抱抱

o係我所識嘅媽媽朋友中,個個都同我講過呢句說話:"1歲前嘅BB,無論佢係因為肚餓,賴左便便唔舒服,扭瞓覺,定係扭抱,總之佢想你抱,而你又得閒嘅,你咪抱囉!佢地想你抱佢,俾D安全感佢之麻!!況且到佢識行嘅時候,你想好似依家咁抱佢地都幾難喇!!"

我對"抱佢可以俾到安全感佢"呢個態度好認同,而我亦同意到小朋友識行識走時,佢亦唔會願意俾我好似依家咁抱到佢實!!因為佢已經開始有佢嘅世界了!!

不幸地,我呢個諗法,竟被奶奶理解為---縱!!因為佢一喊,我就抱佢,咁就係縱佢喇!奶奶認為--由得佢喊囉!!喊到疲倦就會自己停架啦!!唔可能我地要食飯都一路抱住佢架!!

我...一直都冇諗過會縱佢喎!!做得啱要讚,做得唔啱要糾正,我一直都係咁諗,咁佢想我地抱吓啫,又唔係做錯左D咩野,點都講唔到縱啩!!而且我唔係佢一喊我就抱喎!!!

最重要係,晚上佢唔使我地抱住佢先肯去瞓,我覺得已經好好喇,日光日白想我地抱,咁咪抱囉!!

不過我知奶奶咁講,都係唔想我地咁辛苦啫,我都明嘅,但我要重申,我唔會縱佢架!!唔好每次見到我,都話我縱壞左BB先得架!!