EnjOy mY liFe TogEtheR witH my fAmiLy: 2007

2007年12月21日星期五

掛泵

隨著這數天因工作而未能在午餐後泵奶,接下來,人開始有墜性,覺得:

"都13個月喇!已經好叻,超額完成!"

"中午冇泵,留番夜晚臨瞓先埋身食,亞仔好似食得多d喎!"

"唔使帶咁多架餐返工,真係好輕鬆!"

"其他奶媽都係咁尚下時間淨係早晚埋身食,都可以餵到16-17個月喎......"

俾左好多好多藉口自己,今日出門口,同老公講:"哎吔,今日冇帶到泵返工呀!我今日應該有時間可以泵架!"

老公:"算啦,你都泵左13個月喇,就算俾你每日泵到4安5安,又唔夠亞仔食,又要補少少奶粉,不如淨係見到你嘅時候先有得食啦!"

(老公心底裡:老婆,你都埋身餵左13個月喇,係時候俾番個機會我餵亞仔食奶奶啦,唔好再霸住個餵奶位喇!!)

2007年12月12日星期三

hi,奶粉

老婆：『老公，唔該你o係個櫃度攞罐奶粉落黎吖』

老公：『做咩野無端端要攞奶粉呀』

老婆：『.................』

亞仔：『爸爸呀呀呀~~~』

老公：『吓，無媽咪奶食喇』

老婆：『係呀，個冰箱得番4包4安嘅冰奶咋，點夠呢個大食仔食呀』

亞仔：『啪啪啪~~~』(我想大概意思係：係呀係呀，成日都食到到喉唔到肺咁。)

2007年12月7日星期五

久咳+冇奶

久咳未癒,尤其晚上,喉嚨總是癢癢的,但不想看大夫啊,只怕服藥後令已經產少的我變得更缺貨,奶庫...只餘下4包奶咋!!還有每包都不過是4-5安,亞仔食完還哭著,婆婆認為開多一包會浪費,所以堅持只食一包,婆婆又表示亞仔已經可以食雜糧,不夠可以食其他代替,例如麵包,所以又冇開多包冰奶,又冇補奶粉!!其實得唔得架!!

2007年11月28日星期三

謝謝麗麗

多謝麗麗嘅心思,i like it!!

悠長假期...終於完結

悠長假期,昨日終於結束,今日一切回覆正常,照舊7:30AM婆婆到我家接仔走,坐回那部"冇得瞓低"的士的車,冇時冇候的顛倒生活亦離我兒而去,不用每天都與傻爸媽去街去街又去街,對天天來說,可能是個解脫吧!

假期前,興高采烈地與小朋友研究去這去那(其實係兩公婆自己覺得好玩啫!)誰知小朋友未夠份量,小氣,除傷風外,去廸廸尼那天,不知是否被抓毛褲焗到,野到兩個大脾仔同膝頭哥以至小腿都長滿點點,初時不以為然,及後見久久未痊,往找大夫,大夫一診,即道:攪得唔好,可大可小,手尾好長啊!

唔係呀,我個仔點解會生濕疹架!大夫花了一點時間講解今次要搽類固醇的原因,唉,你叫到要搽,唔通我仲話唔好咩!

總括這個假期,我兩公婆做到嘅係:陪仔...睇醫生,餵藥水,去廸廸尼,食左個自助餐,BBQ左一晚,同賴低個仔,拍左兩次拖!!

那些陪仔陪爸陪媽後遺症出晒黎呀,仔唔捨得亞媽走,哭著叫媽媽媽,媽唔捨得離開個仔,起勢叫仔仔,唔好再咁痴纏叫媽媽媽啦,爸爸見狀只好話,你兩個係咪當我透明架!

2007年11月23日星期五

你呢腳...我接硬喇

被nikita凌空一踢,差點跌低,幸好寶刀未老,來個側手翻後將之接實.

1. 小時候的理想是什麼？
好簡單,嫁個好老公,有自己的小朋友!

2. 這輩子最快樂的是什麼事？
嫁到個好老公,有個覺得好得意嘅乖仔!

3. 你喜歡的顏色？
五顏六色

4. 你有多久沒有傻笑了？
晚上個仔玩玩具時才笑完

5. 你最想去哪個地方？為什麼？
東南亞的小島,即係好似"夏日的嬤嬤茶"中個d,陽光海灘,正!

6. 最受不了自己哪個缺點？
對人挑剔,真係要改喇!

7. 如果有不開心的事情，你會怎麼辦？
同屋企人大呻特呻

8. 四季裡喜歡哪一季?
夏天

9. 五年內比較現實的目標是什麼？
儲番個錢,生多個小朋友

10. 如果你得了絕症你會跟家人講嗎？
會

11. 說出點你名的人(nikita) 的3個優點？
好肯幫人,好肯分享經驗,好正義

12. 孤獨是什麼？
身邊冇值得信任嘅朋友

13. 喜歡什麼類型的人？
做事認真

14. 你對你的近況滿意嗎？有什麼需要改？
尚算滿意,因為正放大假,放完後就要積極投入工作喇

15. 覺得自己會幾歲結婚、生孩子？
以前覺得三十歲前一定要完成

16. 去過最美的地方是哪裡？
台灣

17. 你吃過最好吃的是什麼？
媽咪佳餚靚湯

18. 如果能讓你實現一個願望，會是什麼？
每個人都活在當下

19. 喜歡怎樣的二人世界生活？
二人世界生活的同時亦有私人空間,互相尊重

20. 如果被喜歡的人拒絕，怎麼辦？
搵過第二個,食番餐勁先講

學步音樂玩具

叔叔嬸嬸送贈學步音樂玩具,一於一返到屋企就玩.

賀生辰

相約爺爺嬤嬤到紅點行街街,天天剔撻剔撻的拖著他們的手行呀行,好開心.

那兒已經有聖誕裝飾了,帶他到裝飾前面拍照,最喜歡的還是圓形物件.

晚上約埋叔叔嬸嬸慶祝天天生日,以馬拉糕作蛋糕,一樣咁開心,同場加演,古靈精怪衰樣作回贈,以示多謝出席這個簡單而隆重的生日派對.

2007年11月22日星期四

天天,一週歲生日快樂

去年的11月22日零晨12時10分,應是躺在床上,被盧醫生刺穿羊水膜,認真的陣痛便隨之而來...

再過2小時30分鐘,天天便哇哇落地,來到我和老公的懷抱中,還清楚記得我見到他的小蛋臉後,第一句和醫生說的話:"點解佢咁黑同咁紫色嘅!"醫生好似冇回答我,淨係講左句:"同你地一家人影張相吖!"

昨晚在娘家食飯及和天天預祝生日,切蛋糕,小孩子吃了第一口朱古力同cream,呵,出奇地沒有搶住食第二口,要我們教他才用手指沾小小!

母親在食飯時問:"舊年呢個時候佢未出世喎,你地仲記唔記得個時嘅心情呀?"

這一年過得實在充實,但待在病床等候迎接天天出世的心情和所做過的事,就好像剛發生了不久!記得自己還未食早餐就被送進醫院,得到護士批准只可食份三文治,到晚上8時許,見唔多對路,因為仲未有生得的蹟象,便問醫生可否再讓我吃點東西,我怕我唔夠力生呀,醫生叮囑不要吃得太飽,老公便買了個魚蛋米,而老公今日才表示,當時他確實好緊張,以至他由我入院的那一刻開始,便不停食!

記得自己生產完後,醫生給了點藥,令我睡至5am,第一個電話是給媽媽的,問了一句:"生完可唔可以食麥記餐呀?"媽竟答"可以"!不過老公最後都是買了個排骨飯給我!

12pm才是我醒後第一次與天天見面,記得那時心裡說了一句話:"呢個就係我個仔喇?"將他抱起,攬了一會,再認一認我們的手帶:"係喎,寫住我個名喎,睇真d似唔似我先,唔係一陣俾d姑娘調亂左個仔咪幣!"跟住就係要抱起佢,幫佢換片同餵佢食奶...

個感覺好陌生,個人有點慌,因為生產前只係為自己準備到生個時要做咩野,還未有時間想過當見到他第一眼時要做些什麼!好吧,硬著頭皮試著將他擁在懷內,哈,他似有反應的郁郁咀喎(其實依家想起來,這也不過是bb一些本能動作啫),心想他一定是個乖孩子!

之後每次餵完奶都不捨得將他放下,不捨離開他,之後他還要留在醫院照燈,不能一起回家,個一刻簡直癲左,好想同老公講:"不如我俾多一日住院錢,留o係醫院陪佢啦!"講真係有講到,但要求當然被拒絕啦!好不捨地回家去,翌日也不能到醫院探望他,真係好想鬧鬼個醫生!

終於在兩日後,天天可以回家啦,之後便展開生命另一個階段,過著另一個生活,因為他的出現,生活節奏,流程,習慣...通通改變!

零晨三色台的節目,無端端追看一番,連民間傳奇中的年輕汪亞姐同連個樣都唔認得嘅吳孟達,我同老公都睇得一餐,回想起都覺得好笑.

老公放完"陪產假"後(唔好以為有間公司咁好有呢個假,其實都係自己d大假啫!),我便開始單拖湊仔,又是另一番滋味,那時陪我過下午時段的,是"我們這一家"的花師奶",亦是成功擊退產後抑鬱症的良方!

復工後的我...雲遊太虛,準時返工收工,亦因為大家都需要適應有了天天後的生活,人而變得忟憎,好幾次和媽咪鬧得不快,最後用了搬屋這個方法令大家都舒服一點!

今天,看在我眼裡的天天,開始學步,開始牙牙學語,開始明白我們的指示,開始對我們的要求有回應,這一年,他由一個小粉團搖身一變成為這個模樣,我...只能說"好感動".

想帶他來這個世界時,我好想體會生命是好奇妙,好想體會人的不同階段,不同感受,這一年,這些想法統統達成,往後...我仍是冀望我們一家都能好好享受生命中每一個環節,好好感受生命每個奇妙的地方!

天天,一週歲生日快樂!

2007年11月20日星期二

廸廸尼半日遊

昨日再睇一次醫生,醫生給天天改了處方,今日鼻水已收,聲音仍有點沙啞,但無礙其四處活動的精力,爸媽決意讓你帶病玩樂,到了我們都未到過的地方遊玩半天!

去到才知今日沒有花車巡遊及放煙花,呵,沒有也擺,反正1歲人仔(仲有2日才到)玩半日都應該筋疲力盡,而且爸媽也只是一心"到此一遊"!

臨行前幸得公公陪同,才令旅程得以輕鬆一點.

小朋有正在學步,見到梯級兩眼發光,踏上踏落玩一餐!
仔呀仔,樓下公園都有得玩喎!

拖住行就最開心喇.

公公,今日辛苦晒!

未踏足過這個小樂園,都不相信...真的小得可憐,兩個回合就行完,今日帶著小孩,要安排他食粥仔,換尿片,食奶奶等項目,都已花了一點點時間,今日閒日又不是太多人,排隊都只是5-10分鐘,好難想像情侶檔怎能在這逗留一整天!

育嬰室設備尚算合格,不過餵哺房就只有兩間咁大把,好彩行快一步咋,如果唔係有排等!

整體今日體驗的都算可以,但總覺得去探威威司令會好玩一些,不過經驗話俾我地知,最好帶多個屋企人同行,咁兩公婆先唔會咁吃力呀!

2007年11月18日星期日

趕時間最怕...

每日都會盡量餵完天天食奶後才返工,有時真的好趕好趕,急步的行去車站時,好怕行在前面的是一個行的好慢好慢的打工仔

"大佬,返工時間,好趕架,行快兩步得唔得呀!"

**************************************

好艱難的行到車站,步上扶手電梯時,最怕遇著連體嬰

"喂,亞baby,知唔知咩野叫左行右企呀(雖然早前有個節目講搭扶手電梯時其實係應該企中間同雙手都要扶住扶手,但我又好少見到有人係咁囉!)要連體的話留番冇咁多人同冇咁趕時間時先連啦,放左工咪又見到囉,使唔使咁痴纏呀!"

"頂,走左班車喇,&%#%@!x$yz"

***************************************

返工前例必到7仔買鮮奶同葡萄適,遇著d唔多醒目嘅店員,又會令到自己一肚氣,排隊俾錢條龍長過鬼咁,收銀就得一個,收得錢黎又要幫手入膠袋,另外個個正在執報紙雜誌嘅姐姐,完全冇意識覺得要埋去幫吓手架,仲大無私樣咁企o係度喎,因為條龍阻住佢執吖嘛!唉,醒少少埋去幫吓手啦!

親子週

放完產假後,按需要斷斷續續的放了一日半日的大假,趁著天天一歲生日,這個星期和老公都取了大假,興致勃勃的安排好整個星期的節目行程...

18/11---參與1118廸欣湖活動
19/11---會展自助餐
20/11---澳門一天遊
21/11---返公司開個會!!
22/11---海洋公園
23/11---健康院發展監測檢查
24/11---同事gathering
25/11---kindermusik
26/11---尚在計劃中
27/11---打一歲針

但這精心安排的親子週,欲被無情的傷風感冒害的折腰了一半!

首先...
18/11---未能出席1118廸欣湖活動,因為天天還未痊癒

繼而...
公公和婆婆都被天天傳染了,雙雙患上傷風感冒,而嬤嬤又胃部不適,所以,
19/11---會展自助餐,取消了,擇日重賽

傷風感冒呢家野,又點會咁快好,所以...
20/11---只好取消澳門一天遊,改為在家好好休息

至於22/11以後的節目可否如期進行,現在仍是一個謎!

慶幸的,是湊了天天12個月的婆婆,無獨有偶在我們放大假時才患病,之前我經常擔心,若我要返工,而婆婆又患了病不能照顧天天時,我該怎辦呢!

2007年11月15日星期四

奶指急跌

情況越來越危急,今日奶指竟創新低,收市報4安,簡直係全年低位!

急call陸叔,睇吓有咩野對策,陸叔都係個句,要恆量自己的風險承受力...我尚未想脫身離場,唯有再急call高層,準備補補倉.

"媽咪,聽日可唔可以飲個魚尾煲木瓜湯呀,係呀,今日仲衰過琴日呀,得4安咋!"

2007年11月14日星期三

催生

家人聚在一同食飯,弟婦10次有9次都會被老爺催生仔...

"你睇吓天天幾得意!你睇吓大哥大嫂幾開心,幾幸福!你快d生喇,唔好做高齡產婦呀..."

"你讀完書就生喇,唔好再等幾年喇,年紀大生仔好辛苦架..."

"一個家庭有番個小朋友先開心架,最好生兩個,生夠三個都好架..."

有時講講吓,又會燒埋我個度...

"巧欣,生一個唔夠架,襯你未修身,快d生埋第二個啦,都係咁湊之嘛,唔會使得好多錢架,最多食飯加多雙筷子啫..."

我唔去深究老爺背後的想法,但若我有得揀,就絶唔會在呢個時候生第二個!

我已經兩年冇出國旅行喇,上次去旅行係2006年2月啊,若果現在又懷孕,咪即是又要等多兩年先可以去旅行!生兒育女無疑係一個階段,但作為在職媽媽,點都要透透氣啊,對我來說,出國旅行簡直係一個叉電器!所以,天天下週一歲生日,我同老公便攞了幾日大假,打算舉家到馬交走一走,黎個快叉吧!

奶奶不要停

每次閱覽各blogger奶媽,分享母乳生產商如何如何停工停產,甚至結業...心情都會沉一下,心想這個日子會何時降臨在我身上呢?可否在未來幾個月都不要來找我,雖然已經餵了11個月,尚有幾日便達標到12個月,但我喜歡天天攬住我食奶的時刻,我喜歡他揭起我衣服找到奶奶的高興表情,我喜歡在問他:去找爸爸食奶奶...而他不會去爸爸處,反而立時走在我面前的畫面!

為著使這個日子遲些到來,我不敢怠慢,除早晚埋身餵,還每日泵兩次,到近兩個月,見天天每日只食一餐冰奶,所以減少為每日泵一次,奶量都尚算穩定,每日都儲到7-8安,到現在剛遇上親戚到訪,知道會使奶量減少一點,滿以為過了便一切回復正常,怎知又遇上感冒不適,午飯後的泵出量,只有5安,今日還跌至4安半,看來,情況並不樂觀!

奶奶與我並肩作戰了11個月,我們合作無間,並無失禮過一刻鐘,亦未有讓小主子要食配方奶粉,不要在這時離我而去,要我孤身走奶路,好嗎?

傳呀傳

你傳我,我傳你,傳得歡天喜地,傳得天花亂墜,傳得亂七八糟,傳到頭昏腦漲......

傳到你我也交了上呼吸道感染這個朋友...

傳到我鼻塞,喉嚨痛,傳到你兩行鼻涕"定"在人中位置...

哎吔,我不要我兒像個在鄉村裡冇人理的duty頑童,鼻涕流流母親還在村公所內打麻雀...

可否讓媽媽替你弄掉那兩行鼻涕,可以不左擰右擰嗎?不要以為伏在你老豆膊頭上,我就抹唔到呀!

2007年11月6日星期二

郊遊悠

剛過去的星期六(3/11/2007),在秋意濃濃的日子,我們一家暢遊大棠自然教育徑,還未懂行的天天,坐在背架中,英偉神氣(媽媽覺得!),但行到一半已瞓著了,累得老公大汗疊細汗!

完成整個教育徑後,在大草坪上暢步一番,蹲下站起,為的只是抓些小草,泥土,那些從未試著放在手中的大自然東西,抓得歡天喜地!

整個早上,一家樂融融!

爬...爬...sir

學步

懶玩

2007年11月1日星期四

醜態

我兒八卦的性格,令他醜態盡現.

話說今日有點事,要晚一點才可離開公司,8:30pm回到娘家,天天聽到開門聲,對婆婆扭著要從廁所走出來,怎也不肯繼續便便,婆婆無耐地帶他出來,一看到我當然興奮,但不久便發生失禮事情,他.......竟然下身光脫脫,站立著......將他餘下的便便......放在地上!

哎呀,為何好端端的有廁所你不去,要弄到自己這個田地呀!好彩你完事後動也不動,否則你便會發現,便便完來也是一種玩具啊,下次唔好喇!

2007年10月25日星期四

閒時

在波波池

在推車車

在家的地蓆上

2007年10月22日星期一

重陽節登高去

重陽節,帶天天登高去,到嘉道理探大花白,看得開心又高興,因為是有生以來(11個月)第一次近距離見到那又大又白的豬爸和豬媽,以及一家不知多口的豬B!

小孩子只在這裡感受著大自然的美好,對籠內動物未感興趣,因為還未懂得隨媽媽的手指去望,因為還未能分辨距離感,因為籠內的動物未有像大花白一家般在面前搖來搖去...

但陽光,微風,花草樹林...一切都影入眼簾,在戶外吃著粥仔,也是有生以來(仍是11個月)的第一次!

11個月

11個月,懂得...

*bye bye

*飛吻

*鍚鍚面仔

*站立最長30秒

*駁腳,扶住東西行

*叫我做"me",學唔到媽,學到咪!!

*將物件掉在到上,然後講"掉",發音準確,清晰

*大力拍打你或物件的任何一處,然後講"打",同樣發音準確,動作配合

*能自如地上落梳化

*間中聽得明咩野叫做"俾"

*知道我地唔俾佢爬出露台(因為試過幾次佢出左去後,我地即刻拉埋隻窗)

*捐入洗衣機裡拍那滾筒

*開門,開雪櫃門,開櫃筒...

11個月,喜歡...

*食野,咩野都啱,見你手持會放入口的東西,他都知道可以食的,會撲埋黎伸手同擘大口

*到平台遊樂場爬sir滑梯

*擒來擒去

*雖然學會駁腳,但仍喜歡爬

*喜歡大個佢的小朋友,會好主動伸手掂人同人打招呼

*上kindermusik時滿場飛,爬來爬去,唔跟導師的步伐

*去街街

*自己攞到野時會望住你,好得戚咁笑

*喜歡被人拋來拋去

*喜歡咬波

*睇舅父打遊戲機

*玩水...

11個月,最怕...

*唔見左媽媽

*冇野食

*冇人埋...(都諗唔到佢怕d咩野!)

11個月,有...

*6隻牙仔,上4下2

*身長85cm

*腳板長14cm

*23磅...(我估)

*媽媽的全母乳!

2007年10月17日星期三

深紅的

一顆一顆雪白牙齒的背後,見証著孩子的成長,由原本只夠媽媽配方予他的母乳作糧食,變為能夠享受固體食物之樂趣,這過程,作為媽媽的,又喜又悲.

一顆一顆雪白牙齒的出現,又與媽媽的乳頭為敵,它有著又尖又鋒利的薄片,每每在他享受與媽親密時刻的同時,亦讓媽媽痛到入心,入肺!媽媽唯有忍耐,忍耐,再忍耐...直到午飯泵奶的一刻,發現奶瓶內的母乳...呈深紅色,嚇得媽一大跳,噢!原來除了被你的小牙齒弄損外,還有別的東西與它一樣,2安半的深紅色母乳,再見啊!

小動作

電視播著明珠台的天與地,看著各式各樣的海洋生物,動物,大自然的一切...媽媽手舞足道的引小孩子看,看那大水牛如何被大口鱷魚一啖食去,看著那小魚兒如何躲到媽媽口中以得安全,看著成千上萬的雁群在天空上飛翔...小孩子有多明白,不知道,只知每每看著時,都做了一個郭富城唱"對你愛不完"時的招牌動作--將手腕360度的擰了一下,之後收埋5隻手指仔!!

未知動作有何意義,或者,只有他自己才知道!

2007年10月16日星期二

2008年年曆咭

去年欲替天天整張年曆咭,最後沒完成,今年怎也要做一張,為著自己每次安排schedule也看到小寶貝,為著一次可以看到多張照片,為著10年,20年,30年...小學,中學,大個仔成家立室,有兒有女時,他都可以與身邊親密家人分享,2008年,他自己是這個模樣,他也有著一個封了自己做其偶像的媽媽,身上總袋著他的閃咭,diary封面總有他的照片,工作枱上也有...總之到處都有!!

戀子狂...是也!

2007年10月9日星期二

爸爸玩野

老公第一次陪天天上kindermusik,因為唔知會做D咩野,所以表示坐埋一邊睇吓先,睇左15分鐘,就到movement exercise,我叫老公:你試吓啦!佢抱住天天,同其他爸爸媽媽圍成一個圈,到睇完teacher示範後,就將個仔俾番我,之後話:我D音樂感好弱呀,都係你黎啦!

就係咁,媽咪減肥同練大隻o既時間又開始喇!!

老公呀老公,我叫埋你黎,除左想你知道個仔上堂做D咩野外,其實係想你幫吓手架!!你估抱住佢舉來舉去,真係唔倦架咩!

2007年9月30日星期日

又跌倒

在海港城的baby care center等候入房餵奶,車車的安全帶過鬆,使得擒來擒去的天天,從車車上跌了落地,哎呀,磚地板黎架,陰公!

回想這次已是他第4次跌落地了,有兩次都是從我們的床跌下來,有一次是自己未有扶實椅子而跌倒,另外就是今次.

小孩子不喜歡肩膊上的安全帶,一帶上就發忟憎,唯有替他除下,只靠腰間和pat pat那條,唯有弄緊一些,這又使他不能隨意站起來,同樣使他不快,噢,仔呀仔,冇辦法呀,唔係咁,我怕你老豆會用"疏忽照顧兒童"呢個罪名休左我呀!

2007年9月29日星期六

你在做什麼

夜深人靜,正是湊仔媽獨處的時光,那塊貼身(貼心)膏藥離開自己,可以寫寫blog,check e-mail,到forum傾傾計,交流一下育兒心得,分享一下湊仔的苦與樂,湊仔媽的一大快事...

老公:點解每晚亞仔瞓左之後你都對住部電腦,點解每晚都係得我一個人對住張床,點解我好似冇老婆咁...

老公,當那塊身膏藥則著我時,你又在做什麼呢?