小朋友在遊戲室玩耍,除了真的去『玩』外,學習如何與人相處亦是重要一環(最少我是這樣認為!)
當天天正在玩車時,如果有另一小朋友行近表示又想玩,作為母親的,會算算孩子玩了多久,若只是剛坐下玩,我會告訴他:『有其他小朋友都想玩喎,你玩多一陣就俾人玩喇!』
天天聽後通常坐多...約30秒便離開,給別人玩。好孩子!
當天天到達遊戲室,見玩具車有人玩時,都會對我說:『要排隊呀,唔好爭呀』,又或是『等人玩完先』等說話,我當然浮誇地說:『係呀,你講得好啱喎!』跟住我會叫他玩住其他玩具先,等見到玩具車無人玩先去玩,他會用其鋒利的眼睛,不時望住玩具車,見無人玩便會飛奔過去,坐下後對我說:『啱喇,輪住玩,依家無人玩,到天天玩喇!』
如是者,可能是剛坐下不久,又會有其他小朋友行近玩具車,表示想玩,因為重覆地教他『要讓他人,玩具是一齊分享的,不可以霸住來玩,要守規矩輪住玩』等等道理,他又會玩了一會便讓給他人...
曾問自己:這樣教仔,好嗎?
想教的,全是品格教育,有好的品格,不但別人會喜歡自己,更重要的,是自身一世受用!
品格好,自然會懂得關心他人,懂得愛護他人,懂知足懂滿足,最後得益最大的,也是自己!
不過每次到遊戲室,我所遇到的事情,總會對我所抱有的『教仔理念』給予衝擊!
玩具車被小朋友坐著,在我眼見,他已坐了近10分鐘了,天天時不時便走到玩具車後:『天天想玩!』
『玩具車有小朋友玩緊喎,等小朋友玩完先啦,你去玩住其他玩具,等小朋友玩完就輪到你玩!』
又過了5分鐘...天天又再行到玩具車後面,那個在我眼內已經玩了那玩具車成15分鐘的小朋友,依然若無其視地玩著,我,當然不會去怪他,再大的他也只不過是個小朋友,我要怪要嬲要激氣的,是那坐在一旁繼續以『欣賞』的眼神去看著他兒子如何玩車玩得好開心的父親!
喂,人家老豆,你個乖仔霸住架玩具車成15分鐘喇,我地一入黎已經見到你個仔玩緊喇,即係話一定唔只15分鐘啦,你有冇見到個場唔係得你個仔一個呀,有其他小朋友架,就算你個仔真係好鐘意玩車,都唔係霸住架,你覺唔覺得你應該介入吓呢?
當然,佢係冇理到我地啦!
我唯有繼續堅持我教天天的立場:『哥哥仲玩緊呀,你玩第二樣玩具啦!』
小朋友耐性低,見架車等咁耐都未有得玩,開始縮短『等』的過程,甚至曾想過以『拉起那個哥哥』的方式以使他可以成功玩車車,這個動作完全違反了為娘的品格教育理念,當然被即時喝止!
為了好完場,我這樣對天天說:『車車被哥哥玩緊,今日可能玩唔到喇,(開始扭身扭勢),哥哥霸住車車,你冇得玩,你開唔開心呀?』
『唔開心!』(繼續扭身扭勢)
『咁我地同小朋友玩玩具,記得要一齊玩,輪住玩,咁先會開心喎!』
『唔輪住玩呢?』(唔知點解佢成日都會反問番我!)
『唔輪住玩,自己霸住玩,其他人咪冇得玩囉,咁咪唔開心囉,你依家開唔開心吖?』
『唔開心呀,天天冇得玩呀!』
『係呀,不過我地願諒哥哥啦,下次先再同車車玩,媽咪同你去樓下玩滑梯,好唔好?』
『好。』
*********************
過程中,我唔知道天天會否覺得不開心:點解哥哥唔係輪住玩嘅,點解今日無得玩車車呀,點解媽咪教我要同人一齊玩玩具,要分享,要禮讓,但其他小朋友唔係咁嘅...又或係:點解媽咪唔幫我同哥哥講,佢已經玩左好耐喇,點解佢唔讓我但又要我讓佢呀...(其實我諗呢個係我嘅想法!)
每人的想法與自己的,一定有別,因為每個人都是一個獨特的個體,想法只有分『差距大』和『較相近』,正如作為父母的,也是如此,遇上教育理念想近的,同樣情況其父母一定會話:『已經玩左好耐喇,要讓人地玩呀』,遇上理念差距大的,便會有今日的情況,我可以做的,只有教導天天:改變自己啦,別人是改變不了的,他不肯讓你玩車,打他罵他不是解決的方法,知道冇車玩這個經驗不好受,輪到自己玩車時,便不要重覆霸住的行為。
但講到尾,作為父母,都要盡責一點吧,個細路唔識,你係大人,你都識卦,最嬲係連聲都唔聲喎,我做亞姨嘅,開口同你個仔講咩,到時你就會問我,憑咩野去教你個仔,我自己唔識教咩...
對唔住,你問我,我覺得你真係唔識囉!
9 則留言:
講得啱,呢d 人好恐佈,眼中只看到自己。
自私的父母終有自私的孩子, 身教係最最最有效的教仔方法。最緊要係繼續以身作則, 教好自己的子女。
nikita & 地下A室:
係呀,我地以及我地嘅下一代,會繼續遇到呢類人,要好好學習同教育應如何面對。
無錯,自從生左仔後,不斷受到教仔衝擊,正確觀念用係現實世界,好多時都唔 work,常常令我無名火起或者「o 晒嘴」。
無計,我地唔能夠影響他人,只有好好地教好自己個細路,只希望呢世界少一個橫蠻無禮o既人囉。
May,
曾經遇過,在遊樂場排隊玩鞦韆,明明輪到自己個仔玩,竟然被另外的細佬搶左,佢老豆仲笑晒咀咁企o係旁邊笑,我咪即刻同個細佬講『你想玩係要排隊架喎,依家輪到呢個小朋友喇』
我都驚個老豆發爛架,不過好彩最後都冇!
睇完件事, 真係好無奈同好憤怒.
有無攪錯, 啲人自私唔夠, 仲要訓練和培育到個仔都好自私、唔識同其他人共處、唔識自重和尊重人. 社會上, 第日如果多幾個好似呢位爸爸咁樣O既人, 就真係好弊好弊... 唉......
我其實好擔心"識教和有心教的人"唔生仔, 而同時, "唔識教又唔節育的人"係咁生係咁生, 咁樣, 日後社會的人口素質會變成點呢...... 真係好難避免呢個現象浮現, 但係, 作為社工, 點樣可以做返啲嘢呢?
品格教育, 人人都知道重要. 但呢家野又唔計分又唔駛考試, 入大學又唔計呢樣, 咁, 啲家長仍然會係好辛苦咁同啲仔女一齊在成績成績又成績的loop之中, 轉來轉去, 轉不出個好結果......
大哥大嫂, 你地已經教得天天好有品格. 繼續努力!! 天天會是社會上的好人和美善的泉源!
呀, 我漏講 --- 下次咪俾我遇到呢啲自私爸爸, 如果唔係, 我會走埋去訓示同勸導佢一輪, 佢鬧我都係咁話架嘞!
喂,你都好有潛質做個好媽媽喎,快d啦,唔係到老爺崔架喇!!
好忙. 未玩夠. 忡有心願要生仔前去達成. 未有心理準備. 未敢commit......
老公就完全未ready......
唯有辛苦阿老爺奶奶催多幾年啦~
發佈留言