弟弟

哥哥的禮物--自家梳化床，日間返學期間，做了弟弟的午睡床，兩個月的弟弟好似好長咁！

好鐘意你的包包面！

精靈弟弟

這是這舊『飯團』，最精靈的幾張照片，圖二可見其『雙下巴』同『肥頸』係堅野啊！

和你在一起，真好。

劉翔在復出一戰中，臨跑被鏡頭影了一個模樣，被天天攝錄在腦中，每次叫他『扮劉翔』啦，他便會這樣！

自從上學後，只有星期六日是假期，對要輪班工作的我倆，實在少了時間可以陪天天玩，爸爸好不容易這個星期六放假，趁著我還未復工，放下弟弟，帶著天天三人行外出逛逛，天天報以『好開心呀』，問他點解，他說：『因為有爸爸媽咪陪囉！』

聽後好甜之餘，亦覺得有點肉赤，真的要好好珍惜能夠與家人相處的時間啊！

不睡

11時10分，現在已經夜深了，

我倆相處的8週2日裡，你是第一次在這個鐘數，仍然睜著燈籠般大的眼睛對著我。

10時半已將你餵得飽飽的，至少是你自己不吃，

以為可以一同入房進入夢鄉，誰知你一躺在床上便醒過來，

你爸又搖又un又行，但你怎也不放過我們。

『老婆，佢好似又想食奶奶喎。』

『老公，15分鐘前係佢自己食到唔食喎！』
(係你自己想瞓就交佢俾我咋！好吖，又即管試吓佢係咪肚餓！)

『老公，佢唔肯食喎，嗱，你自己都睇到架啦！』

老公冇辦法脫身，唯有繼續他的又搖又un又行......

這次任憑爸爸如何如何，他都睜著大眼睛，

我叫老公放低他，讓他嚎哭一會再食點奶再睡吧，

呵，你竟享受躺下來，已過了15分鐘啊，仍然一聲不響，

你想點呢？

81.5安冰奶

為你，至今我儲了81.5安冰奶，若果每餐你要食4安才滿足，那暫時已有20餐，若我不在你身邊你每日要食3餐的話，那差不多已有7天的糧食了，希望我返工期間，你嘗過冰奶後，仍會報以這個滿足甜美的笑容。

12點3點5點7點...

8週大的你，仍然要兩三個鐘找奶奶一次，勁餵勁餵讓你變成大隻BB，那雙大脾一節節，雙下巴頸項打晒摺，呵呵多趣緻。

近這兩週，大個仔開始要近人了，除在晚上仍能自行熟睡外，日間常要抱住，抱著你搖，抱著你拍，抱著你un，要人行要人企，坐低也不行，這就是你。

明明食住奶奶瞓著了，坐起來拍背掃風便睜開雙眼，是知道我下月便要返工不能日日夜夜相陪所致，還是覺得我太肥要幫手呢？

是啊，下月中便復工，但你仍然在夜裡每兩三小時叫醒我一次，12點3點5點7點......叫我怎樣好？

這夜你們都累了。

我勁抱都攪佢唔掂，爸爸一抱就瞓！

睇緊DORA都瞓得著，你真係好眼瞓喎！

放工後攪完大細的男人，謝謝你。

這夜，只是享受獨個兒洗澡10分鐘，出來見那三男子...這個情況若在日間多出現...便好！

大細眼

唔知係咪食得奶多，出現眼蓋水腫情況，理應有明顯的雙眼皮，但右眼的雙眼皮仍然腫起，出現大細眼情況，唔知大個仔D嘅時候會唔會正常番呢，還是一路都係咁，大細眼呢？

new born片咁快唔啱用??

幣，今日發現new born片好似好細條咁，已經漏尿漏左幾次喇，仲有包半喎！

不合穿的夾衣

你下次到健康院檢查是10月初，因此還未知道現時的實際體重，我估都超過10磅了。

看著那些不合穿的和尚袍，感到好欣喜，

看著那些原是長袖的夾衣，漸變成短袖，覺得好有成功感，

我下月中便復工了，早在上週開始便為你儲量，

成績理想，現在已有約10數包3安了，

婆婆表示3安一餐可能不夠，估計你一餐要飲4安啊，

所以現在只好儲些1安。

重拾夜奶

弟弟出世至今，對天天最大的影響，是重拾『食夜奶』一事，

每當夜深人靜，被弟弟嚎哭弄醒後，

都會要求：『我要飲奶奶呀』。

昨夜被弟弟弄醒兩次，飲過第一次後，

我告訴他：『飲埋呢次之後，就要到太陽伯伯出黎先可以再飲喇。』

他迷糊地答『知喇』，再大覺睡。

第二次被弄醒，已忘記答應過我的事情了，

我唯有說謊：『D奶奶沖晒喇，聽日買過先有得沖俾你飲，快D瞓啦。』

誰知他哭著道：『等我睇吓先啦，睇吓係咪冇啦！』

幣，被拋了一道添！

唉，我只好乖乖就範，給他沖5安後讓他再入睡。

當初，弟弟回家後，聽到他第一次的要求，

我認為他因為弟弟的到來，而感到不安，

所以要求飲奶以得安慰，

現在可能都因這個原因而作要求，

但如果每次被弄醒就要飲奶才能續睡，

那似乎是個倚賴了。

對自己的信任

每日，公公都帶他到樓下平台，玩上一個鐘以上，與其他小朋友追逐快跑，欲借你的玩具時，自己的又不會讓予他人，原來個個細路都是這樣！

每人帶著自己的私家單車，在平台『打圈』，情況有點像『小兒格蘭披治賽車般』，間中公公要充當紅綠燈，又要扮交通警，亦要擔任停車場管理員，都幾攪笑。

這個地方，打從他6個月開始便日日到訪，每一個角落每一個設施都已是他的好朋友，由跳1級樓梯，至2級，3級，最返還大胆到跳4級。

大個仔開始對肢體有一定信任，因而做出以上被爸爸認為是『危險』的動作，我反以因此覺得，他又大個了一點啊！

父母惡攪

父母惡攪，將兩個睡熟的放在一起。

突然，被大的識破，一手將小的推開......
這，是兄弟。

註：請放心，小的沒有絲毫受傷，一直被那貪玩娘托著肩膊啊！

笑

仍然...喜歡你...笑。

心軟

發燒的你，乖乖的留在公公婆婆家，好讓弟弟不致感染。

昨夜雖已退燒，但情況反覆，欲讓你留多一日好好休息，

『不如你今晚繼續留o係公公婆婆度啦。』

『我要返屋企。』

一便說一便入房推自己的BB車出來，

『出面行雷閃電落大雨呀，公公婆婆都好驚呀，你o係度陪佢地啦。』

想了一會，『我要返屋企』，

『公公婆婆驚喎，你唔陪佢地咩？』

『公公陪婆婆咪得囉，媽咪都驚架，我陪媽咪！』

就是你這樣的一句，使我心都軟了，好吧，你想點我都會應承啊。

弟弟，我錫晒你！

不少奶媽都表示，最期待同最開心的日子，就是帶著小寶貝返健康院見姑娘，我也期待著這個『1個月覆診+打針』的日子很久了，當然最想知的，是小寶貝的體重，足以反映奶媽是否有足夠糧食供予小寶貝，所餵的方法和技巧是否正確，為繼續餵哺給予最大最強的動力。

今日，姑娘所派給我倆的成績表，簡直出乎意料，在車上我與你爸還打賭，誰會猜中你的體重，我們估你大概會有7至7磅半吧。

緊張的上磅時刻到了，帶著赤條條的你放在電子磅上...

聽到的讀數是--『4.11kg』！！！

我立時伸長頸項，用自己雙眼望真些，確實見到『4.11』這組數字在閃著！

出世時的你，只有5磅1安，經過這個月來的努力，你已遞增至9磅了。

我倆被你的意外嚇倒了，一邊替你急急的穿回尿片衣服，一邊咀巴也合不上地稱讚你叻仔。

你給我的成績，已解開了我這個月來的擔心，同時亦為我帶來無比的信心，每兩小時叫醒我，雖然確係辛苦，但非常值得。

我倆還一同被護士姑娘讚啊，弟弟，我錫晒你！

無題

各自有各自的『梳化』，鳴謝叔叔嬸嬸。

趣聞一

主角：天天、婆婆

婆婆：『我可唔可以同你一齊坐呢張梳化呀？』

天天：『唔可以呀，因為你個pat pat太大喇，坐唔到落黎呀！』

趣聞二

主角：天天、弟弟(媽咪代問)

媽咪：『弟弟想同你一齊坐呢張梳化呀。

天天：『唔得呀，佢個pat pat太細喇，坐唔到架。』

******************

弟弟心想：『呢兩個傻佬o係度做咩野呢？！』

弟弟：『啊，原來想影相，影我啦影我啦！』

催奶良方

弟弟滿月，與家人食飯慶祝，和老公商量，認為不如讓弟弟食餐冰奶，好讓方便招呼家人，但一直都是埋身餵，不知弟弟一餐其實食多少安奶，今早試著一邊餵奶，一邊泵奶，看看弟弟食一餐奶，大概會食多少。

弟弟至今的食奶模式，大概每兩小時食一次，多數只食一邊乳房的奶，每次由10分鐘至30分鐘不等，隨他意願。試過幾次都叫他食埋另一邊乳房的奶，但其脷仔已向上頂實，不肯吸啜，所以都無謂勉強他。

滿以為『點都會有3-4安掛』，誰知一邊食左，一邊吸右，呵，只有1.5安。

吓，原來弟弟每餐都係食咁少。

吓，原來我的乳房只是製造出如此少的母乳。

是否應該由明日開始，進行『儲奶大行動』呢？

不然，復工後，弟弟食咩野呀！

各界奶媽有沒有催奶良方呢？

誰是誰？

兄弟滿月競猜(冇獎)遊戲。

滿月喇

滿月喇！

看著你長肉

不眠不休的餵哺母乳，使回家時仍是『皮包骨』的乳鴿弟弟，至現時(未滿月)已有『雙下巴』，為娘除了在『磅豬豬』時獲派成績表外，每日看著你由『面尖尖』變成『包包面』，已經好滿足。

奶媽的時間

早上10:55，開始食奶，

食15分鐘，跟住是一輪掃風，換片，

安頓在床上繼續小睡，已是中午12時。

每兩小時食一次奶，下餐開餐時間是下午1時，

拉著老公落樓，用一句鐘完成我們的午餐，

以及到超市掃點日用品，

準時下午1時返上樓，

他已被婆婆抱住，睜大眼睛，等著食奶。

這餐用半小時完成，

接著又是一輪掃風，換片，安頓小睡，

下午1時45分，致電髮型師，

『你忙嗎？我2點前黎到，但時間冇多，2點半前要走，得嗎？』

多得他快手快腳，下午2時30分準時離開，

隨即致電老公：『佢瞓醒未呀？』

『一早瞓醒喇，好似想食奶，我依家抱緊佢，應該仲可以挨多一陣嘅。』

一支箭飛返屋企，抹個汗，再餵奶。

奶媽的時間，多寶貴。

同學仔確診豬流感

天天學校，K2班一學生，昨日確診患了『豬流感』，

學校停課至31-8-09，

1-9-09再開學。

天啊，『豬流感』每日都在我們身邊走來走去，

好像好可怕啊！

連環拍，連環照

瞓

懶瞓弟弟。

笑

喜歡看著你...笑。

攪野

『坐月』日子快將完結，也就是老公放完大假，完成『陪月』的日子。

『陪月』期間，老公逢星期三都要返工，也就是我一週最悶的一天。

可以預期，老公重返工作崗位後，我每日都會這樣悶。

要搵D野攪吓先得喇...

順利的返學旅程

18-8-09開始，天天返學的時間，增加至9am-2:30pm，即是由食早餐到瞓晏覺，都是在學校裡。

學校的午餐時間是11:45am，高老師話天天第一日食了很少，公公解釋是因為平日12:30pm才在家開餐，但小朋友適應力強，第二日天天問了高老師『係咩野黎架』同『好唔好食架』之後，得到高老師滿意回覆的他，便將全份午餐放進肚子裡。

如是者，天天每日都可以自己食晒份午餐，都算叻仔。

昨日是第一日在學校瞓晏覺，估不到天天都能入睡，是我意料之外啊。

每晚要以潛移默化的方式，重複告訴他：
『聽日返學食早餐喎，上完堂就會食茶點，玩一陣玩具就會食午飯，要試吓好唔好食喎，食完午飯就瞓晏覺，瞓醒爸爸就會黎接你放學喇。』

每次都好唔專心咁聽我講完後，循例回答『哦，知喇。』

見他返學沒有大叫大哭，每日開開心心地出門口，開開心心地跟老師入課室，放學後問他『返學開唔開心呀？』，他都會答『開心』，我想他應該適應得不錯吧。

幼兒班返一至五全日，六返半日，與老公商量過，一至五都已經返全日，六就讓他休息吧，也讓一家人多一個去街的選擇吧！

好無癮的媽咪

天天在公公婆婆家隔離期間，

早上，

媽咪打電話俾佢，

婆婆話：『天天，媽咪打黎呀，同媽咪傾吓計啦。』

天天答：『我唔講喇，你同佢講啦！』

媽咪~~~~~啞左。

晚上，

媽咪再打電話俾佢，

婆婆話：『天天，媽咪打黎呀，要同媽咪講電話架，快D黎！』

天天答：『喂，媽咪呀，我睇緊KITTY呀，(DEAD AIR)~~~』

媽咪隱約聽到個電話遞左去第二個度，

有人話：『公公，我唔講喇，你同佢講啦！』

媽咪無癮無癮好無癮，都係攬住弟弟實在D。

好掛住個仔的爸爸

天天在公公婆婆家隔離期間，

早上，

老公問：『唔知天天瞓醒未呢？咁早可能未瞓醒喎。』

老婆答：『梗係起左身啦，你掛住佢咪打電話俾佢囉。』

中午，

老公問：『唔知天天食飯未呢？』

老婆答：『你係咪好掛住佢呀，你不如過去亞媽度陪吓佢啦。』

老公飛快答：『好呀，我好快返黎陪你。』

老婆心諗：我使咩野你陪呀！！

晚上，

老公問：『唔知天天瞓醒晏覺未呢？』

老婆答：『老公，你唔好問我喇，你不如依家過去亞媽度啦。』

老公好無耐咁被老婆鬧~~~

老婆再鬧：『你過到去，佢又要話跟你返黎，咁點吖！』

老公冇心機話：『咁我唔過去囉。』

老婆打電話俾亞媽，

亞媽話：『你老公晏晝應承左天天話今晚會過黎喎~~』

老婆大叫：『老公，你係咪應承左個仔話你今晚會過去架，咁你仲唔快D去，應承左就唔該你真係做啦，講D又唔講D。』(激死！)

****************

翌日早上，

老公問：『唔知天天起身未呢？』

老婆~~無氣再答佢喇！

有6磅喇！

弟弟到健康院磅重，

尤如媽媽派成績表般，

今日到健康院睇黃+磅重，

本以為週三才磅完，

今日就算有進漲，成績也不會太明顯吧，

呵，竟然來個驚喜啊，

2.73kg，弟弟已邁向6磅了。

哥哥返學第六日便病了。

哥哥返學第六日，

老公接放學時，聽到高老師向另外兩位家長說，

『佢地兩個今日好多鼻涕喎，要睇醫生喇。』

老公如常帶哥哥到公公婆婆家，

亦請他們留意哥哥有否不適。

下午5時許，接到公公來電，

『佢下晝瞓覺時有D鼻塞喎，瞓醒後對眼又流眼水。』

那便要看醫生了。

****************

校長在orientation時表示，小朋友初期返學，會較容易生病，可能因為要適應新環境、又同一時間與較多小朋友聚在一起有關，

這點我完全明白，

但我又唔明，家長帶子女返學時，理應見到他們不適吧，『流好多鼻涕』總不會是返到學校才出現吧，為何仍要安排他們返學呢，知否現時是流感高峰期呀，自己子女不適還要返學，好辛苦喎，何況還會傳染別人呢！

哥哥這幾天要在公公婆婆家隔離了，怕會傳染到只得兩週大的弟弟，

哥哥，你要加油同快些好番啊，媽咪等你返屋企呀。

小手小腳

喜歡，你的小手，你的小腳。

就是，喜歡你的一切。

就是，喜歡你的所有。

就是，喜歡你。

哥哥弟弟

老公今日去晒相，

回家整理相片期間，

發現兒子出院回家後，

都被我們拍攝了一張這樣的相。

不同的是，一個是寒冬拍，一個是炎夏拍。

不同的是，一個面豬肥D，一個面豬瘦D。

而相同的是，兩個都fing晒對手出來。

奀豬重得很好

弟弟今日1週6日大，

出世時(30/7/09)，重2.335kg，

出院回家那天(4/8/09)，重2.370kg，

兩日後到健康院磅奀豬，重2.4kg，

7日後，即今天，再到健康院磅奀豬，有2.62kg，

作為乳娘，淨看數字，已有無限的鼓舞，

而這數字，亦讓乳娘知道過去1週6日所付出的，

完全無白費。

******************

看著你努力地啜啜啜，

抓緊著奶頭時雙手亦同時握權的動作，

我，替你高興。

看著你努力地將一口一口充滿你所需營養和抗體的母乳吞到肚子裡，

我，有說不出的滿足。

看著你定時定候，清澈的小便，以及一發不可收拾的母乳便便，

我，知道你吃得足夠。

知道你比預期早到我懷中，

所以你吃奶所付出的技巧和氣力，比哥哥還要多，

你的努力也沒白費啊。你重得很好。

雖然牽繫著我倆的臍帶脫了，

但維繫著我倆的母乳，

使我們拉得更近。

弟弟，我愛你。

天天的四日學校生活

天天今日第四日返學了，

第一日由我陪，

第二日由公公陪，

第三日開始，要自己上堂了，

這兩日，都由爸爸帶返學接放學，

看他對『返學』不太抗拒，

老師話第三日他曾問：『爸爸幾時黎呀？』

而今日，第四日，爸爸話他因為入學校前見到有個同學扭計，不願入學校，使他曾想哭...

放學爸爸問老師，老師則表示：『他入到班房後就無再想哭喇。』

放學後，他如常到公公婆婆家食午飯，到平台踩單車，之後午睡，

我打電話給他，問他：『你返學開唔開心呀？』

『開心。』

『有冇喊呀？』

『我冇喊，有個姐姐喊。我睇Dora呀，bye bye。』

我未及回應已被他掛斷電話了，

相信他好快便適應學校生活了。

明日又是新挑戰了，天天會留在學校，完成午餐才放學，

明日午餐，是他不太喜歡的粥和麵，

看情況，公公接放學後，都要帶他再食飯了。

弟弟喜歡這樣睡

弟弟喜歡這樣睡。

喜歡將兩手伸在一邊。

(攝於弟弟1週5日)

兄弟

午睡時間，兄弟二人睡姿相同，果真是『兄弟』。

相互適應期

弟弟今早到健康院『睇黃』，女醫生表示他的黃疸同前兩日差不多，繼續持續餵哺母乳，下星期三再覆診吧。

****************

原以為天天在弟弟出世後，都適應得不錯，最少我還未見到有行為倒退的現象，也沒有呷醋爭寵等情況，但原來這一切，不是在日間發生，而是在晚上入睡才出現...

弟弟回家的頭兩天，零晨4時被哭鬧弟弟吵醒不能再入睡，至第三晚已經沒有再出現，但隨之而來的，是發開口夢，同埋要求半夜三更沖奶，一定要我同時抱住他和弟弟飲，發現我不是睡在隔離，破口大哭話要搵媽咪，聽到弟弟打嗝，本想起床看個究竟，被天天阻止，因為他要擁著的的手臂係咁掃，最慘係...唔俾爸爸掂！

做母親的，只有盡力做吧，能夠回應他的要求，我都會答應，只因他們二人都是我的孩子。

天天開學的第一天

婆婆將他所知的開學儀式，用在天天身上。 手持蔥和芹菜，喻意聰明和勤力，pat pat坐住塊薄餐，喻意上堂可以坐定定，聽老師講書。還有利利事事啦，喻意一切順順利利。幣，我同老公都無預備添，真失策！

第一天返學，只返上午9:30-11:30，天天一開始在嘗試任何環節都要拖住我的手，包括入班房、老師點名、大肌時段的取波玩、爬馬騮架、玩滑梯、踩單車等等。

過了一小時，即茶點時間，他慢慢獨立起來，能跟隨班主任高老師的指示完成茶點，之後的玩具時間，更能自己取玩具玩及開始和其他同學一齊玩，排隨往如廁還主動叫班房的嬸嬸帶他去，而不是叫我陪了。

之前還擔心他會是班中的大哥哥，可喜的是，原來好多父母和我倆諗法相同，所以除有一兩個是只有兩歲，其他的都起碼有兩歲半啊，而女孩子的說話能力，明顯是比男孩子強，與天天同檯的，有另外兩男兩女，那兩男與天天一樣，比較斯文，可以坐定定的跟隨流程，至於坐天天對面的女孩，年紀比較小，且習慣在早上睡覺，因此全程扭其爸爸計及在後半堂入睡了，另一個女生，是個任性野蠻妹妹，完全不聽老師的說話，喜歡隨處走及搶人玩具...

天天，社會上有不同的人，是時候開始學習與不同人種相處了，有何方法？改變自己吧！他人的...我們改變不了啊！

天天你要努力呀，爸爸媽咪弟弟會100%支持你呀！

天天哥哥

天天，名副其實是哥哥啊！

天天開學喇

天天星期五開學喇，雖然他已經2歲8個月，理應可以返K1，但我同老公都認為，『學習』是一生的事業，所以我們選擇讓他有個開心快樂的童年，給他報了N1。

居住區域的N1，半日的選擇不多，曾經面試的一間半日N1，我不喜歡，所以天天將會到全日N1開始其『學習』生活。

學校第一及二日，可以有家長陪同，之前我還安排：都未生得弟弟，可以陪足他兩日吧！如今這個如意算盤打不响了，唯有改變策略，只陪第一天。

家人曾問：做咩野仲咁辛苦，坐月仲週圍去，叫其他人陪咪可以囉！

人生中有好多個不同的階段，對天天來說，『開學』是不同階段中的第一個，亦是重要的一個，作為母親，是要給他支持啊，總不能夠對他說：因為弟弟出世了，所以媽咪陪不到你。

我，實在說不出口，所以，我仍然會陪他『開學的第一天』，之後，就交給公公婆婆了。

頭一週返學時間只時兩小時，食午飯前便放學，第二週開始便會食完午飯才放學，接下來便是完成午睡後放學，最後一週便要留在學校至4:30PM啊。幸好老公尚有數天便放大假，屆時可以帶他返學放學，同時亦可以減輕婆婆的照顧壓力，希望天天享受返學的生活吧！

完成這一年的N1學習，便要考慮是否轉回半日幼稚園了，到時再算吧！

知足，幸福。

弟弟回家了，堅持以全母乳餵哺，過程順利，有賴弟弟的合作，好友Catherine的湯水建議，媽咪的豐富膳食，昨日已開始谷奶。但弟弟還細，每次都只是吃一邊便再度入睡，為了替他增磅、去黃、以及替我減輕谷奶的痛苦，本應3小時才吃一次奶，我會約2小時便叫他起身，初生嬰兒，不去叫醒他，他是不合醒來啊，除非真的好肚餓。

天天見到弟弟回家，好開心，不停說『佢好細個呀』、『佢紅卜卜呀』。

見到弟弟哭，會立刻飛撲埋去『弟弟唔使驚。』

見我餵奶給弟弟，他便會走埋來，用其小手輕摸弟弟的頭髮，在我掃風拍背時，又會走過來擁著他。

半夜，弟弟遺便不舒服，哭了，弄醒天天，他問我：『弟弟做咩野呀？』

『弟弟痾左大便唔舒服，所以喊囉。你繼續瞓覺啦。』

他在續睡前說了一句：『弟弟，大便要去廁所吖嘛！』

頓時覺得他...大個仔啊。

****************

日間，天天如常到婆婆家『暫托』，臨出門口前，走到弟弟床邊：『弟弟，我去公公婆婆度喇，今晚見啦。』

見他捉實弟弟的小手仔，有種說不出的幸福。

心肝寶貝

同攝於回家的第一天。

他們...都是我的心肝寶貝啊。

只泵到數滴奶......

回家了，只有我一人。

原來我羊水穿了，陰道分泌驗到有鍊球菌，

所以醫生為安全計，要替弟弟打抗生素，

怕他感染到引致最壞的『腦膜炎』，

醫生雖仍讓他出院，因為他自出生以來，

大小便正常，冇發燒，食得也不錯，

體重仍能維持2.3kg，

但我同老公都認為，如其未來3日要每天帶他回醫院打針，

同時亦要觀察其情況，定時探熱等等，

倒不如讓他繼續留在醫院好好休息吧。

************

回家後，除了接天天回家外，

還要定時定候泵奶，

可惜，本以為會有所出的我，

竟然只能泵出數滴，

不錯，真的只有數滴。

老公不斷叫我放鬆心情，才會有所出，

但眼見泵了20分鐘仍沒有一點成績，

很是擔心。

是因為弟弟早產的原因，弟弟吸啜不足，

泵奶次數不足，湯水不夠，還是如何呢？

為何仍上不到奶？

好懷念餵哺天天時，那些噴奶反射，

數十條奶柱飛奶出來的感覺同情景啊。

我現在可以怎樣做才可增加奶量呢？

回家後要積極泵奶

好勤力地每隔三小時餵一次奶，每次每邊也要他吃15-20分鐘，然後才補20ml奶粉，執了他數次胎便，不過能否出院，還要等今早兒科醫生的檢查才知，姑娘已替他換好衣服，這讓我有個好大的期望啊！

老公今早提議我與弟弟一同留院，以滿足我同弟弟餵奶食奶的需要，但這提議已被護士姑娘拒絕了，因為床位緊張關係，真的不是有錢就可如願以賞！現在唯有在家努力泵奶來維持奶量，若可以日頭到來醫埋身餵數次吧。

眼見隔離床的新任媽媽，昨晚已有谷奶現象，而我就仍然未覺，真有點心急呢，好懷念餵天天有勁多奶的感覺同情景啊。

不過，都係個句，要相信自己同弟弟，我地一定得嘅。

弟弟有望一齊出院

弟弟今日好俾心機學習吸啜乳頭，比昨日表現好好多了，中午兒科醫生替佢檢查，話因為在檢驗我的羊水時發現有細菌，為安全計，弟弟要打多一針抗生素，出院後亦要食藥，同時，弟弟開始有黃疸，所以下午開始便要照燈，不過醫生話，如冇意外，弟弟應該可以跟我明日出院。

照過燈後的BB，表現好疲倦，9PM餵佢食奶，佢就冇心機吸啜了。

老公跟我分析，話弟弟有黃疸，同時比較細粒，擔心佢咁早出院會唔係幾好，想佢在醫院多留數天，起碼有醫護人員照顧住，但我話如果醫生都話佢可以出院呢？咁又如何啊！

我好想弟弟可以一齊返屋企，起碼我可以多餵他母乳，但若果我出院先，他就只可以食到奶粉，我地有諗過一齊留在醫院，但打了個電話俾婆婆，婆婆話天天開始唔耐煩，想今晚就返屋企，所以為左平衡兄弟二人的感受，最後老公同意，如果醫生俾弟弟出院，我地就一齊返屋企，有事的話便帶他返醫院睇急症，如果醫生唔俾佢出院，我都要出院了，寧願自己日頭到醫院餵弟弟同埋勤力泵奶。

都係個句，弟弟，你要努力呀，媽咪都會一齊努力架

BTW，唔該晒呀，KELLY。多謝你嘅分享同支持。

努力餵母乳

弟弟因為屬於早產BB，加上係穿左羊水先，兒科醫生擔心佢會受到感染，所以要替他打抗生素，另外因為我有妊娠糖尿，所以他亦要定時定候被『篤手指』，我見個姑娘其實係篤腳板！醫生亦話，因為佢比較輕，所以出現黃疸嘅機會較高，可能唔可以同我一齊响週六出院。


為此，我有點不快。


唯有盡力教他吸啜母乳，不過他實在太細同太疲倦了，每次吸啜幾口便停下來，給他擠壓一點引他喝，都算好過冇。


好想他週六可以和我一同出院，按醫生建議，每次教他吸啜母乳的同時，都會補奶粉，讓他有足夠能量增磅去黃，可喜的時，他已有大小便，姑娘們都不時同我講：『你個仔雖然係細粒D，但好精靈喎！』


作為母親，只想他健健康康，食得瞓得行得走同開開心心，別無其他了。

弟弟出世

30-7-09零晨1:15，


『姑娘，我個仔個頭好似出左黎呀，咁點算呀』


『你快D同我上噃張床先啦』


『我好急，忍唔到喇』


『唔得呀，你唔可以o係個廁所度生架，快D同我返噃上床先啦。』


如是這，在一遍勁混亂的情況下，我被連人帶床推入產房，


就連產床也來不及過，就連醫生也等不及，


在兩位助產士的協助下，弟弟在零晨出世，


由病房至推入產房至完成生產，


整個過程，不到20分鐘便完成，


且，未有上一胎的10級痛楚！


我只可在生產完畢的1分鐘內，可俾老公，


『老公，我生左喇！』


當然，佢俾我嚇左一大跳啦，


醫生亦在5分鐘後到達，替護士姑娘善後我的傷口，


打過麻醉藥讓我好好睡一覺，清晨見到老公，


即問：『我有冇焗襯個仔呀？』


『放心，醫生話弟弟好好，識自己透氣，已經食左一次奶，不過因為早左D出世，同埋你有糖尿，所以依家放左入個暖箱入面。』


『幾重呀？』


『都有5磅2安士呀』


『弟弟，你等我8:30AM黎餵你食媽咪奶呀。』

陣痛

29-7-09下午，開始感到小宮有規律地收縮，


告知護士，駁上機器作檢查，


『唔係好密啫，你自己再留意吓，再密就再叫我地啦。』


過了約2小時，由最初的每隔30-45痛一次，


變為每15分鐘痛一次，再叫姑娘，


11PM再駁上機器檢查，


頂，做左成半個鐘頭後，個姑娘話：


『你冇陣痛過喎！』


冇，你估我特登講大話咩，依家痛到每隔5分鐘一次喇！


『咁繼續駁住個機，睇多半個鐘啦。』


都唔知佢係咪駁得唔好，之後個半個鐘，就見到好有規律的每隔5分鐘一次陣痛，但波幅唔大，其實我都唔覺得好痛，只是似比經痛痛少少咁。


30-7-09零晨1:15，個姑娘仲未入黎，


只好按鐘叫她，


『哎呀，唔好意思，啱啱接緊生。』


我就反黎痛死都冇人理喇！


『係喎，有陣痛喎，不過隔5分鐘先痛一次，又唔係話認真好痛，你瞓吓啦，等BB留o係你個肚多一日得一日嘛，繼續瞓啦。』


咁痛，點瞓呀！


既然你都叫我繼續瞓，人有三急，如個廁再睇吓點先。


行到入廁所，又痛過喇，仲好似想痾屎添，


記得生天天時，要生的時候，唔係呢種痾屎感覺的，


可能真係想痾屎啫，試吓痾啦，


痾痾吓，發現勁唔對路，


摸下下身，點解個陰道口好似有野咁嘅，


即刻按救命鐘，


之後就係一片混亂嘅場面...

弟弟，你要加油呀。

醫生話：



安胎，唔可以落床，除左去廁所。



醫生話：



唔可以洗頭，催生那天先可以洗。



醫生話：



要明日幫弟弟做超聲波。



醫生話：



做完超聲波，睇吓弟弟個位置、體重等，先可以決定係星期日定星期一崔生。



弟弟，你要加油呀，媽咪都會加油呀。

28-7-09天天來醫院探我。

今日繼續留院安胎，


今日羊水已經留少了，


仍冇肚痛跡象，醫生謂是好表現，


叮囑要繼續卧床休息，


著老公協助回公司安頓好工作，


帶來NOTEBOOK在醫院解悶，


下午天天表示要與公公婆婆到來探我，


一見面便問我『媽咪你要留在醫院呀』


又好似好不安咁行來行去，


又問吊鹽水痛唔痛呀，


我不停同佢講『媽咪要等弟弟出世後，先可以同你返屋企呀』


『好要乖乖地留o係公公婆婆屋企瞓覺呀』


佢好快話『知道喇。』


原本好擔心佢會因為事出突然而會扭計，


但婆婆話佢又冇咩野喎，好聽話。


咁我都安心，做哥哥真係唔同D啊。

27-7-09穿羊水，被迫入院安胎。

前往午飯途中，

突然感到下身一濕，

趕忙到廁所查看究竟，

啊!好像只是多了點白帶啫，

安心繼續去會合同事飯，

食飯後，好似賴尿般弄濕成個pat pat，

拿拿淋坐的士入院，

醫生檢查後，表示要為弟弟打強肺針，

抗生素同吊鹽水，以防感染同子宮收縮，

皆因弟弟只有35週，醫生想他有36週才出世，

就是這樣，我便要留在醫院直至弟弟來臨。

弟弟，你要儲肥D呀!

天天語錄II

天天臨睡前，自己講野...

『熱狗』

『涷狗』

『熱拾』

『熱陸』

細路，你攪咩野呀？

超標

會超標的食物：

1. 炸兩
2. 咖哩牛腩飯
3. 水煎包
4. 多過3塊克力架
5. 芝士焗吞拿魚意粉
6. 罐頭粟米湯
7. 茄汁
8. 生炒骨

臨近生產，開始冇耐性去節制自己了，經常想『食小小唔怕嘅』

曾有數次，好想食支雪條，好想食碗楊枝金露，好想食杯芒果鮮奶

紅豆沙，西米露，馬拉糕...

醫生話，就算弟弟出世後，仍要繼續食這個營養餐，

對為食的我而言，簡直尤如坐監。

天天語錄

媽咪：『你鐘唔鐘意食萬落珠呀？』

天天：『萬上珠呀！』

**************

媽咪：『睇唔睇多啦A夢呀？』

天天：『多啦B夢啊。』

弟弟要聽話啊！

34週的弟弟，約重2.3kg，

34週的弟弟，已調頭，

醫生表示，他改變頭仔的位置，機會較微，

而且，他還開始想爬到盆骨去，

但醫生叮囑，

『你要多休息，不要行太多了，以免他早過37週出來。』

『最理想係15/8/09-30/8/09才到呢。』

那弟弟啊，你要聽醫生話喇。

因為媽咪仍未放產假啊。

因為哥哥7/8/09第一日返學，要媽咪陪啊。

『唔好打我呀』

房內突然傳來『啪』一聲，

隨之而來的，是一陣嚎啕大哭，

『唔好打我呀，嗚嗚嗚，唔好打我呀...』

『邊個叫你唔聽爸爸話呀...』

『唔好打我呀，嗚嗚嗚，唔好打我呀...』

『你聽爸爸話，我咪唔打你囉...』

『唔好打我呀，嗚嗚嗚，唔好打我呀...』

忍不住入內看個究竟，

『爸爸唔打你啦，咁你要聽話先得格...』

聽得出爸爸好心痛，但那下『啪』已經發生了，

有些事情做了，是返不到轉頭的。

出手前，請三思。

一個美好的晨早

一早起床，天天伏在我身上，擁著我和弟弟，

突然，他彈起身，

『弟弟踢我呀，佢踢我個大肚dum呀。』

『係呀，弟弟同你講早晨嘛。』

他再次伏在我身上，

『佢又踢我喇。』

愛錫哥哥也愛錫弟弟

找出天天兒時衣服，清洗後預備給弟弟用，

媽笑言，衣服足夠我生孖胎啊。

懷著天天時，似有購物狂，

什麼也買，慌他不夠穿，

到弟弟，郤一件衣服也沒為他添置，

媽急忙道，你也要公平點，不然弟弟便永遠穿舊東西啊，

這會影響其心態呢。

穿舊東西，有不好受的感覺，相信到弟弟再大一點才會出現，

但做弟弟的，郤多了一個哥哥愛錫啊，

這不是比哥哥優勝點嗎？

哥哥還會隔住肚皮錫一啖，

並說：弟弟，我好錫你啊。

噢，願數週便到我們懷抱中的弟弟，也愛錫哥哥吧。

我愛你。

某日，在車上，

突然想：我同老公結左婚幾耐呢？

算算手指，

原來已經四年半有多了。

30歲前完成多個自小訂下的人生進程：

30歲前找個好老公，

30歲前嫁給他，

他一定要懂弄飯燒菜，

他一定要肯做家務，

他一定要事事以我為先，以我為重，

他一定要事事以家為先，以家為重，

30歲前要誕下麟兒，

一定要三年抱兩，

他一定要繼續愛家，繼續愛兒，繼續愛我。

這家，不一定要金錢上的富裕，但一定要心靈上的滿足，

這家，要有溝通，

這家，要彼此體諒，

這家，有困難會一同面對，不會讓任何一人孤軍作戰...

我，愛這家。

我，愛孩兒。

我愛你，老公。

唔知我得唔得呢？

一直都有個擔心，就係唔知今次可唔可以餵母乳餵到弟弟1歲半呢？

產後仍然要食妊娠糖尿餐，會唔會影響產量呢？

住私家醫院，可唔可以同醫生講，生完第二日就帶埋弟弟出院返屋企呢？

因為私家醫院要成日行入去育嬰室餵奶，好唔方便呀。

YEAH！

這天，

唯一全日的血糖度數都達晒標。

為自己鼓掌。

男人

媽咪：『老公，我篤左手指咁多次，我覺得你點都要經歷一吓我嘅經驗囉。』

爸爸：『吓。有咁嘅需要咩？』

媽咪：『反正部血糖機都係租之嘛，CHECK吓你D血糖有冇問題都好架。』

爸爸：『我冇事喎。』

媽咪：『咁咪當知道吓我一星期要自己篤12次嘅之味囉。』

爸爸：『我已經知道女性生小孩係好偉大同辛苦喇。』

媽咪：『把口話知道係唔夠架，要實際體驗先得架。』

天天：『你地o係度做咩野呀。』

媽咪：『爸爸要篤手指呀。』

天天：『我都篤過啦，唔痛架，好快冇事架喇。』
(話說上回佢要抽血，被篤手指喳D血出黎嘅經驗，好難忘。)

爸爸：『媽咪，你唔好迫我啦，你都知我最怕打針，依家仲要自己篤，咁恐怖。

媽咪：『車，有幾恐怖啫，我咪個個星期都係咁篤。』

天天：『媽咪，你唔好篤爸爸，爸爸，我欄住你，唔被媽咪過黎。』

(死仔吖)

結果，爸爸緊係o係媽咪嘅威脅下完成呢個似是創舉嘅所謂創舉啦。

後記...

爸爸：(同奶奶展示...)『亞媽，你睇，我隻手指有個針窿呀。』

奶奶：『超。』

有你真好。

天天：『媽咪，你又篤手指喇？』

媽咪：『係呀。』

天天：『媽咪，篤手指痛唔痛架？』

媽咪：『有少少痛架。』

天天：『使唔使去醫院呀？』

媽咪：『咁又唔使。』

天天：『媽咪，我鍚噃你吖。』

哎吔，甜到入肺呀！

給我一個希望

進食『妊娠糖尿餐』，產生憤怒、痛苦、失落、空虛、情緒下降至極點、經常發脾氣...

憤怒，係見住你老公o係你面前飲汽水，食薯片，而你只得個望字。

痛苦，係被迫每星期有兩日要『督手指』6次。

失落，是都已經食唔飽，督手指竟然都超標。

空虛，源於每餐都好似食唔飽咁。

情緒下降至極點，差不多唔想去街，唔想見人，唔想同人講野。
因為去街要煩惱--我可以食得D咩野？

覆診兩次，自身體重不斷下降，你這肥B就不斷膨脹。

醫生仲話你比同週數的BB大隻，可能會早生。

因為你的頭仔已倒轉，醫生仲話你想走到盆骨啊，著為娘要坐多些。

又話妊娠糖尿的BB，個肺發育會唔太好...

咁我又可以點呢？

我已經咩野都俾晒你，我輕左而你重左喎......

你若是要早來，我也沒辦法啊，現在為娘只好繼續堅持那個所謂『營養餐』，同時望你出來時健健康康吧。

另外，你可否給我一個希望，你到來後，讓為娘喝杯香濃咖啡，可以嗎？

妊娠型糖尿病孕婦飲食10原則

妊娠型糖尿病孕婦飲食10原則


1.將碳水化合物食物分佈均衡，即3主餐和2至3小餐裡都有碳水化合物食物。而每一主餐或小餐的分量需要均勻地分配。


2.碳水化合物食物的分量要固定，每一餐碳水化合物的分量視個人需求而定。


3.多選擇緩慢釋放葡萄糖的碳水化合物食物（即高纖維食物），如麥片、糙米、全麥五穀食品、蔬菜、水果等。


4.避免或限制攝取精簡型碳水化合物食物，如白糖、蜜糖、甜品、加糖飲料等。


5.水果分量必須依據指南的建議（如1粒中型蘋果/1片木瓜/半粒中型番石榴都相等於一份水果），並且將分量完好分佈在所定的每餐內。


6.限制飲用果汁或避免選擇太過成熟的水果。


7.多吃不飽和脂肪酸，減少飽和脂肪酸及反式脂肪。


8.葉酸、維他命C、鈣質、鐵質的分量與普通的孕婦需求都稍微提高。貧血孕婦更需注意及多補充這幾種營養素。


9.無論是普通或糖尿病孕婦，一律嚴禁沾酒及吸煙。


10.咖啡、茶或含咖啡因飲料能免則免，或儘量限制於一天不超過2杯。

好番喇！

週一幸得上司體諒，帶天天往看大夫，之後再返工。因為仍然不知他為何發高燒，所以要抽血，化驗所姑娘表示，小孩子血管細，所以不能抽手臂血管，那我只好看著她『督天天的小手指』。

好心明知係小孩子，就搵個經驗豐富D嘅姑娘黎啦，搵個新丁黎攪左一大輪，話我知：你個仔D血唔出喎，要督過另一隻手指呀，同埋之前抽到嘅血唔要得喇，因為太少。

差D對住佢講粗口！

後來搵左個熟手姑娘，痛都係痛架喇，但勝在夠快，唔使等天天受咁多皮肉之苦呀。

好少聽到天天會喊得咁慘，好彩老公唔在場，如果俾佢聽到個仔喊成咁，肯定即刻要走話唔抽。

最後，報告話天天係感冒菌，服食另一隻藥水，已經唔會反覆高燒了。

**********************

今日他問我：幾時去游水呀？

上週已答應他了，估唔到仲記得，明日啦，帶埋綠色水泡去游水啦。

103度

退燒藥水每4小時服一次，藥力過後，他又會再發燒，清晨5:30，他又再發熱，整個人都熱熨熨的，探熱針顯示103度...

他喊著道：『我唔探pat pat，我唔探pat pat...』

未幾，又有一粒塞肛藥放進pat pat...

一會，他道：『唔攪個pat pat喇！』

*************

星期天，大夫關門休息，所以只能倚靠那支粉紅色的退燒水，同剩餘一粒的塞肛藥與病魔作戰，以及在他不聽話時所說的：

『你唔俾我探耳仔我就要探pat pat架喇』。

『你唔飲水發高燒我就要探pat pat架喇』。

『你唔快D瞓覺發高燒我就要探pat pat架喇』。

路人甲話：『媽咪，成日咁嚇佢，想唔怕探pat pat都唔得啦！』

102.6度

在這非常時期，你竟然無故發熱，探熱針顯示102.6度，為娘相當緊張，但看你龍精虎猛，食得瞓得行得走得，仲成日問住：『幾時可以落平台玩呀？』

不禁問一句：你係咪真係有病架？

結果，大夫連尿也替你驗埋，都只係作出『多數係作感冒喇』的診斷。因為你除了發熱，就別無其他病徵。

最後大夫叮囑，留o係屋企多D休息啦。

束腹帶

束腹帶，可以係玩具。

31/5/09再到雲泉仙館

個口...好大！