不睡

11時10分，現在已經夜深了，

我倆相處的8週2日裡，你是第一次在這個鐘數，仍然睜著燈籠般大的眼睛對著我。

10時半已將你餵得飽飽的，至少是你自己不吃，

以為可以一同入房進入夢鄉，誰知你一躺在床上便醒過來，

你爸又搖又un又行，但你怎也不放過我們。

『老婆，佢好似又想食奶奶喎。』

『老公，15分鐘前係佢自己食到唔食喎！』
(係你自己想瞓就交佢俾我咋！好吖，又即管試吓佢係咪肚餓！)

『老公，佢唔肯食喎，嗱，你自己都睇到架啦！』

老公冇辦法脫身，唯有繼續他的又搖又un又行......

這次任憑爸爸如何如何，他都睜著大眼睛，

我叫老公放低他，讓他嚎哭一會再食點奶再睡吧，

呵，你竟享受躺下來，已過了15分鐘啊，仍然一聲不響，

你想點呢？

12點3點5點7點...

8週大的你，仍然要兩三個鐘找奶奶一次，勁餵勁餵讓你變成大隻BB，那雙大脾一節節，雙下巴頸項打晒摺，呵呵多趣緻。

近這兩週，大個仔開始要近人了，除在晚上仍能自行熟睡外，日間常要抱住，抱著你搖，抱著你拍，抱著你un，要人行要人企，坐低也不行，這就是你。

明明食住奶奶瞓著了，坐起來拍背掃風便睜開雙眼，是知道我下月便要返工不能日日夜夜相陪所致，還是覺得我太肥要幫手呢？

是啊，下月中便復工，但你仍然在夜裡每兩三小時叫醒我一次，12點3點5點7點......叫我怎樣好？

催奶良方

弟弟滿月，與家人食飯慶祝，和老公商量，認為不如讓弟弟食餐冰奶，好讓方便招呼家人，但一直都是埋身餵，不知弟弟一餐其實食多少安奶，今早試著一邊餵奶，一邊泵奶，看看弟弟食一餐奶，大概會食多少。

弟弟至今的食奶模式，大概每兩小時食一次，多數只食一邊乳房的奶，每次由10分鐘至30分鐘不等，隨他意願。試過幾次都叫他食埋另一邊乳房的奶，但其脷仔已向上頂實，不肯吸啜，所以都無謂勉強他。

滿以為『點都會有3-4安掛』，誰知一邊食左，一邊吸右，呵，只有1.5安。

吓，原來弟弟每餐都係食咁少。

吓，原來我的乳房只是製造出如此少的母乳。

是否應該由明日開始，進行『儲奶大行動』呢？

不然，復工後，弟弟食咩野呀！

各界奶媽有沒有催奶良方呢？

同學仔確診豬流感

天天學校，K2班一學生，昨日確診患了『豬流感』，

學校停課至31-8-09，

1-9-09再開學。

天啊，『豬流感』每日都在我們身邊走來走去，

好像好可怕啊！

只泵到數滴奶......

回家了，只有我一人。

原來我羊水穿了，陰道分泌驗到有鍊球菌，

所以醫生為安全計，要替弟弟打抗生素，

怕他感染到引致最壞的『腦膜炎』，

醫生雖仍讓他出院，因為他自出生以來，

大小便正常，冇發燒，食得也不錯，

體重仍能維持2.3kg，

但我同老公都認為，如其未來3日要每天帶他回醫院打針，

同時亦要觀察其情況，定時探熱等等，

倒不如讓他繼續留在醫院好好休息吧。

************

回家後，除了接天天回家外，

還要定時定候泵奶，

可惜，本以為會有所出的我，

竟然只能泵出數滴，

不錯，真的只有數滴。

老公不斷叫我放鬆心情，才會有所出，

但眼見泵了20分鐘仍沒有一點成績，

很是擔心。

是因為弟弟早產的原因，弟弟吸啜不足，

泵奶次數不足，湯水不夠，還是如何呢？

為何仍上不到奶？

好懷念餵哺天天時，那些噴奶反射，

數十條奶柱飛奶出來的感覺同情景啊。

我現在可以怎樣做才可增加奶量呢？

難清

天天所生的濕疹,大概在他10個月時開始出現,最初生了在小腿,看醫生搽了普通藥膏便痊癒,及後不記得隔了多久,在背部近尿片位處出現,都是看醫生搽了普通藥膏便痊癒,那次,我亦問過醫生:點先可以減少呢D野嘅出現呢?醫生答:冇!!

近月,那些被醫生診斷為"濕疹"的東西,生了在面仔,而且久久也未能痊癒,結果醫生終於開了類固醇藥膏,開藥前,還語重心長的向我解釋:坊間對使用類固醇藥膏的認知好薄弱,一聽到醫生要開,就好似醫生開了毒藥般會害死病人...(醫生,我個樣唔係咁差呀,你咁都睇到!!)

...其實病人只要按醫生處方,正確使用,類固醇確係一種有效的藥物啊!!你仲有冇擔心呀?

有!可唔可以唔用呀!!

結果,天天按處方,使用那些藥膏,但效果不顯著,停止使用藥膏便再發出來.

他所生的濕疹,我估不是嚴重那些,因為我從不見他會用手抓,或有痕癢表現,我朋友的女兒所生的濕疹是痕癢無比,使她整夜難眠,而天天那些雖不痕,但亦不退!!攪到佢個面好似人地生到成面酒米般,摸落去又"鞋鞋"的!好令人討厭!!

上兩週試著為他戒去一些我們以為誘發其濕疹的食物--維X奶,黃豆類食物,嬰兒牙膏(含牛乳那種),最初搽藥膏那幾天,情況真的有好轉,前日見到---又黎過!

即係唔關事啦!!

把幾火今日我又帶佢見醫生,醫生表示:你有兩個做法,第一個極為慳錢,但好花時間,就係做飲食日誌!第二個就比較花錢,但係快--驗血!!

心急如我,二話不說--驗血!

雖知可能未必有我想的結果,知道點解會引起其濕疹,但更難的是--天天是個為食鬼,每逢見到大人將食物放入口,他都知道--有野食喎!

無論那樣食物是否適合他吃,他也會死纏難打的--我要食!!

食薄餅時他要食你的意粉...
食糖水時他要食你的腐竹糖水...
飲汽水時他要多多...
食薯片時他要餅餅...

要如何完成那本飲食日誌...諗起都頭痕!!

只可連續搽三日,每日兩次的類固醇藥膏,今晚搽了第二次...

清

有冇秘方可以徹底清除...根治...那些生晒o係個面仔度嘅濕疹呢??!!

煩死喇!

好肥咩

18個月到健康院作發展監察,磅豬豬有12.9kg,被姑娘問:點解咁肥架,你有D超重喎!

我話:係呀,佢食好多野架,到依家都仲要食夜奶!

姑娘話:哎呀,亞媽,佢咁大個唔可以仲食夜奶架喇,呢D唔係需要,而係心癮,好似大人咁,半夜三更唔係肚餓架,但如果要你食,你一樣食得落喎,你個仔嘅情況都係咁,所以一定要戒喇!你再帶佢去度吓有幾高,再返黎啦!

***********************

我話:姑娘,度完喇,85CM啊!

姑娘話:等我計計先...其實計落,佢又冇超重喎,可能好似爸爸生得高呀...不過就算唔係超重,都唔應該再食夜奶架喇!!仲要唔好食住奶黎瞓呀,一定要刷左牙先好瞓喎!!

我話:哦!

其實就咁睇,天天一D都唔肥喎!!

仲下巴尖尖咁添!!

觸覺

視覺,聽覺,味覺,觸覺,嗅覺.

為小孩子認識這個世界的重要工具,當中讓小鬼較少刺激的,是觸覺.

為此,五一便與他赤腳行草地,一路行一路鄒眉...行了不到3分鐘,出絕招嚎哭叫抱抱!!

週日,陽光普照,帶他到沙灘,滿以為小鬼會開心地玩上幾句鐘,誰知...一踏足幼沙上,便以九秒九的速度將腳縮起,繼續橋住我對腳,死命也不再企好!!

好啦好啦,唔玩沙,去玩水吧!嘿,又係咁,一掂到水就再唔肯掂!!

在旁的母親太太們見狀,即刻話:係咁架,我個女咁細個嘅時候都係咁架,玩多幾次就唔驚架喇!

係咪真架???

好啦,滿以為會在沙灘玩好耐,變成玩不到15分鐘就要去洗PAT PAT!!小鬼竟然對公廁內洗手盆的水龍頭有興趣,一按有水出時便笑到哈哈聲...細路,你係咪玩野呀!!

昨日,到玩具店行逛,老公滿心歡喜地揀了射擊小鱷魚遊戲,以為小鬼見到會自己行的鱷魚仔好開心,係囉,以為囉,換來係...好驚咁跑去公公度攬實囉!!

而我,又以為佢會喜歡玩色彩繽紛嘅泥膠,係囉,又係以為囉,佢一掂到就縮手喇!!!

究竟,係佢太細個,還是係我俾得太少機會佢去用觸覺來認識這個世界呢?

104

17個月以來,首次發燒發到104度,害得爸爸媽媽公公婆婆爺爺嬤嬤一眾人都好擔心.

醫生話:喉嚨發炎的bb,發燒反覆是正常的,但可以在一小時內可以由100度,一跳跳到104度,就算好明白當中道理,也會為之而感到擔憂同害怕...

擔憂--是見到活潑的小鬼突然變成冇電的病蟲,那個可憐樣,好想幫但又幫不了!

害怕--是會否燒懷腦啊!會否影響智商啊!會否抽筋啊,再係咁發又唔退燒咁點啊......

發燒使小鬼冇胃口,整日只是飲奶,晚上因為103度,就連奶都唔飲,給他塞了退燒丸,入睡了!

小鬼,快給我退燒啊!

手指脫皮

天天手指仔,指頭無名的脫皮,上週開始先是兩隻食指和一隻手指公,及後陸續在其他手指頭出現,這怪怪的表現,當然第一時間找醫師.

醫師未有確實表明是什麼病,只問到:最近有冇掂到d咩野呀?估計都係d敏感啫!

醫師...一個13個月大的bb,當然咩野都會摸啦,我那知他那時那刻摸著什麼呢!!心想.

婆婆想了好幾遍,都估計敏感源頭是否用了超市牌的濕紙巾抹手所致.最後,醫師亦給了藥膏,並說要搽兩至三個星期先會痊癒.

敏感,我好怕,皮膚敏感我更怕,天天早前已出過兩次濕疹,都是衣物質地所引起,不是所謂尼龍呀纖維呀等質地,而是純棉質料,但卻以朱地抓毛等方式展現那種,所以現在買衣服真的要很小心!

突然有個估計,未知他的皮膚敏感與我懷孕期內無戎蝦有冇關係呢?!

小朋友聚會

有幸參加0607小朋友的聚會,這個0611的天天,也不失禮...個size!但論與小朋友互動玩耍的技巧,則尚欠成熟,簡單點說:未識同人玩.只有自己四圍行,拿著藍mama帶來的帽子,把玩著那些閃爍爍的彩帶,到最後,便夾硬將之拉下並放到口中!破壞王是也!!

玩了一句鐘,終於與其他小朋友,合力玩搬椅子!

同場一睹成日在網上見到的一眾媽媽同bb--朗朗,藍藍,cara,子靛,莫仔仔等等,還有他們從未在blog上露相的爸爸!感覺好特別,發現自己還是慢熱一點,又或是只掛住睇住隻馬騮仔,跟住佢行來行去,都根本冇時間坐下與一眾媽媽認識閒談,所以只能淺談,淺答!!實在可惜!!

其實還有的媽媽和bb我是認得啊,因為在他們之前的聚會相片中見過面,但還是未能記得名字呢,希望再有機會見面呀!

聚會能與大隻必必作個實戰比併,連必必爸也驚嘆,有個細過必必的孩子,竟然會仲重!

但不要忘記,必必出牙仔的數量,贏得清脆利落!

得到各奶媽的鼓勵,是另一個驚喜,12月開始掛泵,到現在已好一段時間,感覺好好,因為實在好輕鬆,而亦有各奶媽做sample,早晚埋身都可以餵到16-17個月,所以已經豁出去了!

談到kindermusik,因家住新界,所以未有join九龍區的課程,只在區內一個playgroup上,但上完feathers後,導師表示會開番do-si-do,同時仲叫我:不如join我地個playgroup啦,媽咪唔使咁辛苦架!

我好enjoy同天天一齊聽住音樂跳來跳去喎!!又係一個煩惱了!唔通真的要到九龍續課?

久咳+冇奶

久咳未癒,尤其晚上,喉嚨總是癢癢的,但不想看大夫啊,只怕服藥後令已經產少的我變得更缺貨,奶庫...只餘下4包奶咋!!還有每包都不過是4-5安,亞仔食完還哭著,婆婆認為開多一包會浪費,所以堅持只食一包,婆婆又表示亞仔已經可以食雜糧,不夠可以食其他代替,例如麵包,所以又冇開多包冰奶,又冇補奶粉!!其實得唔得架!!

媽...不想這樣完結...

天天:

叔叔升職請食飯,選擇到三聖食海鮮,媽媽本著"唔甩底"同"為為食"的精神,棄你安全於不顧,一於大吃大喝所有海產,包括花甲,螺片,鮑魚,東星,賴尿蝦,膏蟹,龍蝦和海鮮湯,食時津津有味,食後驚驚青青,心想:"若今晚你變了豬頭,媽該怎辦呢!"

有食的勇氣,便要有試的勇氣,讓你從奶中一嚐海鮮的滋味,果然你是個好孩子,未有一點敏感的出現,這也是給媽一點的回應:"我從此都不需要戒口了...真的嗎?"

說真的,媽自有了你,便為你戒去飲了多年的奶茶,回想戒奶茶那天,好似人戒毒一樣,也像患了重感冒般,四肢乏力,肩膊疼痛,後來才知這是沒有奶茶而引起,至今也未嚐一口,也未有好大衝動想喝,反之,懷孕時一口也沒進過的可樂,最近也飲了數次,見你晚上也是這樣甜睡,我也安心一些!

我無間斷地為你提供量食已9個月了,這是媽值得滿足的事,但你也要為我們這個努力對我好一點吧,出了牙仔不是你的錯,但你可否對媽溫柔點呢,牙仔可否在食奶時略為收藏好些,那便不會弄痛媽呀!現在媽被你弄損了一點,每次餵你都要忍住,好辛苦呀,更担心的,是若發了炎,好可能我們這個關係要告吹啊,媽不想,媽不想就此完結,媽不想是這樣完結......

媽媽
2007年8月21日

玩具

喂,好快d校低個床板喇,我下一步將會諗吓點擒出來呀!!




爸爸媽咪嘅同事夾份送俾我嘅禮物,滿月嘅時候我已經收到喇,不過未玩到,依家勉強ok啦,但個盒明明寫住1歲半先開始玩架喎,咁點解......

哈,我出親街經常俾人誤會我已經1歲架啦,咁玩到有幾出奇喎!媽咪,俾d彈性啦!!

...................亞仔,唔好咁寸喎!!

食粥仔之疑惑

8個月3星期的天天,下排兩顆牙仔已完整地長出,上排兩隻大板牙,竟同時一齊出啊,現在已見到一絲的白線,婆婆前日告知,原來在天天3個幾月大時,她做了點手腳,一直有話我知,她聽上一代說,bb到了3個幾月時,可以用韮菜渣汁,將d汁搽到bb的牙肉上,那到他出牙仔時,便不會太辛苦了,我問:為何之前你冇講過呢?"婆婆答:"我驚你話我迷信同個方法古老囉!"

噢,你是我媽啊,我絕對投你最信任的一票呀,放心去做吧!

出了牙仔另一需要教的,便是食奶時之配合,今日天天第一次因為未肚餓,但我又叫他食奶,終於引起他以"咬一口"的方法來拒絕,當然,後果便是引來罵聲及哭聲呢!其他時間,担白說,他的牙仔都會無意間"high到我,我知他不刻意的,所以也沒責備他,這也是我所說的--要配合,還未找到方法呢!

今日,回家扭開電視,睇到宣傳及鼓勵媽媽餵母乳的廣告呀,老公即對天天說:你也是其中一份子呀!的確,除了天天初出世的那個星期飲過配方奶粉外,之後幾乎全是母乳,我由初時好擔心奶量不夠供應,到現在好多時都要棄掉一些過期奶(過了3個星期的便算過期--我定義的),當中真的經過好多努力及堅持!

現在天天快9個月了,我的另一問題是:他何時要食兩餐粥仔呢,若食了兩餐粥仔,那即代表,飲奶的數量減少,以天天現時的飲食時間表:
7am埋身食奶
9:30am生果蓉
11:30am食冰奶--約8-9安
4:30pm粥仔一大碗(大人飯碗一整碗,好勁)
8:30pm埋身食奶
晚上睡覺期間,仍會不定時地埋身食,老實說,我還未幫他解夜奶呢,真失禮!

以這個時間表來看,食兩餐粥仔的話,他便只會早晚埋身食,6個月時到健康院,姑娘曾這樣說:奶奶對6個月以上的bb來說,已經變了副食品喇,他主要的營養來源,其實是來自其他天然的食物啊!

這個疑問,各位有經驗的部落媽媽,可否幫吓我呢?

買車

天天日漸長大,體重亦隨之而不斷增加,每日來回元朗屯門,單靠孭帶,背脊已開始投訴了,尤其出現在婆婆身上,因此早幾日已安排天天坐士的車了!

起初怕他脊骨未成熟,驚有影響,但見他坐下時又冇特別啊,因此都係開始用了!

今日婆婆表示要買架學行車放其家,原因係天天不喜歡獨處,當見到剩下自己一個時,都會大哭,婆婆試過好多方法都不湊效,所以唯有孭住佢,但天氣漸熱,咁孭洔都唔係辦法,所以婆婆向我申請要買架學行車啊!

其實我一直都唔想俾佢坐,健康院姑娘都話唔好,但要我媽湊孫得黎都可以做到家務,呢個係唯一辦法,唯有請我媽在空餘時多陪他玩,盡量在有需要時才坐吧!

應否食奶咀呢

近日朋友向我表示,將會讓她的4個半月女兒食奶咀,教她自己睡覺,一直都冇打算讓天柏食奶咀的我,便問她會否担心bb不懂分辦奶咀只用來睡覺用,使她其他時間也嚷著要食奶咀呢...

她表示其大女也是這樣,又未見她有混亂,所以大概唔會出現我担心的情況啩.

其實我也不知道我的担心是否有理據,但我媽媽不停說,若可以就不要給天柏食奶咀,免得他依賴.

但,若他要睡,到現在仍是要人抱及氹呢.

莫非厭奶?!

今日天柏只係食左4餐咋......8am,1pm,6pm,11pm......

有冇事呢???莫非厭奶???

髖關節

1月24日到健康院見醫生,醫生話天柏個髖關節比較緊,轉介到骨科,醫生話可能係佢嘅骨頭有事,又或者係韌帶有事,又或者咩野事都冇!!!

咁啱我31/1就返工喇,初時打算安排老公同奶奶去便算,但考慮到天柏食奶嘅情況,所以同老細申請攞半日大假,真好!

醫生話唔知骨科會唔會轉介去物理治療,依家未有任何治療前,我地可以多d同佢運動吓個關節,又或者多d用孭帶孭佢,等佢擘大個大脾,可能都會有用!!但我覺得好似擘到好大咁!!