學沖涼

今日到健康院見醫生兼學幫bb沖涼,先講見醫生果part,一切都好順利,但醫生最後個句都係:"睇黎你果個都係大碼bb喇!!"然後我見到佢在牌板上寫左句--large baby...

到左學沖涼,族長好勇敢出去做實習,見到佢雞手鴨腳,真係有d担心到時如果佢幫bb沖涼,個b會冷親多過其他呀!!!好彩專業的奶奶一早就答應會過黎幫手,到時再學啦!!!

族長話會攞小熊維尼來實習一下喎......小熊維尼,你有難喇...真可憐!!

唔知摸到亞b隻手定隻腳!!

bb越大越有力,雖然我仲未見到個肚皮有bb的手或腳的形狀突出黎,但我好明顯知道佢撐住我個肚,當佢撐住時,我會用手摸下佢,好實架,仲好似摸到個腳板咁,好得意,通常會在個胃對落的肚皮上出現!!今日開會期間,又覺得佢撐住,隔離個同事好奇咁望住我摸自己個肚,我咪叫佢又摸下,佢都摸到呀!!

已經第34週喇,話都冇咁快就就快生得喇,今日樓下個管理員仲問我,係咪今個月尾生得,可能我個肚都真係比較大,佢先會咁問我,但我去健康院,有d媽咪個肚仲大過我果個好多喎...

臨到就黎生,唔知點解,好想飲咖啡,奶茶,可樂......

連環煲碟10小時

早前講過正追緊prison break,咁啱有個同事有齊全套,借左黎睇,咁就開始左連環煲碟10小時的紀錄!!族長夜晚放工返黎仲鬧鬼我,話我對住個電腦咁耐!!!咁自己一個人放假o係屋企,冇野做,唔係睇戲咁做咩野好呢!!!

今日繼續睇埋最尾果4集,勁緊張!!當然,我都會好遵守遊戲規則,個結局緊留番俾你地自己睇啦!!

發夢見到自己餵人奶!!

一直都好想自己可以餵人奶,為bb同自己都好d,因為好多媽媽都話,bb會冇咁容易病,而且媽咪自己又可以快d修身,嘩...正!!!最好可以著翻自己未懷孕之前d衫,咁就最好!!

但係,生仔其實有好多情況都唔係可以自己控制到,例如亞b幾時想出世,到時要用幾耐時間生,可唔可以自己生,定還是要開刀......一切我都唔知,亦唔可以控制,雖然有好多期望,但...同做人一樣,我只可以為結果作好準備,至於到實際的時候,係咪可以咁順利,就要靠天喇!!

如果可以自己生,咁我o既如意算盤就可以打得响喇,自己生完,個傷口復完會好d,餵人奶又會容易d,可以快d做運動,即係可以快d修身......真係好想係咁!!

昨晚發夢,見到自己餵人奶俾bb呀!!哈哈,瞓醒都不知幾開心,個夢入面,自己仲好似好多奶添!!!你話我係咪真係好想自己做得到吖!!

Prison Break

三色台早在宣傳prison break時,已留意到...好似幾好睇喎!所以由第一習開始,已追看了!原本叫埋族長一齊追看,但每次我睇緊時,他都會好"求其"地看一兩眼便算...他的眼神話我知--他覺得麻麻地!所以我都冇迫佢陪我一齊睇!

自Episode 06 開始,佢無端端同我一齊追!!話說由那習開始,監獄內開始打交...原來男士對"打交"是有特別的喜愛,跟住的Episode 07,佢當然一收工就趕返屋企,睇吓Michael可唔可以救到靚女醫生出來!!

肥b

連盧醫生都話小熊bb超肥呀!!!33週覆診,照到亞b有2.4kg,即係大約有5.28lb!!!!!!!!!!!!!!!!!!!!!!!!!!

正常o既bb34週都係2.2kg咋!!醫生話如果兩個星期之後都係咁大件,就要check吓我係咪有妊娠糖尿病!!!吓,驗尿冇野喎..................盧醫生話驗尿唔準喎!!!!咁點算!!

族長即刻封鎖所有甜食!即時暫停燕窩,佢話燕窩會養肥個b,之後仲話早餐只可以食麥皮!每兩日先食一隻旦,一日先飲一盒奶咋,吓,點得呀!所以我冇聽佢講,奶點可以飲咁少呢,第時點餵人奶喎!!

除左亞b係肥b之外,醫生仲俾左封入院信我,話有咩野事都可以即刻入院喎,要咁快咩,唔好赫我喎,不過佢都係堅持話俾定我!!我估我都係會早生架喇!!都係快d執定個走佬袋先!!

仲有兩個月...做咩好...洗衫同奶樽啦!!!

星期日,最好不過緊係去郊遊啦!但族長今日要返工,今晚成10點我先會見到佢...成個下午,有咩野做好呢...不如洗吓d小熊b衫啦!!哎呀,原來有鈕嘅衫仔都係要用洗衣袋入住架...因此有件衫的鈕...洗爛左!!!

洗完衫,仲有好多時間喎...仲有樣野可以洗...就係奶樽喇!!總共有11個,5細6大,要分開兩次先洗得晒,聽人講新奶樽要烚幾次先得,因為咁樣d奶咀先會軟d!!!所以個機總共開了6次!!!

中秋節...零食減不了!!

因為輪班的關係,所以未能到祖母家與家人一同過節,剛巧與族長都一同返P,所以相約收工後到蝴蝶灣散步,欣賞月色,沿途除了心口掛住瑩光棒之外,還拿住一大包明X蝦片,行到小食亭,當然少不了一罐勁凍的汽水--忌廉!!真過份!!

想不到,一個沙灘,竟然插針到插不下去,根本無路可以行,仍然有小朋友喜歡玩電燈籠,我和族長都覺得,中秋節是一個攞正牌玩火的日子,點都不會教個仔玩電燈籠,當然讓他玩火時都會有條件的,不會任玩啊!!最重要的,是--咩野都要試吓!!

以為返到家裡就不會再食,點知,族長竟然仍覺肚餓,在樓下還要買多3隻雞翼,結果我幫手食了一隻,仲應節地食了3個8份1的月餅,還食了個橙先去瞓覺,所以中秋節都是忍不到口了!!

下週二還要再去覆診呢,你話點算好!!我都不知點算了!!

儲夠quota,勁食一餐!!!

昨日看完醫生,一切OK之後,即時放縱,食了一個香蕉船後,今日再來,食了個勁豐富的午餐,有一半是正餐,一半是甜品!!真敬佩一班可愛的同事!!

今日過後,又要回復節制的日子了!!所以今晚都對自己好一點,買了個腐竹雞旦糖水回家慢慢享受!!

好彩族長今晚要返工,如果讓他見到我又勁食,一定會鬧啊!!!

咩野都買!!

早前經常行bb鋪頭,諗住格價可以買平野,但成日都諗住...d野使唔使咁早買呀???所以每次都係得個行字!!

最近,因為預知我和族長未來數月都會好忙,所以唯有的起心肝,去買亞b需要的東西,但總係覺得,買貴野,而且,都唔知咪男士都唔係好鐘意格價,族長每見到喜歡的,都會話--買呀買呀!!!吓...呢個屋企好似有喇,唔使買啦!!如是這,買得最少的,是衫仔,買得最多的是日用品,洗奶樽液,bb專用洗衣液,沖涼盆...都搬晒返屋企!!

其實,仲有好多野未買啊!!!

體重...回落!!

今日又是一個要見醫生的日子,好趕好趕地於6:40pm到達醫務所,不過今日盧醫生放大假,由靳醫生代診,這都好,預計盧醫生12月都不會放假啊!!

未入到醫生房前,先磅個重---141lb,好似輕過上次!!入到見靳醫生...奇怪,沒有問我幾重,又沒有替我量血壓!!!只是問了幾句:"bb有冇郁呀?有冇咩野唔妥呢?"我都話冇,不過有時行得快少少,個肚有少少拉緊的感覺...但醫生沒有回應這是否正常!!!之後叫我上床照照超聲波...呀,一切都好正常喎!!不過bb個頭就比現時週數大了一星期!!大頭仔!!!

由於担心bb個頭大,好難自己生,所以都忘了告知醫生,我體重是多少,出到去問問姑娘,我上次的體重紀錄是多少,才發現比上次還輕了少許,3星期前,我是142lb,今日...竟然是141lb!!!護士姑娘都發現這個情況,立即安慰我:"可能你d水腫退了,所以咪輕左羅!!!"真的嗎??

最後都是族長安慰說:"你冇重,但亞b有重咪得羅!"是呀,3星期前bb重約3lb,今日已有4lb了!!!

這是否代表我的戒甜行動成功呢??自上次驗尿有個+之後,我都已經好節制,3個星期只是食過兩次雪糕,間中食了少許月餅和朱古力,食過一次旦糕,冇飲過汽水啊!!都好忍得喇!!

既然都有點成績,當然要求族長給予少許獎勵啦!!如願以賞地去吃了一個好開心的香蕉船啊!!

就快生得,見醫生的次數就越來越密,下週又要到健康院見姑娘,再下週,又要到盧醫生處,即是說每週都要看一次醫生!!都幾忙呢!!我又忙,族長又忙,bb又忙,成家人都生活在忙碌之中,真是要找個平衡點了!!!

體重控制...成功了!!

自從族長上週有好幾天去了釣魚,暴晒了幾天後,他...終於病倒了,患了傷風(其實我也不知道是我感染到他,還是他自己焗病了!!!所以,他也只好乖乖看醫生和到書房瞓了!!今日,還是鼻聞聞地陪我到母嬰健康院覆診!

自11/9/06被盧醫生勸告要戒口及控制體重後(其實是因為被驗到尿糖有1個+之後),已經好乖地少吃甜食,當然間中仍忍不住口,吃少少月餅,少少甜品,少少雪糕...但冇食過朱古力啊,好有進步了!!!

今日驗尿,冇事啊!!好正常呢!!即問族長:"係咪可以食番多少少甜品呢??"但仍是換來相同答案--唔得!原因是:"你仍然超重呀!!"

哎呀,體重控制這項目,我已經好有進步了!
未懷孕前,有 50kg (110lb),都好OK吖!!
26/4/06 有 53.1kg (116.8lb)
6/6/06 14週 54.5kg (119.9lb)
18/7/06 20週 58.3kg (128.3lb)
29/8/06 26週 63kg (138.6lb)
26/9/06 30週 64.3kg(141.5lb)

26週與30週(4個星期)相比,只是重了2.9lb咋!!比起20-26週時,已節制好多了!!

所以,現時我想得最多的問題,通常都是:"跟住果餐,食咩野好呢??"

芒果糯米糍

肥媽教煮芒果糯米糍,好似好容易啊!!

材料
1.糯米粉 130g
2.芒果汁一包 250ml
3.椰絲 適量
4.芒果 適量




做法
1.將糯米粉+芒果汁撈勻後,用微波爐煮4分鐘
2.搓糯米粉團,加芒果粒搓圓
3.鋪椰絲即成!!

係咪好似好簡單呢!!

食咖哩

星期一突然好想食印度咖哩+薄餅,以前市中心都有一間的,但...結業了,問過同事,聽說在友愛重開,所以收工後,去找找打算買個外賣回家享受一下,誰知,找了很久,都沒有,只找到一間泰國菜館...不知是不是同事將印度咖哩vs泰國咖哩攪亂了呢,算吧,惟有帶住失望的心情回家去!!

等到族長收工,還給他笑了好一會(因他一早就叫我不要自己去找,他說知道置樂有啊!!)最後,給笑了好一會的我,終於約到族長今晚帶我去,哈哈,等了數日,終於可以吃了,但...又有點傷風,不知可否吃呢??吃--走辣,相信可以啊!!

提起咖哩...又令人想起...大尾篤的忠誠的咖哩炒蟹了!!!

恭喜媽咪懷孕7個月了

<7個月的資訊>

恭喜媽咪懷孕七個月了，隨著胎兒的成長，您的子宮和乳房越來越膨脹擴大，由於過度拉扯，腹部和乳房可能會形成妊娠紋。(好彩到依家都未有!!)有時您會感覺到子宮收縮，偶爾會有疼痛；有時會有胃灼熱、消化不良等情況。(哈!!這些都未有啊,淨係好想食甜品呢!!)體重平均增加1-2千克(kg)---已經唔止喇!!

胎兒大小：體重約1.4千克(kg)---這個就差唔多喇!!11/9/06量度都有1.323kg了，長度約40厘米(cm)。

器官發展：已能眨眼、吸吮拇指，並能伸展手足和踢腳。皮膚呈紅色而多皺紋，骨骼開始堅硬，但頭骨仍保持軟而柔韌以便於生產。

除左上述情況外,最近發現自己唔可以仰臥睡,瞓一陣就會背脊痛,一定要側睡!!

幸好,晚上仍未有被bb踢醒,仍然可以有覺好瞓,但就一定會半夜去一次廁所呢!!!

29週

如果38-39週,BB便可以出世的話,那麼,我便有9-10個星期左右,便可以生產了!!不知那時會怎樣呢!!朋友表示,如果可以自己生,最好自然生產!!我不知那時會怎樣,希望BB愛錫我,讓我與他有個難得而又順利的經驗吧!!

從沒想過自己懷孕會這麼輕鬆,到現時為止,我仍未感到太辛苦!!這相信是我的福氣吧!!人總會有點貪心,如果這個福氣,可以帶到去生產的那一刻,你說,這有多完美呢!!但我亦相信,人必須付出一點努力,才會有收穫,所以我會俾心機去行樓梯,希望過程可以順利一點啊!!

昨日,我告知族長,朋友說我生產完之後,最好不要掂水,要掂的都一定要是暖薑水,所以第一個月,BB沖涼工作,會交予他!!!他...吸了一口大氣,之後才答應!!真難得!!

這是他第二個所克服的,便是抱細BB,他表示,細BB太輕,有點可怕啊!!!是怕弄傷BB,還是不喜歡輕淋淋的感覺,我得去求証一下了!!

族長的挑戰

族長昨日去釣魚,沒有我陪伴的日子,他總會遺漏帶東西的!昨日,他便漏帶戶外活動必須的用品,太陽傘,太陽油,帽及長袖衫,結果,變了一舊炭回來!!連咀都有點腫!!至於雙膝,更似被嚴重燒傷似的,步行都好似有點困難!!!

除了大量飲水,他本想買腐竹雞旦糖水清一清,但糖水店剛好賣光,問店員還有什麼選擇,那間不知是什麼糖水店,經常什麼也沒有!!結果在冇得選擇的情況下,他...竟買了他從來也不吃的---綠豆沙!!!

"豆...是俾雀食的!!"這句話,由我剛認識他那時開始,他便是這樣去理解了!!所以,所有豆類的製品,他都不會吃的,但昨日,他竟然主動買下綠豆沙!!奇蹟!!可想而知,他痛的程度...有幾大!!

不過這也是一件好事,最少,他嘗試過,因為他的另一句金句,便是--"咩野都要試吓!!"

好,下次,我便要他嘗試---榴槤!!!

真人與上鏡

好多人都說:一定要在懷孕期間為自己拍照,以作紀錄,因為這個時間不長,如果錯過了,便可能再冇機會!!

我...一直對這話...有保留!!事關,我總是接受不了自己現時的身形!!都就快3張的我,都冇試過那麼肥!!會不會一踏入3張野,體重便停留不動呢,或者是一直肥落去呢!!!!!!!!!!!!!!!!

昨日,約了一聚舊同學食飯,很耐沒有見面的指定動作,便是拍照,今日,收到相片的e-mail,覺得自己很難看啊!!!但看鏡子,感覺就不一樣了,何解呢!!!

椰絲麥片曲奇

肥媽教煮曲奇餅,用代糖而且有麥片,我相信應該有益又唔會肥的,可以用來治口淡淡的孕婦呢!!

椰絲麥片曲奇

材料：麥片 1杯
低脂牛油 50毫升
自發粉 1杯
椰絲 1杯
泡打粉 1茶匙(這是什麼呢)
代糖 1　1/2茶匙
糖醬 1茶匙

做法：1. 將麥片、低脂牛油、自發粉、椰絲、泡打粉、代糖及糖醬於容器內拌勻
2. 將材料搓成球狀放於焗爐內以180度焗約20分鐘

好簡單呢,族長答應整啊!!天大的喜訊!!

口淡淡!!

最近,不知是不是自己胖了,習慣了,還是小熊bb真的有點不妥,總是覺得他的郁動比早前細力了!!今早,對他說了數次,叫他不要讓我担心,可以的話,大力一點踢我當做運動吧!!今日,感覺好像比較實在,他...是否真的明白呢??還是因為感到媽媽整天都好似"唔飽同肚空空"而抗議呢??

其實我也不是刻意減食呢,以下是今日的三餐"
早餐--芝士火腿三文治一塊+烚旦一隻+奶一盒
早點--香蕉一隻
午餐--波菜+薯仔蕃茄牛腩+白飯+細橙一個
下午茶--即沖牛奶麥片一杯
晚餐--通菜+雞翼+菜圃炒旦+白飯+魚湯

其實都好似好豐富喎!!!(我自己寫完都覺得好足夠),但...為何...總是有唔飽的感覺呢??呀!!唔係唔飽啊,係口淡淡呀!!總想吃甜食!!!點攪好啊!!!

唔通真係要忍---忍------忍!!!