陣痛

29-7-09下午，開始感到小宮有規律地收縮，


告知護士，駁上機器作檢查，


『唔係好密啫，你自己再留意吓，再密就再叫我地啦。』


過了約2小時，由最初的每隔30-45痛一次，


變為每15分鐘痛一次，再叫姑娘，


11PM再駁上機器檢查，


頂，做左成半個鐘頭後，個姑娘話：


『你冇陣痛過喎！』


冇，你估我特登講大話咩，依家痛到每隔5分鐘一次喇！


『咁繼續駁住個機，睇多半個鐘啦。』


都唔知佢係咪駁得唔好，之後個半個鐘，就見到好有規律的每隔5分鐘一次陣痛，但波幅唔大，其實我都唔覺得好痛，只是似比經痛痛少少咁。


30-7-09零晨1:15，個姑娘仲未入黎，


只好按鐘叫她，


『哎呀，唔好意思，啱啱接緊生。』


我就反黎痛死都冇人理喇！


『係喎，有陣痛喎，不過隔5分鐘先痛一次，又唔係話認真好痛，你瞓吓啦，等BB留o係你個肚多一日得一日嘛，繼續瞓啦。』


咁痛，點瞓呀！


既然你都叫我繼續瞓，人有三急，如個廁再睇吓點先。


行到入廁所，又痛過喇，仲好似想痾屎添，


記得生天天時，要生的時候，唔係呢種痾屎感覺的，


可能真係想痾屎啫，試吓痾啦，


痾痾吓，發現勁唔對路，


摸下下身，點解個陰道口好似有野咁嘅，


即刻按救命鐘，


之後就係一片混亂嘅場面...

弟弟，你要加油呀。

醫生話：



安胎，唔可以落床，除左去廁所。



醫生話：



唔可以洗頭，催生那天先可以洗。



醫生話：



要明日幫弟弟做超聲波。



醫生話：



做完超聲波，睇吓弟弟個位置、體重等，先可以決定係星期日定星期一崔生。



弟弟，你要加油呀，媽咪都會加油呀。

28-7-09天天來醫院探我。

今日繼續留院安胎，


今日羊水已經留少了，


仍冇肚痛跡象，醫生謂是好表現，


叮囑要繼續卧床休息，


著老公協助回公司安頓好工作，


帶來NOTEBOOK在醫院解悶，


下午天天表示要與公公婆婆到來探我，


一見面便問我『媽咪你要留在醫院呀』


又好似好不安咁行來行去，


又問吊鹽水痛唔痛呀，


我不停同佢講『媽咪要等弟弟出世後，先可以同你返屋企呀』


『好要乖乖地留o係公公婆婆屋企瞓覺呀』


佢好快話『知道喇。』


原本好擔心佢會因為事出突然而會扭計，


但婆婆話佢又冇咩野喎，好聽話。


咁我都安心，做哥哥真係唔同D啊。

27-7-09穿羊水，被迫入院安胎。

前往午飯途中，

突然感到下身一濕，

趕忙到廁所查看究竟，

啊!好像只是多了點白帶啫，

安心繼續去會合同事飯，

食飯後，好似賴尿般弄濕成個pat pat，

拿拿淋坐的士入院，

醫生檢查後，表示要為弟弟打強肺針，

抗生素同吊鹽水，以防感染同子宮收縮，

皆因弟弟只有35週，醫生想他有36週才出世，

就是這樣，我便要留在醫院直至弟弟來臨。

弟弟，你要儲肥D呀!

超標

會超標的食物：

1. 炸兩
2. 咖哩牛腩飯
3. 水煎包
4. 多過3塊克力架
5. 芝士焗吞拿魚意粉
6. 罐頭粟米湯
7. 茄汁
8. 生炒骨

臨近生產，開始冇耐性去節制自己了，經常想『食小小唔怕嘅』

曾有數次，好想食支雪條，好想食碗楊枝金露，好想食杯芒果鮮奶

紅豆沙，西米露，馬拉糕...

醫生話，就算弟弟出世後，仍要繼續食這個營養餐，

對為食的我而言，簡直尤如坐監。

給我一個希望

進食『妊娠糖尿餐』，產生憤怒、痛苦、失落、空虛、情緒下降至極點、經常發脾氣...

憤怒，係見住你老公o係你面前飲汽水，食薯片，而你只得個望字。

痛苦，係被迫每星期有兩日要『督手指』6次。

失落，是都已經食唔飽，督手指竟然都超標。

空虛，源於每餐都好似食唔飽咁。

情緒下降至極點，差不多唔想去街，唔想見人，唔想同人講野。
因為去街要煩惱--我可以食得D咩野？

覆診兩次，自身體重不斷下降，你這肥B就不斷膨脹。

醫生仲話你比同週數的BB大隻，可能會早生。

因為你的頭仔已倒轉，醫生仲話你想走到盆骨啊，著為娘要坐多些。

又話妊娠糖尿的BB，個肺發育會唔太好...

咁我又可以點呢？

我已經咩野都俾晒你，我輕左而你重左喎......

你若是要早來，我也沒辦法啊，現在為娘只好繼續堅持那個所謂『營養餐』，同時望你出來時健健康康吧。

另外，你可否給我一個希望，你到來後，讓為娘喝杯香濃咖啡，可以嗎？

妊娠型糖尿病孕婦飲食10原則

妊娠型糖尿病孕婦飲食10原則


1.將碳水化合物食物分佈均衡，即3主餐和2至3小餐裡都有碳水化合物食物。而每一主餐或小餐的分量需要均勻地分配。


2.碳水化合物食物的分量要固定，每一餐碳水化合物的分量視個人需求而定。


3.多選擇緩慢釋放葡萄糖的碳水化合物食物（即高纖維食物），如麥片、糙米、全麥五穀食品、蔬菜、水果等。


4.避免或限制攝取精簡型碳水化合物食物，如白糖、蜜糖、甜品、加糖飲料等。


5.水果分量必須依據指南的建議（如1粒中型蘋果/1片木瓜/半粒中型番石榴都相等於一份水果），並且將分量完好分佈在所定的每餐內。


6.限制飲用果汁或避免選擇太過成熟的水果。


7.多吃不飽和脂肪酸，減少飽和脂肪酸及反式脂肪。


8.葉酸、維他命C、鈣質、鐵質的分量與普通的孕婦需求都稍微提高。貧血孕婦更需注意及多補充這幾種營養素。


9.無論是普通或糖尿病孕婦，一律嚴禁沾酒及吸煙。


10.咖啡、茶或含咖啡因飲料能免則免，或儘量限制於一天不超過2杯。

弟弟情況

踏入倒數100日。

婚介已穿不進。

舊鞋亦著不下。

每晚抬起雙腳來睡，至今抽筋1次，算係咁。

現時週數的體重，與懷著天天時的週數體重相約，今次飲食控制得較好。

但郤被醫生診斷：弟弟的SIZE同體重剛合格。

所謂剛合格，係超聲波所預計量度的週數，和現時胎兒週數相比，相差不大。

健康院人手摸肚，仲話弟弟大細比實際週數細1個星期添。

情況...畢竟令人有點擔心。

11人馬交遊遊走走

一家人，連大連細連弟弟，一行十一人，到馬交遊遊走走，享受一家人聚在一起的美好溫馨時光，咀吧食不停的喪食之旅，完滿結束。

人多的好處，便是可以食盡餐廳中的所有美食，閒閒地叫6-8個餸，一齊食餐飽。

行程之完美和豐富，有賴知深的領隊帶領，走過大街小巷，尋找隱世美食，欲遇上草堆街兆記休息之日，唯有轉戰營地街市3/F，打道回PONTE 16途中，遇上頤德行，大三巴途中，買到差一個便售罄的潘榮記，法蘭度1蚊5個波，玩到個個變細路哥，天天可以趴在浴缸當泳池，一樂也。

所以他是『大贏家』，為兩老帶來豐厚的零用錢。

天天除了成為兩日最開心的團友外，還為馬交注下巨資，『起高瘤』，實行以一招坎頭埋牆來娛賓，攪到自己又喊，嬸嬸又喊，下次唔好喊喇。

下次行程安排，由叔叔嬸嬸安排，一行十三人，去『大飽口福』。

營養

在遊戲室與小朋友玩，被問到：

『你個仔幾大個呀？』

『兩歲多d啦！』

(通常都好少講得好清楚--兩歲三個月...)

『咁佢好高喎。』

與她那三歲兒子相比，天天的確係高，因為仲高了成吋。

回家，拿來輕尺。

『天天，企埋黎度吓你有幾高。』

94cm。

拿出健康院的兒童健康紀錄--身高那頁，才知他的高度是最高那條生長線。

懷著弟弟比天天辛苦，奶奶說第二胎是會辛苦些，我雖然能吃，但吃後胃裡總是滿有胃氣，胃酸更是多得不能再多，總有頂住頂住的感覺，而且對『飯』總是提不起勁，但對一眾零食、汽水、M記等食物特別喜愛。

若果天天之所以會咁大隻，係因為我懷著他時所給予的營養好，那我現在便担心弟弟了。

心跳

終於，隔著肚皮，聽到你的心跳。

雖然有天天哥哥的經驗，但再次懷孕，心情仍是興奮。

多謝你，天天弟弟。

*********************

由於醫生應診中途去了執仔，最後10:50pm才離開診所，回到家已是11:30pm，答應天天哥哥我們一同回家，所以雖然很晚，但仍然到婆婆家，如他已入睡便抱他回家吧。

可是一開門，即聽到哭聲和急步聲，開燈見天天哥哥帶著紅紅雙眼撲到懷中。心裡有種說不出的難受，抱了一會才接受爸媽這麼晚才來接，和知道『回家喇』！

12周的OSCAR

12周完成OSCAR檢查，報告為低風險。

照肚時，醫生笑笑口地問：『第幾胎呀？』

『已經有個仔喇！』

『咁知道呢個係仔定女未？』

『未知呀，已經睇到喇？』

『8-9成啦。你個BB反轉左喎，你去洗手間，轉頭再照多次啦！』

*************************

『老公，你想係仔定女呀？』

『冇所謂啦：)』

『嬤嬤婆婆想係女喎，天天又成日話想要妹妹！』

『不過我覺得係仔！』

『老公，我都覺得係呀！』

~~~~(大笑)~~~~

*************************

醫生：『今次個位好好多喇！你地想係仔定女呀？』

老公：『有所謂啦，不過屋企嘅老人家就想係女囉！』

『咁要等下次喇，呢個係仔喎！』

**************************

回家後，

『天天，原來媽咪肚DUM入面嘅係弟弟呀！』

『妹妹呢？』

『唔係妹妹喎！』

~~(笑笑口)~~『係妹妹呀！』

『哎呀，唔會有妹妹喇，再生都會係仔架，你老豆果條線生仔多架，再追又係仔咁點算呀！』

~~~(天天已經行左去玩車)~~~

『叫弟弟同你一齊玩車好唔好？』

『好！打網球吖！(意思係羽毛球)』

好辛苦呀

每次食完野都頂住個胃，好辛苦呀！