充實的12日

12月21日
媽咪最後1日黎陪我坐月,我嘅蜜月期嘅最後1日......晚上與爸媽及老爺奶奶到樓下聯邦食飯慶祝天柏滿月大日子,咁就過左1個月,做左亞媽之後發現時間真係可以過得咁快!

12月22日
好心急等族長放工返黎同天柏沖涼,跟住要去華景同太嬤嬤做冬過節,全程由族長抱住天柏,佢話好辛苦喎,叫我25/12一定要用bb車推佢上,如果唔係就唔好去開x'mas party!!吓,推車上去好唔方便架,又要轉小巴,我一個人點攪呀!!

12月23日
獨處嘅日子又黎喇!!都唔太記得天柏個日乖唔乖喇!!

12月24日
天柏公公生日,舉家先去荷花大購物,買左架capella大霸王bb車,孭帶1條,吊床玩具1個,avent手泵連冰袋1set.
高高慶慶咁去公公屋企打邊爐,勁食一餐,最攪笑係未叫天柏同公公影相前,勁喊要人抱,到要佢同公公影砌旦糕相時,佢瞓左,事隔都不過係15分鐘!!小朋友真係估佢唔到!!

12月25日
因為趕住去太嬤嬤家開party,而我又聞到天柏個頭有d怪味,所以單拖咁幫佢沖涼,仲要係我第一次幫佢沖涼,本住"我係佢亞媽,又點會唔掂呢"嘅好勇諗法底下,完成左呢個使命!!之後都覺得自己好叻,但之後就被族長嚴重"勸喻"叫我唔好再有下一次!!
最後我都係選擇"驅車"去,當然又未至於單拖咁勇敢,呢次約埋天柏叔公叔婆一家一齊去,不過我地3個大人,就帶住兩個6歲,1個1歲半,同天柏一齊搭西鐵出去美孚再轉的士上去,真係大陣丈!!
對於1個只有1個月大嘅人仔黎講,開x'mas party根本冇意義,佢都只係俾人傳黎傳去,抱黎抱去!!其實只係d大人想抱bb啫!!其實帶住咁細個人仔去街,都真係幾辛苦架,好在族長放工即刻出黎幫手!!!

12月26日
天柏叔叔嬸嬸啱啱去完馬爾代夫度蜜月返黎,襯住仲係假期,就帶佢去吓新婚夫婦嘅新居,順便踩吓張主人床,等天柏快d有個"細佬"都好!!咁又玩左半日喇!

跟住嘅日子,除左27號同31號係族長放假,可以幫吓手支援吓外,我同佢簡直係"困獸鬥",遇啱佢黎第二個猛長期...我其實都唔知佢過左未!!
每日除左夜晚佢係可以瞓得長d外,基本上日頭都係冇瞓,而且不停喊,抱又唔係,行又唔係,食又唔係,食完又喊,又瞓埋晒d失魂覺,仲知我就不顧儀容地隨時候命,基本上冇做過屋企任何野,連寫張交保費嘅支票都冇時間,有時諗,怪唔之得d男人(講以前個d)會o係個老婆生完bb之後去滾,屋企個女人咁烏where!!!!

咁啱,我又開始想學泵奶同想儲奶,但佢又好似食唔飽咁,頓時前幾日情緒好低落!!

2007年1月1日
今日,情況好少少喇,半夜泵到4安奶,今朝唔敢泵,因為驚佢唔夠,早上佢食左兩餐之後,我推左佢落海旁行,晒吓太陽之餘,亦俾佢o係架車度搖搖吓好瞓d!返到屋企食多一次奶後,瞓到依家!!我先有時間寫吓野!

真係好佩服我亞媽個時,點樣可以1個人揍住初出世嘅細佬,又帶我返學,又買餸煮飯執屋......而我,淨係講照顧天柏,已經一頭煙喇!!!