母親節快樂

星期日,是一年一度的母親節,一個我第一次,以及往後每一年我都有份過的節日!感覺好特別!!

去年,天柏正在肚子裡,所以當時我對這節日沒有太大感覺...

做女時,每年都會為節日想點心思,希望讓媽咪開心!通常都會想:今年送咩野俾佢好呢!小時候送過康乃馨,自製的咭,家政堂整過旦糕,到出來賺了點錢,便選擇送頸鍊,耳環,按摩器...但從來都冇講過一句--我愛你!

每次為天柏換尿片,沖涼,玩耍,都會珍惜機會與他有身體接觸,讓他直接地感受到我愛他,錫他!因為我知道他是個男孩子,長大後他會擁著別的女子多過我!這是正常不過而我又控制不了...

又或者從母親的角度看,母親節是不是一定要送禮物來表示呢?做了母親的我,才會答--不!

可以選擇的話,我希望我兒可以好像外國人一樣,可以用擁抱及說話去直接表達--媽媽我愛你!

試試身教的方式吧,今年由我做起,每年都做一個示範,讓我們都可以好真好直接的去表達關心及愛!

順祝各部落媽媽母親節快樂!

騎騎騎!

肥到...轉唔到!!

俾心機呀!!

boo...口水花四濺

開心小豬豬

黑白配!

天柏與太嬤嬤~黑白配!!!

第一口solid food

天柏5個半月大喇,今日開始俾佢試食第一口米糊,用2安母乳開1湯匙米糊,因為好似稀得濟,所以加多米湯匙米糊,開始時用了隻細膠羹餵佢,但餵左幾口後,佢唔耐煩,開始扭身扭勢同發忟憎,因為俾佢食得太慢...之後改用湯羹餵,情況有改善,唔使5分鐘佢就好順利咁食晒,仲唔夠喉呢!!



所以聽日我會開2湯匙俾佢食,睇吓佢食成點先!!

我自己試過d味...唔錯喎,甜甜地,幾好味同易入口,好過只係飲坐暖的母乳!!!

痛苦...

痛苦...因為4月嘅天柏相及短片,被我...delete左...

手多按錯相機制,format左張咭,同事幫我整過,也不成...

無耐,心痛,傷心......

八卦仔

5個月嘅天柏,食奶開始唔轉心,食一陣就會眼仔碌碌咁望住我,之後叫極都唔係太願食!!呢個情況通常出現o係早上起身個餐奶度!另外,可能吸吮能力有進步,呢排食奶佢都好大力咁啜,有時仲o係度玩玩吓,要嚴厲地喝止!!都唔知佢第時出牙仔時點算!!

另外,八卦仔上身,逢親身邊嘅人傾電話,佢又會眼仔碌碌咁望到實,到果個人傾完,佢先會望去第二度!!攪笑!!

另外,係未得天柏同意下,將其沖涼過程曝光..........呢個階段嘅bb,係任人擺佈呢!!
肥仔出場喇

嬲...還是未瞓醒咋!!!

醒...醒...醒!!!

5個月

天柏5個月大喇,前陣子,佢晚晚食夜奶,攪到我好辛苦,試過淨係俾水佢飲,但佢唔肯再瞓番,困獸鬥落去只會攪到我同族長有精神返工,所以唯有出此下策,冇計!!!

早前又冇端端FORMAT左張SD CARD,攪到入面D相冇晒...依家試吓整唔整得番!!希望得啦!!

呢個月,我覺得天柏叻左好多,當我地叫佢,佢好快應我地,雖然成日塞對手入口,仲俾D指甲整損個咀,但佢又好似玩得好開心咁,所以我地都冇阻止佢,另外佢好想翻身,但仲差少少,努力呀亞仔!!

最近佢好好奇咁望住我地食野,試過將食物放到佢咀邊,佢開口想食咁,佢應該開始對食物有興趣,過埋呢個月啦,你就可以試食固體食物喇!!

冰奶嘅營養

究竟三個星期前所留嘅冰奶,營養成份係咪滿足到三個星期後大嘅bb呢??

復活節期間,每日埋身餵天柏,發現佢d大便比之前"杰",每日如是,但假期後,佢就要飲番三個星期前嘅冰奶,大便又變番稀喇,而且有d扭計同食完都唔係好願瞓!

婆婆就提出左呢個問題......但要自己棄掉超過15包嘅冰奶,實在好唔舒得啊!!!

復活假期

一連5日的清明及復活節假期,嘩...咁快就完結喇,雖然拎左一大堆文件回家做,但都爭取每一刻同天柏相處嘅時刻,尤其5日都埋身餵,簡直令我同天柏都為之享受!!呢幾日佢都不知幾乖,笑容又多,食完奶唔太扭計就好快瞓左...其實我相信係因為次次都埋身食,令佢比較疲倦呢!!

聽日因為要同族長去銀行,所以都攞埋假期,過埋聽日,天柏就要食番冰奶喇,而我又要過番每日只可早晚埋身食,其餘時間就要泵奶嘅日子,哎呀,好唔想咁呀!!!

呢個假期,天柏嘅玩意之一:噴口水...

10/4後記:今日發現有技術上問題,所以片段擇日再upload!!

應否食奶咀呢

近日朋友向我表示,將會讓她的4個半月女兒食奶咀,教她自己睡覺,一直都冇打算讓天柏食奶咀的我,便問她會否担心bb不懂分辦奶咀只用來睡覺用,使她其他時間也嚷著要食奶咀呢...

她表示其大女也是這樣,又未見她有混亂,所以大概唔會出現我担心的情況啩.

其實我也不知道我的担心是否有理據,但我媽媽不停說,若可以就不要給天柏食奶咀,免得他依賴.

但,若他要睡,到現在仍是要人抱及氹呢.

大B

一日,在診所等見醫生期間,坐在我身旁有位媽媽抱住她的小可愛,我倆對望一眼後,她便開口問到...

媽媽:"你個BB幾大呀?"

我答:"4個月多DD!"

媽媽:"嘩,唔似喎,好大個咁呀!!"

我答:"係呀,佢生得比較老積D!你嘅BB呢??"

媽媽:"7個幾月喇!"

我:".................."唔識回應佢,唯有將注意力放在兩個BB身上,叫佢地兩個一齊玩!!

由天柏一出世,"老積"呢個詞語我已經聽慣聽熟,一直都以為,天柏係個外貌生得比較大個一點,所以別人才會有咁嘅回應,到我見到呢位太太的BB,佢話俾我聽佢個BB已經7個月大,我才知道,天柏的身形已經同一個7個月大嘅BB差不多喇,幾乎佢地兩個係一樣大小呢!!

唔知,同佢每餐幾乎飲成8安奶有冇關呢!!4個月到健康院磅豬豬,16磅呀!!勁!!!

小天天大長征

屯門與元朗,地圖上的距離,不遠,但婆婆,天天(這是我細佬對天柏的稱呼)以及我同族長,每人每日就要花上兩個小時的來回車程,才可以讓我地兼顧到家庭同照顧"天天"!!

每日,婆婆會先花上一個小時搭車到我家--屯門,然後又花上一個小時搭車回家--元朗!!

每晚,我同族長都會各自花上一個小時搭車到元朗,食晚飯同接天天,一家三口又花上一個小時搭車回屯門!!

很疲累!!

當中的罪魁禍首,我個人認為,是輕鐵也!!這個交通工具,竟然要用最少45分鐘才可以由屯門去到元朗!!計埋等車,最少要1個小時啊!用小巴做例子,由屯門開往上水的小巴,由上車計,30分鐘便可以去到上水了,有什麼理由輕鐵會這樣--慢!!

要改變"小天天大長征"呢個現象,要改善"我們這一家"每日的長征,唯有--搬!!

而呢個大長征項目,相信到了6至7月便可以結束了!!

族長的無知......

一日,電視機突然傳來:"6個月大嘅bb,需要更多DHA,AA同......,XX愛兒樂就含豐富嘅營養,配合BB嘅需要,係時候轉食喇......"

當廣告播完後,族長就話:"BB就快6個月大喇,係時候睇吓幫佢轉食呢D奶粉喇,有DHA,AA同......喎!"

我.................突然唔識答佢!!因為我唔知,原來佢唔知啊!!

老公,你個仔一路食嘅母乳,已經有豐富嘅DHA,AA......嘅營養喇,其實係比奶粉仲要多同適合你個仔食架,無端端叫我放棄,唔係呀!!!

環保

為環保出一分力,人人有責!!
我地應該少d用冷氣......

我明白,但唔知點解,好怕潮濕!!!

每當見到天柏食奶食到成頭汗,我都會向族長提出:"可唔可以開冷氣呀!!"

今晚,願望終於達成,因為有25度呀,又有d落雨,濕度仲係91%!!家住海邊,真係濕到冇命!!

莫非厭奶?!

今日天柏只係食左4餐咋......8am,1pm,6pm,11pm......

有冇事呢???莫非厭奶???

可愛小寶寶

3月24日

第一次自己翻身!雖然仲未識將另一隻手抽出黎,要我地幫幫佢,但佢都好俾心機去翻,好抵錫!!



第一次要佢自己o係張床度瞓,唔使抱住先瞓,都尚算成功!!



第一次著短袖衫,但因為呢幾日佢打左針,好似比較忟憎,所以都攪到自己成頭汗!!



除左呢D第一次之外,呢幾日佢仲學識好大聲咁用喉嚨黎發聲,近乎尖叫,尤其佢扭眼瞓時仲嗌得大聲,又唔知做咩野,成日將隻權頭塞落口,仲成日雙手捉實自己件衫!!



嘻嘻,媽咪對於BB每一個新動作都好有興趣,百看不厭呢!!

個市真係咁好?

最近睇左好多次樓,其實睇來睇去都係同一個屋苑,不過睇唔同單位,期間有兩個我地都有還價,但一個就突然封盤!!由初時開價$180M,到突然話:冇$200M都唔使黎睇!!!另一個就開價$185M,還到佢$182M佢都唔肯,企硬$185M!!

樓價,從來都係由市場去決定佢嘅價值,所以97年嘅樓,咁貴都有人買賣,你話佢實質值唔值咁嘅價錢??發展商就一定唔使用咁貴嘅價錢去起啦!!

依家睇緊嘅屋苑o係元朗,樓齡3年,屬於近年元朗較大型嘅樓盤,平均依家賣緊$3000一尺!!我已經冇去諗佢究竟值唔值呢個價錢,我只係想問:差個幾萬蚊都唔肯去成交,唔通個市真係咁好??有價冇市咋!!!

4個月喇!

4個月,天柏又係時候去打防疫針,今次同兩個月時打五合一嘅表現一樣,打完之後好疲倦!!!除左食奶,其他時間都係瞓,瞓,再瞓!!!由於有少少鼻敏感,醫生俾左少少藥水佢食,又係好似之前咁--食得好滋味!同埋個藥水樽好似寫住:"服用後會使人疲倦"嘅字句,所以佢就更加好瞓!!!



打完針嘅第二日,就去健康院做發展監察,磅豬豬有7.3kg,勁!!有成16磅,唔怪得族長成日話孭住佢好辛苦,原來份量十足!!護士姑娘話D母乳只要弄到好似普通凍開水嘅温度就可以,暖都會破壞到D抗體,攪到天柏婆婆好唔開心,因為佢話每次D奶都會有暖嘅感覺先佢天柏食,我唯有安慰佢:"冇抗體但都好有營養架,你睇佢重得幾好!!"佢先至開心D!!睇黎佢都有少少壓力!!



見天柏重得咁好,依家打算餵到冇得餵為止,有D野自己都控制唔到,包括工作,如果工作配合唔到,唔可以泵的話,就可能被迫停止!另外,原來個仔好咀刁,有番3個星期嘅奶,佢唔係太肯飲,會扭來扭去,將個奶咀頂來頂去,最後族長同天柏婆婆一致話:"你仲有咁多存貨,就將D過左3個星期嘅奶掉左佢啦,反正佢都唔肯飲!!!"



今日,望住過左3個星期嘅7包分別每包係6安半-7安嘅存貨,要好忍痛咁...先可以將佢地掉入垃圾桶!!!掉之前仲問吓族長:"佢真係唔肯飲咩???"



依家真係好明白,個D商人要放棄佢地D貨嘅心情......

沖涼...原來都可以好爽架!!

"婆婆同我沖涼一段時間涼之後,我唔驚喇!!!"

自從我返工之後,我同族長都好耐冇幫天柏沖過涼喇,睇婆婆幫佢沖得爽,真係唔鬼抵得佢個衰樣!!你就黎肥到個盆都坐唔落喇,亞仔!!!

媽咪最開心

媽咪最開心嘅,就係見到bb好開心咁...笑!!!!

3個月3星期..岳起個頭高過之前喇

過左兩個星期,天柏岳高頭嘅能力好左喇!!

亞旺

亞旺look!

媽咪,我唔要亞旺look呀!!

投訴!!!

喊住講bb話...有好多野要投訴咁!!

食手

好味的...手!!

玩車仔

為住搬屋,這陣子放工就約地產經紀睇樓,都好疲累...睇啱一個,但價錢唔理想,再睇,自己又唔鐘意,依家唯有再等時機啦!!

仲有幾日天柏就4個月喇,由3個月到4個月,佢表達多左,成日講bb話,又成日將對手放入口,無論食飽或者未飽,佢都有呢個動作,近呢個星期,噴口水嘅情況嚴重,呢個遊戲對佢黎講,簡直好玩到極!!更甚嘅係,當我地抱住佢,佢就會"食我地件衫",攪到個個抱完佢之後,件衫都會有好多個口水印!!!




呢個係公公&婆婆同佢玩嘅開心樣!!!!

睇樓

自從放完產假後,湊b嘅重任就交到我媽咪身上,最初協議好,佢每日朝到我家帶天柏走,我or族長收工後就去佢度接天柏回家,但每日的上上落落,實在令我同我媽咪都感到疲累,尤其當我每日只有大約5個鐘嘅sleeping hour,就更加痛苦!!

間中我會邀請媽咪留在我家照顧天柏,但又令到佢覺得不便之餘,我就要好準時收工返屋企接佢班,等佢唔使咁夜先返到自己屋企,咁又出現問題,因為有時唔係想準時走到就走到!

所以,最後決定,都係搬近媽咪處,為此,我地帶住天柏睇左幾次樓,都幾疲累,因為佢都幾重,又因為健康院冇安排我地3個月時返去磅重,所以我都唔知佢依家幾重,但已經大隻到要用中碼尿片喇,等我揾日放假,帶佢去健康院,問吓姑娘可唔可以幫佢磅磅先!!

依家仲o係還價階段,順其自然吧!為左小朋友,父母真係會選擇"供樓"呢條路呀!

令人笑騎騎嘅筒子

記得軒軒大約3個月大時,佢老豆就俾左個大筒子佢睇,睇到佢入晒神!!

今日,天柏都到左3個月,我即管又試試呢個大筒子嘅威力,一試就有新發現,俾佢睇"一筒",冇咩野反應,只係望住,跟住將點數遞增,去到"4筒"時,開始笑,見到"5筒"笑得仲開心,到"6筒"之後嘅點子,仲笑到卡卡聲,我同老公都係第一次聽見佢笑出聲咋,兩個人即時同佢一齊笑到卡卡聲!

真係一個令我家三口開心左成晚嘅筒子!!

鳴謝軒爸嘅推介--開心家庭網

3個月零6日

好俾心機去盾岳高個頭!

引BB笑開始有D難度,引左好耐先笑,

仲要好識得捕捉時機添!!

特別鳴謝AUNT KIMMY送俾天柏的可愛衣服!!好CUTE呀!!

嬉皮笑臉

放大假期間因為有個會要開,所以無奈地要安頓天柏到婆婆家,同時要飲兩餐冰奶,當我上到車,正等待著開車之際,突然收到同事電話：個會唔使開喇......

哎吔,好端端原本今日可以餵足天柏一日架,依家就要佢食兩餐冰奶,勁唔開心啊.

下午去到婆婆家,佢已經飲完第二餐冰奶,我只好等佢再肚餓時埋身餵,同時泵番幾安出來做儲備.

最近我媽媽話佢好厚面皮,鬧極佢都唔喊,仲四萬咁口對住你笑,今日我又試吓,果然真有其事,個樣有d嬉皮笑臉,但又好似唔多明你係鬧緊佢,定係扮野當聽唔到!!希望佢係聽唔明啦,如果真係嬉皮笑臉,咁就惡教喇!!

3個月,即係93日人仔喇!

多謝各好友的新年祝賀:祝天柏快高長大,聽教聽話!

頭先睇番佢出世d相,個心好甜,真係唔想佢大得太快啊!!

新年前後

未過年之前,見到天柏開始甩毛!!起身之後見佢個墊頭巾有好多頭髮!!!情況持續,未知幾時完結...

由年卅陪住天柏到年初三,今日要返工喇,好唔捨得呀!!又開始每日離開個仔起碼8個半鐘嘅日子喇...

對唔住呀...天柏!!媽咪剛才好唔小心地,倒奶到奶袋嘅時候,倒瀉左1安奶呀...好肉痛!!

我對自己餵母乳嘅成績好滿意,睇吓天柏個肚腩幾勁就知啦!!

全家福

第一張正正經經嘅全家福,拍攝於2007年2月14日......
我同兩個情人一齊過!!
我都可以享"齊人之福"啊!!!

豬年最感動嘅祝福

多謝藍mama豬年嘅祝福,係我今年收到嘅最想,最感動嘅祝福!!!

對於我呢位"母乳媽媽"黎講,"長餵長有"簡直係一個豬年最大嘅願望!!多謝你呀!!

就住世衛建議以純母乳餵bb最少6個月,我已經餵左天柏90日喇,即係已經行左一半,距離目標仲只有一半路咋,我會加油呀!!!

豬年豬豬豬

天柏同我都期待著的第一個新年,就快到喇!

族長同事送來一套中國服,但仲未啱著,可能要到出年先可以亮相啊!

希望各個鄰居都開開心心同小b享受第一個農曆新年呀!!

仲祝願呢班狗仔bb個個都咁精靈活潑同可愛!

個個都要健健康康呀!!

恭喜發財!
爸爸媽媽豬年要發過豬頭!
做個肥肥白白嘅健康豬!!
仲要做個開開心心嘅happy pig!!!
最梗要係好似豬豬咁:食得,瞓得,同玩得!!!!

我會做好呢份工

族長同事forward來的爆笑mail,可以讓生活多一點歡樂!!

"朋友傳來的:....
曾特首角逐連任搵左「我會做好呢份工！」做競選口號

如果換轉其他行業或者其他人應該會咁講：

地盤佬：「我會鑽好呢個窿！」
氣功師：「我會發好呢次功！」
八達通公司：「我會整好八達通！」
天文台：「我會測好呢個風！」
整容醫生：「我會隆好呢個胸！」
鐘錶師：「我會整好呢個鐘！」
廚師：「我會爆好呢碟蔥！」
麻將腳：「我會碰好呢隻東！」
xx公司的專業員工：「我會五點九就鬆… …」 "

對於我黎講,為左趕住返去餵天柏,所以『我會五點正就鬆』!!哈哈!!

後記傳來,原來有好多網友都收到呢段"騎呢"野,仲足本好多呢!!例如pigbon,丁丁都有提及!!延續篇如下!!

海關︰「我會睇實呢個zone！」
妓女︰「我會走多轉私鐘！」
富豪雪糕︰「我會斟滿呢個cone！」
陳曉東︰「我會跟番戴思聰！」
火化︰「我會燒好呢副bone！」
士兵︰「我會好好地進攻！」
我︰「我會不停發up 風！」
食客︰「我會食埋呢碗檬！」
靚女︰「我會請佢食檸檬！」
肚入面既bb︰「我會離開呢個womb！」
學外語人士︰「我要學好靈格風！」
寶貝智多星kelvin︰「我會再次home alone！」 長
毛︰「我會競選新界東！」
賊仔︰「我會搜掠個一空！」
學生：「我會還晒d grant loan！」
足球員：「我會打好d前鋒！」
打工仔辭職時：「我會辭左呢份工！」

好忙碌但好滿足!

自31/1復工後,就忙個不停,除左要重新投入工作外,1/2天柏仲要入院照x-ray,4/2

就再入院照超聲波,黎confirm佢個髖關節有冇事,攪完一輪之後,終於確實咩事都冇,好彩!!

到左呢個星期,帶佢去打防疫針,今朝就發燒喇...

每日都好趕咁出門口,又好趕咁返屋企,之後又好夜咁餵佢食奶瞓覺,老公都佩服我點解會有用唔完嘅體力同精神...咁個咪係亞媽囉!!

最近天柏開始識得食手指,扭眼瞓嘅時間俾之前長,開始識得認人,鐘意我抱多過族長抱,攪到佢好唔開心,咁都冇辦法啦,佢扭計唔肯瞓時係做亞媽嘅處理多,做亞爸嘅...通常一早就大覺瞓囉!付出同收穫o係呢個情況下係成正比的!!