59:00.004+08:00

有冇人同我玩呀？

搵米奇同我玩？

好呀好呀，我最鐘意出街喇。

恭喜發財，新年進步。

兄弟

2010-02-15T17:46:00.004+08:00

一大一細坐在你倆的梳化上，

要永遠相親相愛。

兄弟，一個眼神便知道對方都需要對方，這是手足。

兄弟，肩並肩，一齊玩，

一齊笑，一齊哈哈笑，

最愛這張相片。

情人節快樂。

2010-02-14T17:32:00.001+08:00

2010，
和你第8個情人節快樂。
和你第4個情人節快樂。
和你第1個情人節快樂。

2010，
有3個男子待我如情人，這天與我一起。

2020，
你3人仍待我如情人，
希望13的你那天仍與我一起。
而X5的你以及10的你，當然要與我一起。

2030，
你3人依然待我如情人，
不過，我知道，我是知道的，
X5的你，要頂埋其他二人的位置，
那天與我一起。
而23和20的你你。。。

我是知道的。

4。四。Four。IV。

2010-02-13T17:29:00.001+08:00

4。四。Four。IV。。。

忌廉。忌廉

2010-02-12T22:19:00.000+08:00

『哥哥，你揸住罐咩野呀，綠色有條管喎！』

『哥哥，俾我揸吓得唔得呀，你唔使兩隻手一齊揸住揸到咁實喎。』

汽水，無可抗拒。

願妳平安

2010-02-11T23:27:00.004+08:00

兒時，與妳同居，

只記憶數個片段...

爸媽深夜外出，我問『佢地去邊』，

妳摸摸小頭兒道，『佢地約左朋友，好快返黎』，

結果第二天早上，床邊擺放了一份聖誕禮物。

每日返學前，妳會餵我那難吃的魚肝油...

妳說每天都會帶我到好世界飲茶，

妳說我愛吃义燒飽...

妳陪我渡過了33年，

妳，和爺爺分隔了31年...

妳躺在病床上，閉上眼睛，

但仍聽到『我來探妳』，

妳迷迷糊糊地說了數句說話，

然後說『冇野講喇』，

妳為我帶來的片段，我會好好收藏，

願妳平安，願妳滿足。

快樂，你都可以。

2010-02-05T10:05:00.001+08:00

送哥哥返學，

樓梯上遇到校長，

校長表示：

『平時我入班房，天天都唔會好似D女同學咁，即刻行埋黎攬住我架。』

『係呀，佢比較慢熱D。』

『但係佢琴日好主動咁走埋黎同我講，佢話佢好開心呀，因為爸爸媽咪接佢放學喎。』

『係呀，要等放假或者返下晝先可以送佢返學接佢放學呀。』

小朋友，快樂可以好簡單。

大朋友，快樂與否，是由自己決定，是可以選擇啊。

公園

2010-02-02T23:40:00.002+08:00

第二次到來的公園，聽得你講得最多的，是『嘩』！

隔天早上，你突然哭著說：『我要去海洋公園呀~~我依家要去呀~~』

週日早上，我問你：『今日放假呀，你想去邊度呀？』

『我想去海洋公園呀~』

『吓，啱啱星期三先去完咋喎，海洋公園好攰喇，要休息呀，去第二度啦。』

(天天的同理心好強，通常咁樣講都係有效嘅。』

『咁，我地去濕地公園啦！』

『星期日喎，好多人架，不如踩單車去市鎮公園啦~~(假民主)』

幸福。兄弟

2010-02-02T23:28:00.004+08:00

望著你倆，感到多麼的幸福。

弟弟，弟弟

2010-02-02T23:00:00.004+08:00

假期，和你在一起，拿著傻瓜機不停對著你，影影影，拍拍拍，不停嚷著『弟弟，呢度，笑吓啦！媽咪o係呢度呀，喂~~~』

6個月，學習翻身，預備食糊仔，圍著枕頭可以坐得很像樣，這6個月，和上一次的『6個月』相比，過得太快了，快得還未記清楚這刻的你，你已變了另一個模樣~~

6個月，媽媽以自己的力量養活你這6個月，媽媽好珍惜和你一起的親密6個月，將你由乳鴒般皮包骨變到現在的19磅肉騰騰實啲啲，我真係好鬼錫你啊！

每週生活

2010-01-12T22:59:00.002+08:00

一早醒來，

刷牙梳洗開奶餵奶摺被洗奶樽換衫返工返學通通在45分鐘內完成，

8點出門9點開工做做做足9個鐘，

6點3務必離開趕搭6點5那班車返歸，

準時7點3返到娘家餵飯餵奶食飯閒話家常教仔通通在1個鐘內完成，

8點半一定要離開娘家，

二人推著二人回家，

9點入屋講數『換好睡衣先準...』

開電視睇碟玩玩具講故事通通在9點半前完成，

之後，飲奶餵奶刷牙洗面沖涼除con著尿片...

唔該10點前上床瞓覺...

每週6日如是如是如是趕趕趕...

每週1日家庭日，謝絕探訪，

24小時和你和你和你都在一起戶外去。

孩子讓你~~

2010-01-09T00:09:00.002+08:00

今天認識了一位朋友，

他以往過著非人生活，

因為孩子，他選擇改變，

因為孩子，他選擇放棄，

因為孩子，他選擇面對。

孩子，確實能讓父母完全地改變、放棄、面對，

過程可能艱辛和困苦，

但得著會是更多更大，

這些得著，不能即時看見抓緊品嚐，

不過在往後的日子就足以讓父母回味一生，

有孩子的朋友，加油啊！

你們都贏了他

2010-01-08T23:40:00.004+08:00

3年前，

我每天數算你的手仔腳仔大了多少，

我每日為你拍下過百相片，

我每晚抱住你傾計唱歌搖呀搖，

我每週放假都抱住你四處去，

我每次逛街都替你添衣裳置玩具，

我無時無刻將你放在第一位~~~

今天，

為何你大得這麼快，

產假過後，我究竟看過你的手仔腳仔有多少遍？

我每天為你拍了多少張相片？

我每晚和你傾計傾了多少句？

我每週放假有否帶著你四處逛？

我每次逛街時有否替你添這置那？

你食飽便安靜地在床上自娛一番跟著入睡，

這是多好湊的小孩啊，

你的位置在那？

你的位置仍然是第一位，

只是我表達方式略作修訂，

你的位置仍然是第一位，

只是我的時間縮少了分薄了，

你的位置仍然是第一位，

只是3年前沒有人與他爭奪而今天他郤要捍衛~~

你倆~~仍然是我的第一位，

因為你們已爭贏你老爸了。

粉瘤

2010-01-04T23:36:00.002+08:00

弟弟腋下長了『粒野』，放工後急忙找大夫，大夫謂他生了粉瘤...心情頓時一沉！

患病者通常第一句會問：『點解會咁？』

大夫道：『冇得解。』

患病者通常第二句再問：『咁依家點？』

大夫再道：『冇野攪，全身麻醉切左佢囉！』

患病者最後通常會問：『點樣預防，唔好等佢再復發？』

大夫原諒患病者娘親的緊張道：『冇得預防，寫張紙俾你去政府排期啦。』

雖然大夫好清楚指示了跟住的步驟，但病者娘親仍然圍繞在第一個問題：『點解會咁架？係咪我湊得佢唔好？係咪我嘅母乳出左問題？』

接著，向了壞方向想：『全身麻醉會唔會有事架？唔攪佢會唔會自己好番呢？會唔會無端端變左做惡性架？咁咪即係生cancer！』

『點解會咁架！弟弟你唔好有事呀！』

『黃色野』由弟弟接棒

2010-01-04T00:40:00.005+08:00

『呢個係我亞哥~天天，佢坐呢張野嘅時候係7個月大。』

『咁亞媽你做咩野咁早要我坐呢張黃色野呀？我得果5個月大咋喎？仲要早人兩星期出世，計正我其實係得4個幾月咋......』

『唉，算啦算啦，見你影得咁開心，就俾你影飽佢啦，不過話時話，我又幾醒喎，坐到同亞哥一樣咁醒目咁靚仔，我係咪好似7個月大呢！！！』

『你唔好笑呀，我呢個髮型，連高級髮型師都整唔到架，唔使用gel都可以『楝』到咁高喎，勁晒呀！點解我會咁，你問我老豆啦，呢D係遺傳黎架！』

珍貴的禮物

2010-01-02T00:00:00.001+08:00

2010年1月1日，

你5個月零2日，

第一眼見到你尤似乳鴿，皮包骨，

現在已是肉騰騰的可人兒，

我有講不完的喜悅，

知道你努力地『追回』早來那兩週，

我為你而驕傲，

你我互相送給對方的第一份禮物~母乳，

我倆十分珍惜，

每次看見你那享受的樣子，

半夜醒來侍候主子的怨氣，

亦給你一掃而空。

點解

2010-01-01T23:20:00.003+08:00

『媽咪，你睇吓個度，有水呀，噴到好高呀。點解嘅？』
『哦，個度爆水管嘛，咁D水咪噴晒出黎囉。』

『嘩，媽咪你睇，個架係咩野車呀，好嗅呀。』
『哦，個架車幫手鏟起D爉青，咁D工人叔叔先可以維修到條水管囉。』

『媽咪你睇，架泥頭車載住D...唔知咩野呀。』

『係爉青呀。』

『媽咪，點解條水管會爆嘅？』

『呀...因為佢老囉！』

科學館學科學

2009-12-29T22:15:00.003+08:00

帶天天到科學館，欣賞專題展覽外，對常設展覽項目亦表現興奮，玩得相當投入，亦不時說：『呢度好好玩呀。』

下午3時，有得睇館內最大型的展品『D波波跌落黎喇』(正確名稱係能量穿梭機)，他相當興奮相當開心，沒有拍下過程照片，因為那時正與弟弟在育嬰房啊，唯有下次再拍吧。

自西鐵線直達尖東，確實方便了我們這群居住大西北而又有BB車嘅居民，又多個理由拒絕老公買車喇，哈哈！不過不得不承認，3歲+5個月這個組合，真係有架車會方便D，再諗吓先啦！

BOXING DAY 遊濕地

2009-12-27T23:16:00.003+08:00

攝於平安夜的弟弟，準備出席第一個聖誕派對，當然要著到紅噹噹啦。

BOXING DAY一齊去濕地公園，開心晒，終於唔係要一個人留o係公公婆婆度喇。

哥哥話人cup我又cup，整多張俾弟弟先。

哥哥喜歡睇山，睇水，睇石，睇魚，睇河流，睇瀑布...

弟弟喜歡躺在BB車中，搖呀搖，好好瞓呀。

我呢，仍是喜歡看見你們那滿足的笑容。

我呢，仍是想無時無刻和你們在一起，一同感受一同分享一同享受那在一起的親密。

聖誕聯歡會+數碼港

2009-12-22T22:43:00.001+08:00

沒有華麗的聖誕服飾和化妝，郤有天真快樂的笑容，去享受第一次公開表演，我喜歡。

能夠與你零距離的擁抱，是我老死前每一天的願望，能否答允嗎？

不在乎圖工是否精美可觀，只在乎看見你倆在一起那一致的笑容，足以令我回味再回味。

前往數碼港途中，你...太累了，要在IFC的育嬰間內小睡片刻，又未嘗不可喎！

突然驚醒，發現我們郤打道回府，你斷言拒絕表示非去不可，只好讓你拖著仍帶疲倦的身軀繼續前往，看，乘小船也沒有興奮的表情呢，那又何苦呢！

此嘉年華，正如巧遇的藍藍一家所言，不太適合你們這3歲孩童參與，那小船難以控制，只會自轉，沒有嘔吐已經是奇蹟，滑梯速度快，玩一次便說『我唔玩喇，好快好驚呀』，噢！我想你來開心，不是想你換來驚慌啊，好好好，唔想玩就擺了。指指石頭，看看流水，再逛玩具店，好嗎。

我希望時常見到你那天真可愛的笑容。

後記：瞓醒一覺，你第一句開口對我講的說話係：『唔好去數碼港喇，好驚架。』唉！！

12月~聖誕月

2009-12-20T18:28:00.003+08:00

12月的你和你，過得開心嗎？

弟弟，有哥哥撐你，冇有怕

2009-12-05T21:47:00.003+08:00

3年前，

我：『老公，我想帶天天去行山呀。』

老公：『天天咁細個，唔好週圍去喇。』

******************

3年後的今天，

天天：『爸爸，我要去行山。』

老公：『咁弟弟點呀？』

天天：『帶埋佢一齊去啦。』

老公：『咁好啦，你去執野啦。』

『老婆，天天話去行山，帶埋弟弟一齊去喎。』

我：『做細嘅，真係唔同D喎！』

『弟弟，你發達喇，你將會比哥哥去得更多地方呀！有大佬撐真係唔同D。』

弟弟，弟弟

2009-11-30T21:54:00.000+08:00

不經不覺，弟弟已經4個月了，樣子和哥哥一樣，都是『老積』的，不過與哥哥相比，弟弟則較為『BB』，我好愛這對寶貝仔呀！

請你不要大得太快

2009-11-23T22:02:00.000+08:00

當你2歲半時，替你拍下這照片。

當你3歲時，又再拍下這照片。

發現這半年，你高了許多。

我突然間想，停留在這刻，請你不要大得太快啊。

3歲了，生日快樂

2009-11-22T22:00:00.001+08:00

天天，生日快樂。

『邊個陪我玩呀？』

2009-10-28T07:05:00.002+08:00

早上，

天天：『爸爸媽咪你(地)使唔使返工呀？』

爸爸：『要呀。』

天天：『咁邊個陪我玩呀~』

爸爸：『公公囉。』

天天：『公公都未黎。』

爸爸：『公公7點半黎嘛。』

天天...安落晒。

天天登高去

2009-10-26T22:09:00.000+08:00

天天：『去邊呀？』

天天：『係咪前面個度呀？』

天天：『點解D野食仲未黎嘅？』

天天：『婆婆，騎牛牛點玩架？』

天天：『我都得喇！』

重陽節去登高

2009-10-26T21:44:00.000+08:00

重陽節，緊係去登高，有野食就最好啦，這是個滿足到各個願望的假日好去處。

弟弟不夠3個月，已經到郊外遊玩，做亞細嘅真係醒D。好彩冇俾毒蚊針到咋。

天天一知道去『有羊餵個度』，即刻打俾婆婆喇。

飲飽食醉後，弟弟又再次小睡了，行山路特別好瞓啊！

又有戶外遊戲玩喇，當然有『玩伴公公』伴隨左右啦！

假期生活

2009-10-25T22:47:00.003+08:00

連續返了六日工，今日終於來到生活的主菜，全天候與他們在一起，全天候的陪玩陪食陪瞓，全日埋身勁餵勁抱勁攬住隻15磅豬仔，和聲控著那就快3歲的馬騮，放假捨不得躺在床上自行找周公，只想無時無刻望著你們，四個人在一起便滿足了。

PS：放假另一重要工作，便是拿著相機不停拍拍拍。

生活，就是你們

2009-10-18T22:01:00.006+08:00

扁咀...因為哥哥大嗌，嘈住佢喎！

喊完，冇事喇！

同哥哥一樣，3個月都未夠，個樣就咁老積！弟弟眼仔冇咁圓囉!
(上圖係弟弟，下圖係哥哥)

兩個傻更更咁！

踩單車

2009-10-06T11:33:00.002+08:00

每日放學後的指定活動，到平台踩單車，已經踩得很快囉。

兩個月=剛滿月？！

2009-10-06T11:14:00.003+08:00

兩個月零五日，到健康院磅豬豬，有5.86kg的驕人成績，我為你而感到欣慰。

護士姑娘告知，因為上天造人的奇妙，提早到來的你，會自己調整需要，所以雖然你已有兩個月大，但食奶仍像一個剛滿月BB一樣，食得好密，每1-2小時食一次，來『追回』足月BB的進度。

護士姑娘亦提到，這個情況，可能維持至你4-5個月大，叫我有充足心理準備來迎接。

下週四便復工，現在所做的準備，便是開始不睡午覺...

**************

昨日注射了肺鏈+五合一+輪狀，爸爸看著你的豬脾被長長的針刺入...和你一同痛哭，痛叫，好像自己也有份一同打針般，男人...是不能『生仔』的！

注射後你份外疲倦，半夜亦出現微燒，放心，媽咪會一直陪伴你左右，好好享受24小時與你一起的假期。

兄弟的睡前對話--作者--佢地亞娘

2009-10-01T11:27:00.002+08:00

天天：『我話你知，我係你大佬，你要聽我話，知唔知道！』

弟弟：『嘩嘩嘩，媽咪呀，哥哥恐嚇我呀，大佬又點喎！！！』

天天：『弟弟，我講吓笑啫，唔使咁認真喎，你睇我笑起上黎個樣幾純良可愛，我又點捨得蝦你呢！！！』

弟弟：『好啦，我信你架，你唔好講大話喎，我地一於兩兄弟拍住上啦！』

兩個月喇！

2009-09-30T00:00:00.000+08:00

為慶祝弟弟兩個月大，特意呈上裸照兩張，以作紀念，謝謝欣賞，同時再次見証母乳的威力，下週一到健康院便知成績，能否打破哥哥兩個月時的5.41kg呢，好緊張啊！

弟弟

2009-09-29T23:55:00.001+08:00

哥哥的禮物--自家梳化床，日間返學期間，做了弟弟的午睡床，兩個月的弟弟好似好長咁！

好鐘意你的包包面！

精靈弟弟

2009-09-28T14:52:00.001+08:00

這是這舊『飯團』，最精靈的幾張照片，圖二可見其『雙下巴』同『肥頸』係堅野啊！

和你在一起，真好。

2009-09-26T14:48:00.000+08:00

劉翔在復出一戰中，臨跑被鏡頭影了一個模樣，被天天攝錄在腦中，每次叫他『扮劉翔』啦，他便會這樣！

自從上學後，只有星期六日是假期，對要輪班工作的我倆，實在少了時間可以陪天天玩，爸爸好不容易這個星期六放假，趁著我還未復工，放下弟弟，帶著天天三人行外出逛逛，天天報以『好開心呀』，問他點解，他說：『因為有爸爸媽咪陪囉！』

聽後好甜之餘，亦覺得有點肉赤，真的要好好珍惜能夠與家人相處的時間啊！

不睡

2009-09-25T23:10:00.002+08:00

11時10分，現在已經夜深了，

我倆相處的8週2日裡，你是第一次在這個鐘數，仍然睜著燈籠般大的眼睛對著我。

10時半已將你餵得飽飽的，至少是你自己不吃，

以為可以一同入房進入夢鄉，誰知你一躺在床上便醒過來，

你爸又搖又un又行，但你怎也不放過我們。

『老婆，佢好似又想食奶奶喎。』

『老公，15分鐘前係佢自己食到唔食喎！』
(係你自己想瞓就交佢俾我咋！好吖，又即管試吓佢係咪肚餓！)

『老公，佢唔肯食喎，嗱，你自己都睇到架啦！』

老公冇辦法脫身，唯有繼續他的又搖又un又行......

這次任憑爸爸如何如何，他都睜著大眼睛，

我叫老公放低他，讓他嚎哭一會再食點奶再睡吧，

呵，你竟享受躺下來，已過了15分鐘啊，仍然一聲不響，

你想點呢？

81.5安冰奶

2009-09-25T11:20:00.002+08:00

為你，至今我儲了81.5安冰奶，若果每餐你要食4安才滿足，那暫時已有20餐，若我不在你身邊你每日要食3餐的話，那差不多已有7天的糧食了，希望我返工期間，你嘗過冰奶後，仍會報以這個滿足甜美的笑容。

12點3點5點7點...

2009-09-24T11:15:00.000+08:00

8週大的你，仍然要兩三個鐘找奶奶一次，勁餵勁餵讓你變成大隻BB，那雙大脾一節節，雙下巴頸項打晒摺，呵呵多趣緻。

近這兩週，大個仔開始要近人了，除在晚上仍能自行熟睡外，日間常要抱住，抱著你搖，抱著你拍，抱著你un，要人行要人企，坐低也不行，這就是你。

明明食住奶奶瞓著了，坐起來拍背掃風便睜開雙眼，是知道我下月便要返工不能日日夜夜相陪所致，還是覺得我太肥要幫手呢？

是啊，下月中便復工，但你仍然在夜裡每兩三小時叫醒我一次，12點3點5點7點......叫我怎樣好？

這夜你們都累了。

2009-09-23T11:13:00.000+08:00

我勁抱都攪佢唔掂，爸爸一抱就瞓！

睇緊DORA都瞓得著，你真係好眼瞓喎！

放工後攪完大細的男人，謝謝你。

這夜，只是享受獨個兒洗澡10分鐘，出來見那三男子...這個情況若在日間多出現...便好！

大細眼

2009-09-22T11:11:00.000+08:00

唔知係咪食得奶多，出現眼蓋水腫情況，理應有明顯的雙眼皮，但右眼的雙眼皮仍然腫起，出現大細眼情況，唔知大個仔D嘅時候會唔會正常番呢，還是一路都係咁，大細眼呢？

new born片咁快唔啱用??

2009-09-19T22:37:00.001+08:00

幣，今日發現new born片好似好細條咁，已經漏尿漏左幾次喇，仲有包半喎！

不合穿的夾衣

2009-09-19T18:04:00.003+08:00

你下次到健康院檢查是10月初，因此還未知道現時的實際體重，我估都超過10磅了。

看著那些不合穿的和尚袍，感到好欣喜，

看著那些原是長袖的夾衣，漸變成短袖，覺得好有成功感，

我下月中便復工了，早在上週開始便為你儲量，

成績理想，現在已有約10數包3安了，

婆婆表示3安一餐可能不夠，估計你一餐要飲4安啊，

所以現在只好儲些1安。

重拾夜奶

2009-09-19T10:39:00.003+08:00

弟弟出世至今，對天天最大的影響，是重拾『食夜奶』一事，

每當夜深人靜，被弟弟嚎哭弄醒後，

都會要求：『我要飲奶奶呀』。

昨夜被弟弟弄醒兩次，飲過第一次後，

我告訴他：『飲埋呢次之後，就要到太陽伯伯出黎先可以再飲喇。』

他迷糊地答『知喇』，再大覺睡。

第二次被弄醒，已忘記答應過我的事情了，

我唯有說謊：『D奶奶沖晒喇，聽日買過先有得沖俾你飲，快D瞓啦。』

誰知他哭著道：『等我睇吓先啦，睇吓係咪冇啦！』

幣，被拋了一道添！

唉，我只好乖乖就範，給他沖5安後讓他再入睡。

當初，弟弟回家後，聽到他第一次的要求，

我認為他因為弟弟的到來，而感到不安，

所以要求飲奶以得安慰，

現在可能都因這個原因而作要求，

但如果每次被弄醒就要飲奶才能續睡，

那似乎是個倚賴了。

對自己的信任

2009-09-18T09:08:00.002+08:00

每日，公公都帶他到樓下平台，玩上一個鐘以上，與其他小朋友追逐快跑，欲借你的玩具時，自己的又不會讓予他人，原來個個細路都是這樣！

每人帶著自己的私家單車，在平台『打圈』，情況有點像『小兒格蘭披治賽車般』，間中公公要充當紅綠燈，又要扮交通警，亦要擔任停車場管理員，都幾攪笑。

這個地方，打從他6個月開始便日日到訪，每一個角落每一個設施都已是他的好朋友，由跳1級樓梯，至2級，3級，最返還大胆到跳4級。

大個仔開始對肢體有一定信任，因而做出以上被爸爸認為是『危險』的動作，我反以因此覺得，他又大個了一點啊！

父母惡攪

2009-09-18T08:57:00.002+08:00

父母惡攪，將兩個睡熟的放在一起。

突然，被大的識破，一手將小的推開......
這，是兄弟。

註：請放心，小的沒有絲毫受傷，一直被那貪玩娘托著肩膊啊！

笑

2009-09-14T15:24:00.001+08:00

仍然...喜歡你...笑。

心軟

2009-09-14T14:41:00.003+08:00

發燒的你，乖乖的留在公公婆婆家，好讓弟弟不致感染。

昨夜雖已退燒，但情況反覆，欲讓你留多一日好好休息，

『不如你今晚繼續留o係公公婆婆度啦。』

『我要返屋企。』

一便說一便入房推自己的BB車出來，

『出面行雷閃電落大雨呀，公公婆婆都好驚呀，你o係度陪佢地啦。』

想了一會，『我要返屋企』，

『公公婆婆驚喎，你唔陪佢地咩？』

『公公陪婆婆咪得囉，媽咪都驚架，我陪媽咪！』

就是你這樣的一句，使我心都軟了，好吧，你想點我都會應承啊。

弟弟，我錫晒你！

2009-09-03T11:53:00.003+08:00

不少奶媽都表示，最期待同最開心的日子，就是帶著小寶貝返健康院見姑娘，我也期待著這個『1個月覆診+打針』的日子很久了，當然最想知的，是小寶貝的體重，足以反映奶媽是否有足夠糧食供予小寶貝，所餵的方法和技巧是否正確，為繼續餵哺給予最大最強的動力。

今日，姑娘所派給我倆的成績表，簡直出乎意料，在車上我與你爸還打賭，誰會猜中你的體重，我們估你大概會有7至7磅半吧。

緊張的上磅時刻到了，帶著赤條條的你放在電子磅上...

聽到的讀數是--『4.11kg』！！！

我立時伸長頸項，用自己雙眼望真些，確實見到『4.11』這組數字在閃著！

出世時的你，只有5磅1安，經過這個月來的努力，你已遞增至9磅了。

我倆被你的意外嚇倒了，一邊替你急急的穿回尿片衣服，一邊咀巴也合不上地稱讚你叻仔。

你給我的成績，已解開了我這個月來的擔心，同時亦為我帶來無比的信心，每兩小時叫醒我，雖然確係辛苦，但非常值得。

我倆還一同被護士姑娘讚啊，弟弟，我錫晒你！

無題

2009-09-01T15:10:00.002+08:00

各自有各自的『梳化』，鳴謝叔叔嬸嬸。

趣聞一

主角：天天、婆婆

婆婆：『我可唔可以同你一齊坐呢張梳化呀？』

天天：『唔可以呀，因為你個pat pat太大喇，坐唔到落黎呀！』

趣聞二

主角：天天、弟弟(媽咪代問)

媽咪：『弟弟想同你一齊坐呢張梳化呀。

天天：『唔得呀，佢個pat pat太細喇，坐唔到架。』

******************

弟弟心想：『呢兩個傻佬o係度做咩野呢？！』

弟弟：『啊，原來想影相，影我啦影我啦！』

催奶良方

2009-08-30T16:35:00.002+08:00

弟弟滿月，與家人食飯慶祝，和老公商量，認為不如讓弟弟食餐冰奶，好讓方便招呼家人，但一直都是埋身餵，不知弟弟一餐其實食多少安奶，今早試著一邊餵奶，一邊泵奶，看看弟弟食一餐奶，大概會食多少。

弟弟至今的食奶模式，大概每兩小時食一次，多數只食一邊乳房的奶，每次由10分鐘至30分鐘不等，隨他意願。試過幾次都叫他食埋另一邊乳房的奶，但其脷仔已向上頂實，不肯吸啜，所以都無謂勉強他。

滿以為『點都會有3-4安掛』，誰知一邊食左，一邊吸右，呵，只有1.5安。

吓，原來弟弟每餐都係食咁少。

吓，原來我的乳房只是製造出如此少的母乳。

是否應該由明日開始，進行『儲奶大行動』呢？

不然，復工後，弟弟食咩野呀！

各界奶媽有沒有催奶良方呢？

誰是誰？

2009-08-30T08:11:00.000+08:00

兄弟滿月競猜(冇獎)遊戲。

滿月喇

2009-08-30T08:01:00.001+08:00

滿月喇！

看著你長肉

2009-08-25T18:03:00.003+08:00

不眠不休的餵哺母乳，使回家時仍是『皮包骨』的乳鴿弟弟，至現時(未滿月)已有『雙下巴』，為娘除了在『磅豬豬』時獲派成績表外，每日看著你由『面尖尖』變成『包包面』，已經好滿足。

奶媽的時間

2009-08-25T17:34:00.002+08:00

早上10:55，開始食奶，

食15分鐘，跟住是一輪掃風，換片，

安頓在床上繼續小睡，已是中午12時。

每兩小時食一次奶，下餐開餐時間是下午1時，

拉著老公落樓，用一句鐘完成我們的午餐，

以及到超市掃點日用品，

準時下午1時返上樓，

他已被婆婆抱住，睜大眼睛，等著食奶。

這餐用半小時完成，

接著又是一輪掃風，換片，安頓小睡，

下午1時45分，致電髮型師，

『你忙嗎？我2點前黎到，但時間冇多，2點半前要走，得嗎？』

多得他快手快腳，下午2時30分準時離開，

隨即致電老公：『佢瞓醒未呀？』

『一早瞓醒喇，好似想食奶，我依家抱緊佢，應該仲可以挨多一陣嘅。』

一支箭飛返屋企，抹個汗，再餵奶。

奶媽的時間，多寶貴。

同學仔確診豬流感

2009-08-24T14:30:00.004+08:00

天天學校，K2班一學生，昨日確診患了『豬流感』，

學校停課至31-8-09，

1-9-09再開學。

天啊，『豬流感』每日都在我們身邊走來走去，

好像好可怕啊！

連環拍，連環照

2009-08-22T12:00:00.003+08:00

瞓

2009-08-22T11:56:00.000+08:00

懶瞓弟弟。

笑

2009-08-22T11:49:00.000+08:00

喜歡看著你...笑。

攪野

2009-08-19T11:32:00.002+08:00

『坐月』日子快將完結，也就是老公放完大假，完成『陪月』的日子。

『陪月』期間，老公逢星期三都要返工，也就是我一週最悶的一天。

可以預期，老公重返工作崗位後，我每日都會這樣悶。

要搵D野攪吓先得喇...

順利的返學旅程

2009-08-19T11:12:00.002+08:00

18-8-09開始，天天返學的時間，增加至9am-2:30pm，即是由食早餐到瞓晏覺，都是在學校裡。

學校的午餐時間是11:45am，高老師話天天第一日食了很少，公公解釋是因為平日12:30pm才在家開餐，但小朋友適應力強，第二日天天問了高老師『係咩野黎架』同『好唔好食架』之後，得到高老師滿意回覆的他，便將全份午餐放進肚子裡。

如是者，天天每日都可以自己食晒份午餐，都算叻仔。

昨日是第一日在學校瞓晏覺，估不到天天都能入睡，是我意料之外啊。

每晚要以潛移默化的方式，重複告訴他：
『聽日返學食早餐喎，上完堂就會食茶點，玩一陣玩具就會食午飯，要試吓好唔好食喎，食完午飯就瞓晏覺，瞓醒爸爸就會黎接你放學喇。』

每次都好唔專心咁聽我講完後，循例回答『哦，知喇。』

見他返學沒有大叫大哭，每日開開心心地出門口，開開心心地跟老師入課室，放學後問他『返學開唔開心呀？』，他都會答『開心』，我想他應該適應得不錯吧。

幼兒班返一至五全日，六返半日，與老公商量過，一至五都已經返全日，六就讓他休息吧，也讓一家人多一個去街的選擇吧！

好無癮的媽咪

2009-08-15T09:41:00.002+08:00

天天在公公婆婆家隔離期間，

早上，

媽咪打電話俾佢，

婆婆話：『天天，媽咪打黎呀，同媽咪傾吓計啦。』

天天答：『我唔講喇，你同佢講啦！』

媽咪~~~~~啞左。

晚上，

媽咪再打電話俾佢，

婆婆話：『天天，媽咪打黎呀，要同媽咪講電話架，快D黎！』

天天答：『喂，媽咪呀，我睇緊KITTY呀，(DEAD AIR)~~~』

媽咪隱約聽到個電話遞左去第二個度，

有人話：『公公，我唔講喇，你同佢講啦！』

媽咪無癮無癮好無癮，都係攬住弟弟實在D。

好掛住個仔的爸爸

2009-08-15T09:29:00.003+08:00

天天在公公婆婆家隔離期間，

早上，

老公問：『唔知天天瞓醒未呢？咁早可能未瞓醒喎。』

老婆答：『梗係起左身啦，你掛住佢咪打電話俾佢囉。』

中午，

老公問：『唔知天天食飯未呢？』

老婆答：『你係咪好掛住佢呀，你不如過去亞媽度陪吓佢啦。』

老公飛快答：『好呀，我好快返黎陪你。』

老婆心諗：我使咩野你陪呀！！

晚上，

老公問：『唔知天天瞓醒晏覺未呢？』

老婆答：『老公，你唔好問我喇，你不如依家過去亞媽度啦。』

老公好無耐咁被老婆鬧~~~

老婆再鬧：『你過到去，佢又要話跟你返黎，咁點吖！』

老公冇心機話：『咁我唔過去囉。』

老婆打電話俾亞媽，

亞媽話：『你老公晏晝應承左天天話今晚會過黎喎~~』

老婆大叫：『老公，你係咪應承左個仔話你今晚會過去架，咁你仲唔快D去，應承左就唔該你真係做啦，講D又唔講D。』(激死！)

****************

翌日早上，

老公問：『唔知天天起身未呢？』

老婆~~無氣再答佢喇！

有6磅喇！

2009-08-14T11:50:00.003+08:00

弟弟到健康院磅重，

尤如媽媽派成績表般，

今日到健康院睇黃+磅重，

本以為週三才磅完，

今日就算有進漲，成績也不會太明顯吧，

呵，竟然來個驚喜啊，

2.73kg，弟弟已邁向6磅了。

哥哥返學第六日便病了。

2009-08-13T18:24:00.003+08:00

哥哥返學第六日，

老公接放學時，聽到高老師向另外兩位家長說，

『佢地兩個今日好多鼻涕喎，要睇醫生喇。』

老公如常帶哥哥到公公婆婆家，

亦請他們留意哥哥有否不適。

下午5時許，接到公公來電，

『佢下晝瞓覺時有D鼻塞喎，瞓醒後對眼又流眼水。』

那便要看醫生了。

****************

校長在orientation時表示，小朋友初期返學，會較容易生病，可能因為要適應新環境、又同一時間與較多小朋友聚在一起有關，

這點我完全明白，

但我又唔明，家長帶子女返學時，理應見到他們不適吧，『流好多鼻涕』總不會是返到學校才出現吧，為何仍要安排他們返學呢，知否現時是流感高峰期呀，自己子女不適還要返學，好辛苦喎，何況還會傳染別人呢！

哥哥這幾天要在公公婆婆家隔離了，怕會傳染到只得兩週大的弟弟，

哥哥，你要加油同快些好番啊，媽咪等你返屋企呀。

小手小腳

2009-08-13T16:09:00.001+08:00

喜歡，你的小手，你的小腳。

就是，喜歡你的一切。

就是，喜歡你的所有。

就是，喜歡你。