1/5/09去勞動--遊山

河背到雷公田，平坦+少許上斜，小朋友+老人家郊外遊好路線，重要的是，尾站有得醫肚，但天氣開始熱了，下次再行，睇怕係帶埋弟弟一齊囉。

30/4/09赤柱遊

有孫萬事足

此圖，足以証明，有孫萬事足，連珍寶珠都咁好味啊。

14/4/09又係西貢艇釣

打從天天18個月開始，艇釣已是他陪其老豆的一個必選節目，出海...不一定要釣魚，這是我參與艇釣的一貫立場！所以，雖然只有老公同婆婆喜歡釣魚，但我們一齊出海也能自得其樂！

包括，享受有海風伴隨住不停食的我。

包括，一邊飲啤酒，一邊追小說的公公。

包括，赤腳奔走，看著大海大樹木老鷹，剛被老豆釣上來又可放在手上把玩的八爪魚，剛放進冰箱垂死得彈彈吓的小魚，哈哈大笑的天天。

11/4/09南丫島遊

復活節假期，到南丫島一遊，仲多人過旺角，但勝在空氣好，看那天天、老公、老豆多投入的樣子，已經很滿足了。

11人馬交遊遊走走

一家人，連大連細連弟弟，一行十一人，到馬交遊遊走走，享受一家人聚在一起的美好溫馨時光，咀吧食不停的喪食之旅，完滿結束。

人多的好處，便是可以食盡餐廳中的所有美食，閒閒地叫6-8個餸，一齊食餐飽。

行程之完美和豐富，有賴知深的領隊帶領，走過大街小巷，尋找隱世美食，欲遇上草堆街兆記休息之日，唯有轉戰營地街市3/F，打道回PONTE 16途中，遇上頤德行，大三巴途中，買到差一個便售罄的潘榮記，法蘭度1蚊5個波，玩到個個變細路哥，天天可以趴在浴缸當泳池，一樂也。

所以他是『大贏家』，為兩老帶來豐厚的零用錢。

天天除了成為兩日最開心的團友外，還為馬交注下巨資，『起高瘤』，實行以一招坎頭埋牆來娛賓，攪到自己又喊，嬸嬸又喊，下次唔好喊喇。

下次行程安排，由叔叔嬸嬸安排，一行十三人，去『大飽口福』。

係天天，唔係BB呀。

在電梯內，

入電梯的小女孩，見天天坐在嬰兒車上，

『BB呀。』

天天的回應係，

『係天天，唔係BB呀。』

之後大家便一起步出電梯。

天天。無聊日記

很久以前，老公買了隻麥兜CD，天天一歲左右發現，嚷著要聽。

前排，明明見到他從CD機中取出它，之後，它便不見了。我們懷疑，他將之掉了落街！

隨後，他久不久便話要聽，為滿足小子的要求，我同老公訪尋多間CD店舖，最後在九龍塘找到，此後每晚，我們一家三口躺在床上，聽住麥兜歌聲，進入夢鄉。

亦因為潛移默化的關係，天天已懂唱『我個名叫麥兜兜...』。

*****************

天天近日成日都問：『媽咪做咩野呀？』

答了他：『媽咪掛緊衫呀！』

『媽咪做咩野呀？』

『都話掛緊衫咯！』

『媽咪做咩野呀？』

把幾火，『天天做咩野呀？』

之後大笑，冇再問。被人玩完後的我，都唔知可以做咩野。

*****************

每次著鞋，

『我地去邊度呀？』

******************

星期日下午，經過天天8月會返的幼稚園。

『我要返學呀。』

『係呀，天天8月就返學喇。』

開始扭計，

『天天要返學呀，要孭書包呀。』

『媽咪知道，不過都未做校服，要到8月先返喎。』

繼續扭計。

『你睇吓，學校都冇開門，星期日老師放假呀。』

望一望個鐵閘，

『哦。老師放假呀，冇得返學咯。』

細佬，你究竟知唔知返學係咩野一回事呢？

孕婦。湊仔。幻想

醫生話，第二胎會快D感受到胎動。14週可以嗎？最近隱約覺得肚臍下方有突然的彈動，意識到後欲想確定，便沒了！

胃口好像好了點，對『飯』開口了，在意識控制下，可以不吃薯片，不喝汽水。

上星期到健康院檢查，懷孕首階段，重了4磅，希望今胎我能夠順利做好體重控制，唔使又大一個碼啦。不過以咁為食的我而言，我...期實都冇咩野信心啊，過多幾個星期可以游水，要加緊努力呀。

昨日在車站等老公收工，重溫我們一家三口去年到東京玩的照片，好令人回味。與老公會合後，我話睇番一齊去旅行嘅相，真係好開心，老公都話係，之後我地一齊計劃下一個4人行的旅程，真係幻想吓都好開心，有左第一個的經驗，就算第時二帶二，我地都覺得冇難度。

自從知道肚裡的是弟弟，天天便改口了：『媽咪肚dum入面有弟弟。』
但唔知點解，之後又會話：『妹妹o係天天個肚dum度呀！』

我迫於無耐：『天天，冇妹妹呀！(媽咪冇打算生第三個喇！)』
唯有：『天天，或者(堂)妹妹o係叔叔嬸嬸度呀！』

今早瞓醒，
『媽咪早晨，弟弟早晨。。。妹妹o係叔叔度呀！』

叔叔嬸嬸，你地努力喇，靠晒你地呀！

營養

在遊戲室與小朋友玩，被問到：

『你個仔幾大個呀？』

『兩歲多d啦！』

(通常都好少講得好清楚--兩歲三個月...)

『咁佢好高喎。』

與她那三歲兒子相比，天天的確係高，因為仲高了成吋。

回家，拿來輕尺。

『天天，企埋黎度吓你有幾高。』

94cm。

拿出健康院的兒童健康紀錄--身高那頁，才知他的高度是最高那條生長線。

懷著弟弟比天天辛苦，奶奶說第二胎是會辛苦些，我雖然能吃，但吃後胃裡總是滿有胃氣，胃酸更是多得不能再多，總有頂住頂住的感覺，而且對『飯』總是提不起勁，但對一眾零食、汽水、M記等食物特別喜愛。

若果天天之所以會咁大隻，係因為我懷著他時所給予的營養好，那我現在便担心弟弟了。

名次

昨日，學校派發成績表。

和老公在街上，看見一位母親與兒子，母親大聲地對兒子說：

『我唔該你下次考試，要考到10名以內呀，如果唔係，你唔使.......』

(聽得不太清楚其母話唔使咩野！)

我和老公行過了數步後，我便說：

『真係辛苦喇！』

老公竟有這個回應，引來大笑：

『如果我係佢個仔，我就會同亞媽講：』

『亞媽，唔該你每個月最少要搵10萬蚊返黎呀，如果唔係，你唔好返黎見我！』

~~~~~~~~~~~~~

老公，我同你立場一致。

『你唔好嘈啦』

今日，不知從那裡學會：

『你唔好嘈啦！』

是我，真的很嘈，迫使你要直接對我說。

還是只是一句無意思的說話呢。

尿片

『天天，痾左尿未呀，痾左就黎著片片喇，要瞓覺喇。』

『媽咪，攞多條俾弟弟吖。』

~~將條尿片放在我肚皮處~~

『媽咪，攞多條俾猴子吖。』

~~將尿片揭開如上圖，咁就叫著左。~~

『媽咪，攞多條俾福娃吖。』

~~動作同上~~

如是這，每晚臨睡前，要攞4條尿片出來，一條真係用的，其餘三條當玩具。

在職媽咪實在無閒在晚上實施戒片行動，唯有由他慢慢戒掉吧！

心跳

終於，隔著肚皮，聽到你的心跳。

雖然有天天哥哥的經驗，但再次懷孕，心情仍是興奮。

多謝你，天天弟弟。

*********************

由於醫生應診中途去了執仔，最後10:50pm才離開診所，回到家已是11:30pm，答應天天哥哥我們一同回家，所以雖然很晚，但仍然到婆婆家，如他已入睡便抱他回家吧。

可是一開門，即聽到哭聲和急步聲，開燈見天天哥哥帶著紅紅雙眼撲到懷中。心裡有種說不出的難受，抱了一會才接受爸媽這麼晚才來接，和知道『回家喇』！

12周的OSCAR

12周完成OSCAR檢查，報告為低風險。

照肚時，醫生笑笑口地問：『第幾胎呀？』

『已經有個仔喇！』

『咁知道呢個係仔定女未？』

『未知呀，已經睇到喇？』

『8-9成啦。你個BB反轉左喎，你去洗手間，轉頭再照多次啦！』

*************************

『老公，你想係仔定女呀？』

『冇所謂啦：)』

『嬤嬤婆婆想係女喎，天天又成日話想要妹妹！』

『不過我覺得係仔！』

『老公，我都覺得係呀！』

~~~~(大笑)~~~~

*************************

醫生：『今次個位好好多喇！你地想係仔定女呀？』

老公：『有所謂啦，不過屋企嘅老人家就想係女囉！』

『咁要等下次喇，呢個係仔喎！』

**************************

回家後，

『天天，原來媽咪肚DUM入面嘅係弟弟呀！』

『妹妹呢？』

『唔係妹妹喎！』

~~(笑笑口)~~『係妹妹呀！』

『哎呀，唔會有妹妹喇，再生都會係仔架，你老豆果條線生仔多架，再追又係仔咁點算呀！』

~~~(天天已經行左去玩車)~~~

『叫弟弟同你一齊玩車好唔好？』

『好！打網球吖！(意思係羽毛球)』

情人節翌日的精彩家庭樂

情人節，我們享受與家人在一起的時刻，縱然老公要返P，但亦享受，享受著我們心在一起，彼此關愛對方。

送給家人和老公的情人節禮物，除了和他們一起晚餐，享受平靜而溫馨的家庭樂，我還送上葉問，戲種是老豆同老公都喜歡的功夫片。OK啦：)

情人節慶祝活動，安排在15/2/09星期天進行，得到叔叔嬸嬸應約要在早上集合，對他們來說簡直係奇蹟，又正好反映他們亦重視今次的約會！

又是老公精緻預備美味食物，讓我們都在星期天享受大自然氣息與家庭樂的喜樂，老公，又要多謝你喇！