EnjOy mY liFe TogEtheR witH my fAmiLy: 2008

2008年12月31日星期三

2008年12月28日星期日

聖誕節昂坪遊

上次遊昂坪，公公要返工無一齊去，今次同埋公公一齊去，好開心呀！

上次，23/1/08，天天剛14個月，自己一條氣咁行百級樓梯上大佛，今次，都係一樣，唔要人拖，要自己行！

出門前，我同佢講：『今日我地去探大佛呀，你去唔去呀？』

『去呀去呀！』

今次就唔係一舊飯喇，對周圍事物有反應，最開心原來係到心經簡林前的平地玩『掟石仔』！

要讓小朋友開開心心地玩一大餐，原來真係好簡單！！

2008年12月24日星期三

2008年12月18日星期四

KITTY

放假的最佳活動，非陪仔玩莫屬。

出發前...

『媽咪，帶KITTY呀！』

(咁大隻帶左出街唔夠一陣咪又係我拎！)

『不如我地叫KITTY留o係屋企睇住吖，帶叮噹好唔好？(7仔貨細細隻呀)』

『唔...要KITTY！』

唉！既然好日都唔同個仔出街，就順吓佢意啦！

一路上...

『KITTY，月亮姐姐呀！』

『係喎，點解成9點幾個月亮仲唔返屋企架！』

『KITTY，混凝土車呀！』

『KITTY，學校小巴呀！』

『KITTY，食雞蛋呀！』

亞仔，你都幾識照顧人喎！

這個這個

去年為天天製作了這個，見今年經濟不景，原想慳番D錢，但想：天天大個左見到這個會好開心喎，算啦，一年先整一次，豪俾佢。

終於，電郵了他，不過因為臨近聖誕，可能要到2009年才收到啊！

2008年12月15日星期一

家住區域中，舉辦幼兒班的學校不多，當中只有3間提供半日，其餘的全是全日，思前想後，決定向其中3間遞申請表。

A學校
非牟利機構主辦，有宗教背景，提供全日班，校舍細和舊，但老師會主動與小朋友接觸、傾計。
面試未有與小朋友進行什麼什麼測試，填完表便等見校長，校長只問了『你叫咩野名呀』、『(指住我)呢個係邊個呀』、『你幾多歲呀』。便完結與他的對話。
之後問我：『你對小朋友的教育有咩野期望？』
我，期望！
『我唔想佢咁細個讀書，我想佢大小小先讀，所以我想佢出年9月開學讀幼兒班！』
最後校長表示：『我地收你個仔的機會都好大，最快出年1-2月會寄信通知你，如果你仍然想安排你個仔入讀，到時就交留位費啦，順便了解吓，如果我地收你個仔，你會唔會安排佢繼續o係我地間學校讀呢？』
『對唔住，我未諗到呢個問題！』

***********************

B學校
非牟利機構主辦，無宗教背景，提供半日班同全日班，校舍大同新，老師...未有主動與小朋友接觸，掛住佈置課室同傾計。
面試由主任負責，安排小朋友坐下，完成幾個入孔的玩具，跟住主任給予幾張公仔圖咭，並叫我問他：
『呢個係咩野黎架？』
『羊。』
『咁呢個呢？』(係狗)
『貓。』
主任：『你講狗啦，講狗就得喇。』
『????????』

如是者重覆了幾個圖案，天天講啱幾個講錯幾個，錯的都被主任即時用上述方式糾正。
事實上，我覺得個仔唔係唔識，而係那幾個公仔圖案比較混淆不清。
最後，主任話：『我地會收你個仔，仲會安排佢返上午班，你會唔會即時交埋留位費呀？』
『可以考慮吓嗎？』
『可以，不過我地唔担保可以俾佢返上午班架。』

***********************

C學校
非牟利機構主辦，無宗教背景，提供全日班，校舍地方一般，老師同工友都好主動與小朋友接觸。
未有安排與小朋友面試，俾小朋友自由揀玩具來玩，父母則以小組形式與校長見面。
校長：『我地以入申請表先後來收生，所以沒有面試機制，學校的師資、課堂流程、三餐膳食......係......下星期便會發信通知你地，學校收唔收...』
一五一拾地講晒俾你呢班家長知。
一星期後，收到通知信已經收納了。

************************
出年9月，天天已經2歲10個月，需要有社交群體生活，半日班和全日班，對我倆甚至公公婆婆，都冇太大影響，不過透過互相學習同模仿，全日班應該會學得更多，更重要係，以天天那時的齡歲，應付幼兒班內容應該好自如，最大最大的，其實是媽不喜歡那個『你講狗啦，講狗就得喇』嘅主任！

主任，我同老公都在填鴨式教育下過了8分3啊，對於將來那變幻莫測的世界，我想創意同空間是好重要呀，天天，媽不想你只是個服從者！

2008年12月14日星期日

教仔

小朋友在遊戲室玩耍，除了真的去『玩』外，學習如何與人相處亦是重要一環(最少我是這樣認為！)

當天天正在玩車時，如果有另一小朋友行近表示又想玩，作為母親的，會算算孩子玩了多久，若只是剛坐下玩，我會告訴他：『有其他小朋友都想玩喎，你玩多一陣就俾人玩喇！』
天天聽後通常坐多...約30秒便離開，給別人玩。好孩子！

當天天到達遊戲室，見玩具車有人玩時，都會對我說：『要排隊呀，唔好爭呀』，又或是『等人玩完先』等說話，我當然浮誇地說：『係呀，你講得好啱喎！』跟住我會叫他玩住其他玩具先，等見到玩具車無人玩先去玩，他會用其鋒利的眼睛，不時望住玩具車，見無人玩便會飛奔過去，坐下後對我說：『啱喇，輪住玩，依家無人玩，到天天玩喇！』

如是者，可能是剛坐下不久，又會有其他小朋友行近玩具車，表示想玩，因為重覆地教他『要讓他人，玩具是一齊分享的，不可以霸住來玩，要守規矩輪住玩』等等道理，他又會玩了一會便讓給他人...

曾問自己：這樣教仔，好嗎？

想教的，全是品格教育，有好的品格，不但別人會喜歡自己，更重要的，是自身一世受用！
品格好，自然會懂得關心他人，懂得愛護他人，懂知足懂滿足，最後得益最大的，也是自己！

不過每次到遊戲室，我所遇到的事情，總會對我所抱有的『教仔理念』給予衝擊！

玩具車被小朋友坐著，在我眼見，他已坐了近10分鐘了，天天時不時便走到玩具車後：『天天想玩！』

『玩具車有小朋友玩緊喎，等小朋友玩完先啦，你去玩住其他玩具，等小朋友玩完就輪到你玩！』

又過了5分鐘...天天又再行到玩具車後面，那個在我眼內已經玩了那玩具車成15分鐘的小朋友，依然若無其視地玩著，我，當然不會去怪他，再大的他也只不過是個小朋友，我要怪要嬲要激氣的，是那坐在一旁繼續以『欣賞』的眼神去看著他兒子如何玩車玩得好開心的父親！

喂，人家老豆，你個乖仔霸住架玩具車成15分鐘喇，我地一入黎已經見到你個仔玩緊喇，即係話一定唔只15分鐘啦，你有冇見到個場唔係得你個仔一個呀，有其他小朋友架，就算你個仔真係好鐘意玩車，都唔係霸住架，你覺唔覺得你應該介入吓呢？

當然，佢係冇理到我地啦！

我唯有繼續堅持我教天天的立場：『哥哥仲玩緊呀，你玩第二樣玩具啦！』

小朋友耐性低，見架車等咁耐都未有得玩，開始縮短『等』的過程，甚至曾想過以『拉起那個哥哥』的方式以使他可以成功玩車車，這個動作完全違反了為娘的品格教育理念，當然被即時喝止！

為了好完場，我這樣對天天說：『車車被哥哥玩緊，今日可能玩唔到喇，(開始扭身扭勢)，哥哥霸住車車，你冇得玩，你開唔開心呀？』

『唔開心！』(繼續扭身扭勢)

『咁我地同小朋友玩玩具，記得要一齊玩，輪住玩，咁先會開心喎！』

『唔輪住玩呢？』(唔知點解佢成日都會反問番我！)

『唔輪住玩，自己霸住玩，其他人咪冇得玩囉，咁咪唔開心囉，你依家開唔開心吖？』

『唔開心呀，天天冇得玩呀！』

『係呀，不過我地願諒哥哥啦，下次先再同車車玩，媽咪同你去樓下玩滑梯，好唔好？』

『好。』

*********************

過程中，我唔知道天天會否覺得不開心：點解哥哥唔係輪住玩嘅，點解今日無得玩車車呀，點解媽咪教我要同人一齊玩玩具，要分享，要禮讓，但其他小朋友唔係咁嘅...又或係：點解媽咪唔幫我同哥哥講，佢已經玩左好耐喇，點解佢唔讓我但又要我讓佢呀...(其實我諗呢個係我嘅想法！)

每人的想法與自己的，一定有別，因為每個人都是一個獨特的個體，想法只有分『差距大』和『較相近』，正如作為父母的，也是如此，遇上教育理念想近的，同樣情況其父母一定會話：『已經玩左好耐喇，要讓人地玩呀』，遇上理念差距大的，便會有今日的情況，我可以做的，只有教導天天：改變自己啦，別人是改變不了的，他不肯讓你玩車，打他罵他不是解決的方法，知道冇車玩這個經驗不好受，輪到自己玩車時，便不要重覆霸住的行為。

但講到尾，作為父母，都要盡責一點吧，個細路唔識，你係大人，你都識卦，最嬲係連聲都唔聲喎，我做亞姨嘅，開口同你個仔講咩，到時你就會問我，憑咩野去教你個仔，我自己唔識教咩...

對唔住，你問我，我覺得你真係唔識囉！

2008年12月8日星期一

新作

老公新作，與上次的作品比較，這個...頭大了！

多謝你為我們所花的心思！

你好叻呀！

老豆生日快樂

巧欣：『老豆，生日快樂呀！』

天天：『公公，生日快樂呀！』

婆婆：『老公，生日快樂呀！』

一家人一齊，係最開心啊！錫晒你地！！

參觀消防局

星期日，老公同天天到消防局開放日參觀，這週歲的天天，熱愛所有車種......

開放日除左可以俾參觀者近距離和不同種類的消防車接觸外，仲有幾個攤位遊戲同一架Q版救護車，介紹消防工作和宣揚防火的重要，同埋有得試坐消防電單車，仲可以叫消防員叔叔合照添！

咁啱我星期日要返工，下年我都要同天天去呀，我都要同消防員叔叔影相呀！

2008年11月30日星期日

相遇...相擁！

但願永遠也能和你...擁在一起！

嬸嬸畢業喇

嬸嬸畢業喇，恭喜嬸嬸賀喜嬸嬸！

這是『豬』的印記。

叔叔嬸嬸與豬仔與熊仔。

18年後，願頭上能戴上此努力的成果。

2008年11月24日星期一

發爛

每日回家前，天天總會問公公：

『公公，入蚊蚊呀！』

『要幾多個蚊蚊呀？』

『担個！』(雖然口話3個，其實係話要兩個至真)

***********************

『天天，爸爸話唔可以將D蚊蚊放入口呀，咁我收左佢喇，今日冇得玩！』

嚎哭嚎哭嚎哭扮哭扮哭扮哭......

『要呀要呀入蚊蚊呀！』開始發脾氣發狂發爛咁拉架BB車上的安全帶......

『媽咪，俾唔俾多次機會佢呀！』

！！！！！！

『如果你問我的話，我就唔會俾囉！』