雜事

前文提過,因為奶廠已由生產主要糧食,轉營至生產甜品,因此家中除了添置了電熱水瓶外,還第一次要外購奶粉,之前一直是靠奶粉sample過活,1號仔已清倉,現進入2號仔階段,為此曾與老爸作過討論.

老爸覺得--唔係要跟住個年齡來飲嘅咩!
老媽就話--護士姑娘話冇所謂喎,又唔係要靠晒D奶粉,副食品黎之嘛,正餐係飯仔喎!
一陣D便便變硬痾唔到咪仲衰!

正因為家中有兩罐2號仔的sample,所以又即管一試,如果便便變硬,就改番1號仔啦!So far,OK!!

*********************************

1月25日,結婚三周年,舉家同D世叔佰食飯,這個慶祝方法真特別.
世叔佰為老豆的中學同學,老死,世叔佰都在同年出世,改名"豬記會".
小時候,他們每月聚會一次,媽會帶著我們一同出席,和其他小朋友玩,好開心!
現在,那些小朋友大多移居外地,沒聯絡了,留下的仍是豬記會的老朋友每兩三個月聚會一次.
對上一次出席,是我要同他們宣佈結婚,上次帶左一條仔去,再見面又帶多一條仔去,哈,下次見面,唔知又會點呢?
老豆...老了,豬記會的世叔伯,亦老了,最鐘意講"舊屎"--舊史,什麼--你結婚時我做你伴郎架,亞巧欣你細個時係點點點架......
嘻嘻哈哈的走進6字頭,仍然每次都可約到最少10個出來,老豆,你同你的豬記會,好勁呀!

**********************************

真正慶祝結婚三周年的節目,是萬千師奶賀台慶,在歡樂聲中渡過了三小時,欣賞詹SIR的整個Body嘅演出,有種莫名的吸引力...你未睇過!值得一睇!!

沒有奶奶的日子

近兩週,沒蒲頭,沒露面,只因一家要適應新生活...

奶庫由光輝歲月末落輪為一點點宵夜,一口甜品,以往那"谷谷"的感覺,一點也沒有,換來是被主子啜個乾塘的亦未夠喉,哭著地叫奶奶...奶奶...奶奶...

臨睡前以為被主子親親,啜啜,他便可以安然入睡,誰知大人未飽,結果要開奶...

零晨時份,天寒地凍,習慣啜啜的主子,發現奶庫乾塘,哭訴...未能再入睡,老爸唯有冒著嚴寒,起身沖奶,5安...6安...7安...也統統清.

清晨時份,仍是天寒地凍,同樣也是習慣啜啜的主子...老媽因為被啜至虛脫,害怕了,索性叫老爸沖奶吧...怕他飲得太多,頂多只開4-5安吧.

早上起來,老媽自知奶奶鬆鬆的,估計奶量不多了,也已改為沖奶吧...

那些埋身餵的方便,從此不復再,家中換來添置了新成員,電熱水瓶.

老爸老媽要適應要學習,究竟要開幾多安奶,主子才足夠,究竟幾時要飲奶,幾時要抱抱...

為何我好像變了個新手媽媽??為何我好像不了解他??習慣了半夜醒來便可有媽媽啜啜的,現在郤被媽阻止,不停地叫媽媽,"你快點解開衫鈕吧!"

見到媽媽換衫,見到他熟悉的奶奶,即時手口並用地齊聲--奶奶.

係呀,係奶奶呀,但內裡空空如也喇,變作臨睡前的甜品,好嗎?

手指脫皮

天天手指仔,指頭無名的脫皮,上週開始先是兩隻食指和一隻手指公,及後陸續在其他手指頭出現,這怪怪的表現,當然第一時間找醫師.

醫師未有確實表明是什麼病,只問到:最近有冇掂到d咩野呀?估計都係d敏感啫!

醫師...一個13個月大的bb,當然咩野都會摸啦,我那知他那時那刻摸著什麼呢!!心想.

婆婆想了好幾遍,都估計敏感源頭是否用了超市牌的濕紙巾抹手所致.最後,醫師亦給了藥膏,並說要搽兩至三個星期先會痊癒.

敏感,我好怕,皮膚敏感我更怕,天天早前已出過兩次濕疹,都是衣物質地所引起,不是所謂尼龍呀纖維呀等質地,而是純棉質料,但卻以朱地抓毛等方式展現那種,所以現在買衣服真的要很小心!

突然有個估計,未知他的皮膚敏感與我懷孕期內無戎蝦有冇關係呢?!

昂坪之旅

前日,大鄉里出省,帶著10個家長到昂坪-->大佛-->心經簡林,半日遊!

由於臨時被徵召帶隊,未能作site visit,只能在網上盡找資料,好彩,一切順利!

家長也笑言:你咁大個女都未黎過呀?

哈,又真係咁大個女都未黎過喎!!

為免讓天天大個後遇到相同情況,回家後馬上同老公度期,打算帶他去一趟,免得成家都係大鄉里(後來先知,老公都未去過呀!)

獨個兒帶著10個家長旅行,不講得吃力,但亦不是好輕鬆,事關當中有7個已年過65,都為長者,上大佛時真的有點慌,怕他們地滑跌倒,又怕他們穿衣不足會著涼,話晒都係山頂呀!

沿途,個別家長又會黏著,分享家事國事婆媳事仔女事,總知一切煩擾著他/她的,都想找個人聽,找個人俾意見,但到某位置,總要停下來先為大家作個安頓,不得不打斷其分享情緒同雅興!使得他們不可暢所欲言!

好怕他們的傷口,未有在包裹得好好地就完事,怕他們回家後仍有餘波,回中心後即與各負責同事分享,好讓盡早為他們作出支援.

這...是我的工作.
這...是我喜歡的...與人一同成長,經歷的工作.
縱使未能即時解決,釋懷,我仍願意作你們的同行者!

小玩意

天天近日新玩意:

1. 到大廈大堂見到管理員姐姐,即豬咀.

2. 要他表示唔該多謝時,表演公公向老佛爺請安式--札!

3. 發現廁所的廁紙是可以拉的,便經常拉著行出廳,行入房,行到廚房後,又會返到廁所檢查廁紙有冇斷到.


冇限制地盡情體驗,是我希望讓他擁有的,但有時總要現實一點,不斷的將新廁紙拆下包裝,又似乎過份一點了,所以此玩意已被沒收,下次需要開新廁紙時才邀請你來幫忙吧!

長洲後記

在長洲的時間,並沒有覺得漫長,但總是在空餘時間想起天天,想起老公,導師講書期間不能用電話,唯有sms,簡單的幾個短訊,帶出了幾份關懷!

每年總得有個日子要離家出走,去年因放ML,可以避過一次,今年再無藉口,老公為此由12月已開始擔休,結果,這個離家日子,亦是一家三口分開的日子,我...人在長洲,老公...人在家,天天...人在婆婆家,三口子都要面對同經驗一個全新畫面...一晚.

我,導師教導放鬆運動--拉筋,結果弄得背痛,睡至4AM已時睡時醒,結果6AM爬去床,獨個兒行山去.
老公,為免在婆婆家見到天天,怕他因此而不肯留在婆婆家,結果在樓下行過而不敢上去,有仔不能見使他感到難受.
天天,太習慣睡醒後啜啜啜,在婆婆身旁轉來轉去,為求找到啜啜啜,當然未能得逞,結果4AM便鬼打咁精神地四圍行,7AM再瞓.

兩個甜心未有到IFC接我,因為一個太倦一個病了!

回家,見到天天,即變了一顆樹,被一隻樹熊黏著半句鐘才放手,感覺多好!被主子徵召餵飯,下人多願意啊.但主子未能調校時羞,所以4AM醒了,至昨晚才回覆正常.

一個退修營,為我們一家帶來好的一課,是我們不能份開啊!

家,我愛您!

一個人在床上

相處了13個月2星期零3日,聽晚,是第一個不同睡的日子,你會否掛住我呢?

到婆婆家要自己瞓床仔,唔可以同媽咪一齊瞓,冇得半夜叫"媽媽媽媽"然後啜啜啜,你會否習慣呀?

媽,半夜發現仔仔不在身旁,不用替其蓋被抹汗摸pat睇吓有冇尿濕,媽能安睡嗎?

媽在長洲,你會否掛住我?

媽,情願半夜不停被你叫醒,不停被你開口"媽媽媽媽",也不願一個人在床上.

媽,開始發現,不習慣的是媽而不是你啊!

你和爸後日到IFC接媽,好嗎?

身教的重要

到梁醫生診所打水豆針,護士姑娘提到其2歲女兒在玩醫生遊戲時,一天拿著玩具針筒對住其大脾"咭"落去並呀~了一聲,她驚嘆其女兒在不知不覺間學會這個經驗!(因為其女兒每次打防疫針,都是由其母親自操刀呢!)

每日早晚都是媽咪護膚的時光,生了孩子後,無花太多金錢在護膚品上,只搽上a cream同凡士林而已,一天,孩子發現可以用口部揭開凡士林的蓋,自此經常在媽咪塗搽時搶去,昨晚,媽咪如常地搽,孩子如常地搶過來玩,突然,孩子將手指插進凡士林,塗了少許在手指仔上,因後~呀~的叫了我一聲,之後將手指仔伸到我咀邊!

哈,每日重覆著自覺不經意的動作,原來也在對孩子起了作用,由此可以,身教是如此重要啊,切忌在他們面前說粗口啊!不然有一天被他們用之來問候一番就冇謂喇!

生日快樂

經驗過生產的女性,會得到:"原來生仔係咁嘅"的體會.對我而言,除了得到這個體驗外,還真真正正覺得:生日原來是要與父母一同慶祝渡過,還要感謝他們如此辛勞的湊大自己.

幼時,父母都會買來蛋糕慶祝,印象中只記得爸爸在我大概10歲時,送來新力牌的行路男人,從此便加入買cassette帶的行列,第一盒買的是beyond的第一隻唱片,之後有的偶像有草猛,再後期的有林志穎...

再大一點,"生日同父母一齊慶祝,有冇老土左d呀,梗係同friend玩通頂啦!"就成了青春期的我的一個理所當然的想法,相信天天到時都會一樣,因為...我們都是這樣長大的.

再大一點點,生日便成了與情侶慶祝的大日子,忘了情侶的生日,簡直是死罪......

不知是否已一把年紀呢,去年和今年的生日,總想平靜地渡過,收過老公有心思的禮物後,覺得真的沒有嫁錯郎,老公,多謝你的包容及愛護,還有那精緻的耳環啊!

今年生日,一家三口與公公婆婆慶祝吧,每每與婆婆講及自己出世那天的情況,就覺得那個年代生孩子比現在辛苦上100倍啊!

媽媽,多謝你的辛勞!爸爸,多謝你的照顧及教導.細佬,多謝你陪伴我一同成長!

打韆鞦

見到朗朗成日都可以去打韆鞦,好羨慕,因為我住的一區,竟然冇一個可供bb玩的韆鞦,最近訪尋之下,得知親戚家的平台有個兒童遊樂場,內裡除了有韆鞦外,還有氹氹轉及搖搖板,不過因為之後先知有搖搖板,所以冇玩到!

咁大個仔第一次打韆鞦,天天好開心,玩到唔太捨得走,但因為那天是1/1/08,天氣好凍,又乾燥,那些玩意靜電好勁,所以都係玩一陣便走了,下次吧!

男兒膝下有??

自識行以後,每次回到屋苑大閘前,天天例必伸手問我們取智能咭,簡稱do,發音時咀微微伸向前!入閘以後,便是自由行的時間,可能地面與他平日見到的有好大分別,我家是木地板,婆婆家則鋪了磚地板,所以,他每次都會望它一輪,才會慢慢的行入大堂!

拍下這幾張相後,感覺好特別,小孩子看世界,喂,你看到什麼呀,男兒膝下有黃金?

小朋友聚會

有幸參加0607小朋友的聚會,這個0611的天天,也不失禮...個size!但論與小朋友互動玩耍的技巧,則尚欠成熟,簡單點說:未識同人玩.只有自己四圍行,拿著藍mama帶來的帽子,把玩著那些閃爍爍的彩帶,到最後,便夾硬將之拉下並放到口中!破壞王是也!!

玩了一句鐘,終於與其他小朋友,合力玩搬椅子!

同場一睹成日在網上見到的一眾媽媽同bb--朗朗,藍藍,cara,子靛,莫仔仔等等,還有他們從未在blog上露相的爸爸!感覺好特別,發現自己還是慢熱一點,又或是只掛住睇住隻馬騮仔,跟住佢行來行去,都根本冇時間坐下與一眾媽媽認識閒談,所以只能淺談,淺答!!實在可惜!!

其實還有的媽媽和bb我是認得啊,因為在他們之前的聚會相片中見過面,但還是未能記得名字呢,希望再有機會見面呀!

聚會能與大隻必必作個實戰比併,連必必爸也驚嘆,有個細過必必的孩子,竟然會仲重!

但不要忘記,必必出牙仔的數量,贏得清脆利落!

得到各奶媽的鼓勵,是另一個驚喜,12月開始掛泵,到現在已好一段時間,感覺好好,因為實在好輕鬆,而亦有各奶媽做sample,早晚埋身都可以餵到16-17個月,所以已經豁出去了!

談到kindermusik,因家住新界,所以未有join九龍區的課程,只在區內一個playgroup上,但上完feathers後,導師表示會開番do-si-do,同時仲叫我:不如join我地個playgroup啦,媽咪唔使咁辛苦架!

我好enjoy同天天一齊聽住音樂跳來跳去喎!!又係一個煩惱了!唔通真的要到九龍續課?

聖誕節快樂

2007年12月26日,行草地,拔草,睇龜,到爬蟲館狂奔,尖叫...

過一個綠色,原野的boxing day.

對於需要輪班工作的我倆,大時大節可以一齊同慶,絕非必然,不過我已習慣了,所以亦無所謂,聖誕節老公要開工,唯有同個仔去接佢收工,順便到新開的toys R us買玩具,嘩!多人到爆,行到行唔到!!但唔知點解都可以買到兩份玩具俾天天,時下的兒童...真幸福!

回想幼時,平安夜真的會掛一隻襪在床頭,等到第二朝醒來,見到"聖誕老人"所送的聖誕禮物,哈,聖誕老人派禮物呀!但...家中沒有煙囪,點入屋呀!

媽媽:"佢按門鐘入來啊,我咪開門俾佢囉!"

我:"點解我聽唔到門鐘聲嘅?"

媽媽:"你懶瞓囉!"

一直相信媽媽的說話,直到有一年,媽媽以為我已入睡,正打算與我爸出門口,被我發現,即問當時同住的嬤嬤:"佢地咁夜仲去邊呀?"

嬤嬤不懂說謊,戲也不好,糊里糊塗的說了一些聽唔明的字句,之後著我返房瞓!

之後,我就發現,爸媽在半夜放了份禮物在那隻襪中!從此,相信聖誕老人的想法...破滅了!

我和老公,何時開始會成為神秘的聖誕老人呢,又,何時會被揭穿呢?

無論如何,天天,你仍然會是我們的心肝寶貝,無論會否被揭穿,我們也願意一起與你共渡每一個聖誕節,但願你長大後不厭棄!

聖誕節快樂!

掛泵

隨著這數天因工作而未能在午餐後泵奶,接下來,人開始有墜性,覺得:

"都13個月喇!已經好叻,超額完成!"

"中午冇泵,留番夜晚臨瞓先埋身食,亞仔好似食得多d喎!"

"唔使帶咁多架餐返工,真係好輕鬆!"

"其他奶媽都係咁尚下時間淨係早晚埋身食,都可以餵到16-17個月喎......"

俾左好多好多藉口自己,今日出門口,同老公講:"哎吔,今日冇帶到泵返工呀!我今日應該有時間可以泵架!"

老公:"算啦,你都泵左13個月喇,就算俾你每日泵到4安5安,又唔夠亞仔食,又要補少少奶粉,不如淨係見到你嘅時候先有得食啦!"

(老公心底裡:老婆,你都埋身餵左13個月喇,係時候俾番個機會我餵亞仔食奶奶啦,唔好再霸住個餵奶位喇!!)

hi,奶粉

老婆：『老公，唔該你o係個櫃度攞罐奶粉落黎吖』

老公：『做咩野無端端要攞奶粉呀』

老婆：『.................』

亞仔：『爸爸呀呀呀~~~』

老公：『吓，無媽咪奶食喇』

老婆：『係呀，個冰箱得番4包4安嘅冰奶咋，點夠呢個大食仔食呀』

亞仔：『啪啪啪~~~』(我想大概意思係：係呀係呀，成日都食到到喉唔到肺咁。)

久咳+冇奶

久咳未癒,尤其晚上,喉嚨總是癢癢的,但不想看大夫啊,只怕服藥後令已經產少的我變得更缺貨,奶庫...只餘下4包奶咋!!還有每包都不過是4-5安,亞仔食完還哭著,婆婆認為開多一包會浪費,所以堅持只食一包,婆婆又表示亞仔已經可以食雜糧,不夠可以食其他代替,例如麵包,所以又冇開多包冰奶,又冇補奶粉!!其實得唔得架!!

謝謝麗麗

多謝麗麗嘅心思,i like it!!

悠長假期...終於完結

悠長假期,昨日終於結束,今日一切回覆正常,照舊7:30AM婆婆到我家接仔走,坐回那部"冇得瞓低"的士的車,冇時冇候的顛倒生活亦離我兒而去,不用每天都與傻爸媽去街去街又去街,對天天來說,可能是個解脫吧!

假期前,興高采烈地與小朋友研究去這去那(其實係兩公婆自己覺得好玩啫!)誰知小朋友未夠份量,小氣,除傷風外,去廸廸尼那天,不知是否被抓毛褲焗到,野到兩個大脾仔同膝頭哥以至小腿都長滿點點,初時不以為然,及後見久久未痊,往找大夫,大夫一診,即道:攪得唔好,可大可小,手尾好長啊!

唔係呀,我個仔點解會生濕疹架!大夫花了一點時間講解今次要搽類固醇的原因,唉,你叫到要搽,唔通我仲話唔好咩!

總括這個假期,我兩公婆做到嘅係:陪仔...睇醫生,餵藥水,去廸廸尼,食左個自助餐,BBQ左一晚,同賴低個仔,拍左兩次拖!!

那些陪仔陪爸陪媽後遺症出晒黎呀,仔唔捨得亞媽走,哭著叫媽媽媽,媽唔捨得離開個仔,起勢叫仔仔,唔好再咁痴纏叫媽媽媽啦,爸爸見狀只好話,你兩個係咪當我透明架!

你呢腳...我接硬喇

被nikita凌空一踢,差點跌低,幸好寶刀未老,來個側手翻後將之接實.

1. 小時候的理想是什麼？
好簡單,嫁個好老公,有自己的小朋友!

2. 這輩子最快樂的是什麼事？
嫁到個好老公,有個覺得好得意嘅乖仔!

3. 你喜歡的顏色？
五顏六色

4. 你有多久沒有傻笑了？
晚上個仔玩玩具時才笑完

5. 你最想去哪個地方？為什麼？
東南亞的小島,即係好似"夏日的嬤嬤茶"中個d,陽光海灘,正!

6. 最受不了自己哪個缺點？
對人挑剔,真係要改喇!

7. 如果有不開心的事情，你會怎麼辦？
同屋企人大呻特呻

8. 四季裡喜歡哪一季?
夏天

9. 五年內比較現實的目標是什麼？
儲番個錢,生多個小朋友

10. 如果你得了絕症你會跟家人講嗎？
會

11. 說出點你名的人(nikita) 的3個優點？
好肯幫人,好肯分享經驗,好正義

12. 孤獨是什麼？
身邊冇值得信任嘅朋友

13. 喜歡什麼類型的人？
做事認真

14. 你對你的近況滿意嗎？有什麼需要改？
尚算滿意,因為正放大假,放完後就要積極投入工作喇

15. 覺得自己會幾歲結婚、生孩子？
以前覺得三十歲前一定要完成

16. 去過最美的地方是哪裡？
台灣

17. 你吃過最好吃的是什麼？
媽咪佳餚靚湯

18. 如果能讓你實現一個願望，會是什麼？
每個人都活在當下

19. 喜歡怎樣的二人世界生活？
二人世界生活的同時亦有私人空間,互相尊重

20. 如果被喜歡的人拒絕，怎麼辦？
搵過第二個,食番餐勁先講

學步音樂玩具

叔叔嬸嬸送贈學步音樂玩具,一於一返到屋企就玩.