食得激氣

近日,家住區域開了一間以賣流沙包出名的集團式酒家--新X火鍋海鮮酒家,幫襯了三次,三次也有漏單的情況,算吧,原諒她新開業,職員需要時間建立溝通和密契,但印象分真是扣了一點!

昨日第四次幫襯,家父點了一個套餐組合:唔知咩咩炒蟹+燒雞半隻,$98大元,另外還點了幾個小菜,食到最後,見蟹還未到,唯有叫D伙計再追,個伙計check完後,回應:"一連有幾枱客都叫呢個餐,入面(廚房)整緊喇!"既然這樣回覆,唯有繼續等...等...等...

等到隔離那枱的蟹都到,我們那隻蟹仲...莫非未劏!又叫個伙計來問問,個女部長第一句就話:"呀,有冇同你地講,落漏左你地張單,d蟹賣晒喇!"

我即刻問佢:"咁點呀!"

佢竟然厚顏無恥地話:"咁計番你地隻雞錢啦!"

吓!我地因為你有個餐,我地先叫咋喎,冇餐,我就唔食雞啦,點會係"因為食左你半隻雞,所以計番錢呀",仲要話俾我知,個半隻雞收我$48蚊!個餐先係$98...

仲有,你地用電腦落單出單,我手揸住的單,你明明有入到,明明有寫"咩咩炒蟹"嘅,咁即係你地嘅問題啦,你地要補賞番我哋嘅損失喎,仲黎問我收錢!道理何在呀!要攪清楚個問題先後先得架!唔係食左你嘅就要俾番錢架!!

最後,有個男經理走來,仲話:"咁你地食左半隻雞,但覺得咁樣處理(收番半份錢)係唔得嘅,咁個半隻雞咪當係送俾你地食囉,咁好唔好?"

喂,老友,唔係我地打横黎喎,唔好講到個問題係o係我地身上先得架.我緊係重複佢問題所在同埋要佢都覺得係佢地落漏單先會攪成咁我先收手啦!女人o係呢個時候都係沉唔住氣,最後,佢咪死死氣咁話:"我幫你取消成個餐啦!"

其實我家人都唔係d唔講道理嘅人,又要搵番劉華出黎:今時今日咁嘅服務態度係唔得架喇!如果個女部長好聲好氣d,唔係第二句就話:俾番半隻雞嘅錢囉,我諗我地都會一人行一步,唔會咁核突咁同佢嘈.

雖然話係集團式經營,雖然話係:你慌我冇客咩,但做生意都要講口碑,講個客人食得開唔開心,若果仲成日落漏單,之後又要個客俾番食左嘅半個餐錢,任憑你d流沙包幾好食,整埋什麼外賣送禮套裝,你都做唔住啦,所以,新X老闆,醒目嘅就快D叫劉華黎同你D員工上吓堂啦!