滿月!!

用舊曆計算,天柏21/12/06滿月,用西曆計算,他22/12/06(冬至)滿月,既然咁啱得啱橋,所以咪帶佢去太嬤嬤屋企,俾太嬤嬤見見同順便做埋冬囉!!

收過太嬤嬤的金牌仔後,佢就好安心咁zzzzzzzzzzzzzzzzzzzzz.......................到走都未醒!!

22/12/06亦係返健康院見姑娘同打針嘅日子,嘩!!1個月咋,佢就重左2lb喇!!

出世時--3.225kg 頭圍--33.5cm
22/12/06--4.2kg 頭圍--37.9cm

姑娘話佢屬於中碼bb.

車仔vs孭帶!!

1個月大的bb,究竟適合用車仔出街吖,還是適合用孭帶出街呢?

呢個係我今日同族長爭辯左一輪的題目!!

今日天柏滿一個月了,要到健康院打第二針乙型肝炎疫苗,我想試吓自己一個帶他去,所以冇叫奶奶過黎幫手!族長担心我一個人抱佢去,會好"輪盡",所以一定要用車仔,但天柏唔鐘意,佢喜歡抱多d!!因為沿途佢都有少許喊聲!!打完針就喊得仲利害,冇停過,好想我抱佢,但我冇理由放棄架車喎!!雖然架車仔係人地送的!!

下午打俾天柏婆婆,問佢點算好,佢建議我用"孭帶",一來可free對手出黎,二來又可以俾佢有d安全感!所以佢幫我買左條!

之後族長就表示天柏太細,唔可以用"孭帶",其實咁細個人仔,連車仔都唔應該用啦!!設計呢條"孭帶"的公司話初生bb都可以用架喎!!

仍然係一個疑問,因為聖誕節要帶天柏去party,果日族長可能要返工,唔可以同我地一齊出去,佢又唔想我用條"孭帶",但搭車又唔方便用車仔,抱住佢又太辛苦又唔見左對手!!咁點算呢!!

其實我仲未返工呢段日子,總要獨自帶埋天柏落街買野架,抱住佢又點買呢??

沖涼記

天柏最初回家的幾日,由<女麻><女麻>沖涼,每次喊個不停...可能仲係細!

之後,老公放假期間,都由佢操刀,起碼都幫佢沖左15日羅,最初都係不停喊,之後好d,冇喊咁耐,但未試過全程唔喊!

前日,開始由婆婆黎!哈,出奇地...全程喊都唔喊,只係落水仍有緊張!最初我以為婆婆幫佢落左個"乖乖咒",等婆婆威番次!昨日又係由婆婆黎沖,都係唔喊喎,唔通婆婆真係落左咒...

今日我同老公自己黎,因為婆婆今日放左假,冇黎!!

............車,全程喊!!!

我地開始知道...應該係同"手勢"有關!!!婆婆沖得真係咁舒服咩!!!我又唔可以話:"等我試吓先!!"

我估...天柏梗係知道第時係由婆婆揍,所以無論點佢都會俾番d面婆婆,等第時有d好日子過!!!

掃風vs嘔奶之二

今日竟然有點害怕餵奶,其實怕的只是之後o既掃風!!

出奇地,今日竟然俾我聽到天柏嗝氣兩次!!當然仲未去到"萬掃萬嗝"o既地步啦,但比昨日已有點進步了.除左呢兩次驚喜外,當然仍然存在果d失敗o既情況啦,繼續係冇嗝不特止,而且仲嘔奶!!真係唔知要掃佢幾耐,佢先會唔嘔奶!!

老公叫我唔好咁緊張,佢話bb嘔奶,即係佢覺得唔多舒服,所以嘔左咪舒服d羅,係佢自己會調適o既一種方法,我掃過佢,佢唔嗝...都冇佢辦法!!

唉!!做媽咪o既,梗係唔想見到自己個仔嘔奶咁辛苦啦!況且,我會覺得,如果掃得佢好,佢冇理由會嘔架!!!

睇番其他爸爸媽咪o既blog,原來呢個煩惱,係每個新任爸媽必經階段,幾乎每個blog都會記一記!哈,咁都好,我又可以有多d資料參考吓喇!!

掃風vs嘔奶

近日情緒低落,原因係天柏近日食完奶掃完風後都嘔奶!!量仲唔少添!

我開始懷疑自己識唔識掃風,於是翻開12月的媽媽寶寶,睇吓自己有冇攪錯!

天柏就係果d掃極都聽唔到"嗝"一聲o既bb,雖然話唔係個個bb掃風都會"嗝一聲"但起碼掃完唔會嘔奶先吖,佢就唔係喇,掃完15-20分鐘,放番佢落床仔,佢唔夠兩分鐘就會嘔o係張床度!!我試過晒幾個掃風方法,坐o係度掃,抱住黎掃等,情況都係咁尚吓!

試過抱住佢,將佢個頭仔放响我膊頭度,掃掃吓佢嘔奶,仲整左d落個鼻仔度,攪到佢有d遂襯!

依家唯有每次食完奶,掃10-15分鐘風,之後再抱佢10分鐘,覺得佢ok先放佢返床仔!但如果佢要食兩邊的話,呢個餵奶過程,就要花上1個至個半鐘了!!

作息時間表

天柏開始有佢o既作息時間表喇!

早上起床後,食完第一餐奶之後,係唔會瞓的,而且要我或者族長抱住行先高興,一坐低佢就會大喊!!

之後,要睇佢係幾點起身黎視乎佢食第二餐o既時間,如果太早起身,就要o係10-11am期間食多一餐,呢餐之後佢都係唔瞓住!!

如果10am幾先起身,咁12n-1pm佢要食第二餐,食完呢餐後,佢多數會瞓,大概瞓到5pm!!

5-6pm會食一餐,之後都係唔瞓架,情況同上午一樣!!

直到7:30pm咁尚吓,佢又會肚餓,食飽之後會瞓架喇!呢一覺會瞓到12n-1am,如是者食完呢餐,大概5am會再起身食一餐,之後有時會瞓到8am,有時會瞓到10am,我估視乎天氣同亞少爺仔o既心情掛!!

Boo..........扎!!

同我玩吓啦!!

Boo................扎!!!

玩完lu!!!

大腳與小腳

媽咪 與 天柏

爸爸 與 天柏

一對令人感動的父母

今日從報章看到的一則新聞:"九天生命感動七萬人"

細看...已好感動,想著:若我是那對父母,我會如何選擇!

不敢去細想...怕不知如何去面對!

高琳琳,願你感受到這世界的美好,亦願你帶著愛及温暖在遠方保守你的家人!

瘋狂地...哭

"猛長期"~是否已完結...今日天柏又有唔同了!

昨日仍覺得天柏處於"猛長期",食奶次數較多外,食的時候還會不斷擰頭,係啜住個乳頭黎扭佢個頭!!而且o係食o既途中,間中會有唔開心--裝哭一兩吓!!其次,每次我幫佢弄開乳頭時(因為佢根本唔係食,而只是本能地享受"啜"o既過程),佢都會好驚咁彈起一吓,我見佢咁樣,咪攬實佢一陣,佢又好似好d!!

昨晚8:50-9:30pm食了一邊奶後,佢就瞓左,一瞓就瞓到今晨4am先叫我地!!都未試過一覺瞓咁耐!今早因為要到健康院見醫生,所以7:45am族長就叫醒佢,8-8:30am又係食左一邊就好似食飽咁,之前都唔係咁!!但因為趕時間,9am要去到,所以我都冇試吓俾佢食埋另外一邊!!

到健康院磅重同度體黃,今日磅佢比出世時重了1lb呀!出世時3.225kg,今日有3.68kg!同時已經冇體黃喇,我好開心呀,起碼知佢食人奶食得飽!!加強我以母乳餵哺o既信心!!

回家後,担心o既事又出現喇!10:15-10:35am佢又係食了一邊之後就好似夠咁,而且仲瞓左!平時佢呢個時候食飽都唔瞓架!!仲一瞓就瞓到2pm先醒,而且係俾族長叫醒!!

我已經開始担心,因為佢好明顯,d小便比平時少,今餐想叫佢食晒兩邊,但佢都係食左一邊就瞓左,餵到埋咀邊都冇開口!!

你話做亞媽有幾多野担心吖,佢係咁食你又煩,佢唔食或者食少左,你又担心.......

族長最後都係果句--人o既本能:肚餓就會食,唔餓就唔食,你又使咩野咁担心呢!!

呢個道理我明白,但見佢d小便少左,你又點解釋呢??唔通你話因為今日天氣凍左,所以好瞓左!!咁咪係羅,凍左即係出汗少左,出汗少左咁好自然小便會多d啦!!佢都唔係!!

好想佢快d瞓醒,餵佢食奶啊!!

兩父子

最初,小熊b回家後,由於體黄,所以家人建議用奶樽餵他飲奶,呢個工作主要由族長負責,他亦好享受!

至小熊b的體黄降至正常,家人又鼓勵我以母乳餵哺,最後我成功了!

餵了兩人母乳後,突然族長同我講了一句酸溜溜的說話:"你餵了母乳後,你抱襯天柏佢都會快d收聲,可能佢聞到你d奶味!!而我抱佢,要氹一陣佢先會收聲!!"

吓!唔係咁到呷醋呀!!!為左公平起見(其實係想佢地維持建立良好父子關係),我同族長共識,日後(族長返工以後),如果可以,我都會留番沖涼同換片o既工作俾佢做,而我,則主要係餵奶!

個仔咁專注咁望住自己,聽自己講野,相信係每個父母最開心o既時候,雖然張相影唔到族長o既正面,但我估...佢係笑緊的!!

好沮喪的一個晚上,得網友媽咪的鼓勵,再次燃起信心!!

小熊b昨日只肯瞓一個晏覺,跟住就到9:30pm先肯瞓,我同族長攪左佢成日,一放低佢冇耐,佢就喊,要我地抱住佢,食完奶唔夠45分鐘,又話肥餓要食!!不斷去滿足佢o既需要的我,終於o係7:30pm有d情緒失控,對住碗飯喊左出黎!!

正抱住小熊b的族長,都唔知顧得邊個,因為小熊b都o係度喊!!

其實我冇咩野事,當刻只係覺得好疲累,因為日頭冇瞓過,又不停餵佢食奶!!突然間諗:"你到底要食幾多餐先肯瞓呢??!!"

族長後黎放低小熊b,過黎安慰我,話個仔一日一日長大,唔會再好似初出世咁,淨係得食同瞓,佢開始要人抱,俾安全感佢,又要聽到我地把聲,要我地同佢玩,用呢d放法黎攞佢需要o既刺激,佢如果繼續淨係識得食同瞓,你咪仲驚!!

聽完佢講,又好似好d!!

之後就收到nikita電話,解釋過我知,個仔可能正處於猛長期--

"至於寶寶突然比以前更加頻繁地哺乳，很多新媽媽都有類似的抱怨：“他怎麽除了吃奶就是吃奶！” 在《育嬰手冊》裏，作者西爾斯醫生說，新生兒頭幾個月裏，總有頻繁哺乳的時候，他將這樣的孩子昵稱爲“馬拉松運動員”。這是因爲他正在經歷一個“猛長期”。一般來說，“猛長期”出現在三個星期、六個星期、三個月和六個月左右。這時嬰兒所需要的養分比較多，他就通過頻繁吸吮來刺激母親製造更多的乳汁。在這種時候，堅持勤餵幾天，一旦乳汁分泌量達到寶寶的要求，他的吸吮自然會降低頻繁程度。"

了解多左,對個仔o既體諒又多左,感覺好了許多啊!!

事實上,我其實應該多欣賞天柏的優點,希望唔會讚壞啊!!由佢返屋企到依家,晚上都肯瞓覺,已經好好了,我聽nikita講佢個仔頭兩個月夜晚都唔肯瞓,要家人輪流抱住,其實真係好辛苦,所以我其實已經好幸福了!!個仔都係日頭要人抱吓o者!!

體重!

懷孕第36週時,體重149lb,第37週輕了,有147lb!!

今日已是生產後第17日,今早量體重---128lb,比高峯時輕了21lb!!!太好了!!

試吓可否帶回結婚介指...還差少少,相信過多一個月,我應該可以著回未懷孕前的衫呢...希望!!

與天柏獨處的時間

由接天柏回家那日至今,每日都有人陪我一齊照顧他,老爺奶奶,我媽咪,族長...

今日族長需要返公司工作至10pm,我媽咪整好今晚餐飯後,4:30pm便離開了,屋內剩下我和天柏!!感覺有點慌,担心有突發事情是我處理不到!!話晒都係第一次!!

這個星期,天柏多會在4:30-5pm會食一餐奶,之後會瞓到大約8:30-9pm,如無意外,若果他今日的表現與以往一樣,我諗我應該應付到的!!

作為媽咪,我相信本能上就算未試過也得要面對!!

_______________________________________________________

5:45pm天柏終於瞓醒,6-6:45pm餵佢食完奶之後,以為佢會瞓,點知佢鬼打都冇咁精神咁碌大對眼......氹佢瞓又唔制!!!

7pm佢竟然再次張大個口......唯有試吓餵多次,希望佢食完會肯瞓!

太好喇,佢只係食左20分鐘就肯瞓喇!!依以往o既表現,佢應該會瞓到11pm先會醒,到時族長都應該返到喇!!

點解bb咁鐘意伸對手出黎瞓呢!!

接左小b返屋企第4日,發現佢鐘意伸對手出黎瞓,早幾日好凍佢都係咁,今日見佢瞓晏覺,又係咁,我o係度諗:"其實咁瞓都幾辛苦喎,佢對手唔會痺架咩??點解可以維持同一個動作瞓成兩三個鐘架!!!"

當然,我緊係冇攪佢啦,攪醒左佢,我就有排先氹到佢再瞓喇!!!

瞓覺

每次天柏食完奶,都會喵晒眼咁伏o係我膊頭度好enjoy咁俾我掃風,之後就會好乖好似綿羊咁瞓!!除左早上......最近唔知點解,佢早上食完奶之後就唔肯瞓,眼仔碌碌咁瞓响張床度10分鐘之後就會放聲大喊!我地等佢喊15分鐘後先會抱起佢,之後佢就會唔喊......即係"扭抱"......大鑊!!!

跟住我地發現佢唔止扭抱,而且扭眼瞓,要你抱住佢一路拍一路行......氹佢瞓覺!!

今日佢成朝都唔肯瞓,到下就先肯瞓,婆婆話咁都好,起碼佢夜晚肯瞓先啦......

晚上8pm食完奶之後,就瞓到依家都唔起身,鋒叔叔同秀盈嬸嬸叫極佢都唔醒,激死!!!

天柏媽咪
10:40pm

給你一個名字

父母為孩子第一份送上的禮物...名字,其實係深思熟慮的,怕名字改得不好,他會不喜歡,怕名字不相襯,會影響到他的將來,怕名字改得太"勁",他...受不起......

原來為孩子改名,真是不是易事!!!曾有同事建議:可請算命師父改啊!!但...改個名字要付出幾千元,我同族長都覺得不值...又怕算命師父給我們所選的,我們不喜歡...

族長家要跟族譜排,到小熊b這代便輪到"天"字輩,所以一定要叫:"天X"...

在好開初時,我們想叫他做--"天朗",希望他永遠都睇得開,放得開,樂觀地去好好享受生命同面對生命中的一切!!但後來家人表示這名字太普通了,不夠特別!!

最後,我在三色台台慶前所出的一期週刋中,將各個藝員的名字都拿來併下!!!

我併了好多個給族長揀,最後我們都一致揀了--天柏!

不算是一個好特別的名字,但都有著我和族長的寄望:希望他可以"常綠,長青,像柏樹一樣,在困難的環境中都可以健康成長,亦要好好享受生命!!"

回想自己,名字是父親改的,相信亦有他對我的寄望--乖巧對待家人,歡欣地生活下去!!我很喜歡,亦喜歡別人稱呼我這個名字,所以我從沒有改英文名!!

至於天柏,若他長大後有需要,便由他為自己改個英文名了!!

包...揼...

13日大的小熊b同老豆玩包...揼... 但未識出剪!!!!!!

包......

揼....

又係包......

玩完就要瞓一陣喇!!

多數人都表示,小熊b...似老豆.

好難影到小熊b的大眼睛架!!

似唔似老豆呢??