族長病倒了!!

族長今次真的病倒了!!他主動表示要看醫生啊......其實......他只是喉嚨痛和有少許鼻水,為何會那麼主動呢??

原因只有一個,他不想禍及我和小熊bb啊!!老公,你實在對我們太好了!!

不止這樣,族長還主動表示到書房睡,怕會傳染啊!!老公,你要快些痊癒呀,因為......我怕黑的!!

焗蓮蓉西米布甸

在網上找到我最喜愛吃的甜品--焗蓮蓉西米布甸的製法,真的希望可以自製一次,但最重要,是先添置一個焗爐!!

材料： 4 位份量
1. 西米 30g
2. 蓮蓉 80g 約$5-$8蚊
3. 砂糖 70g
4. 煉奶或淡奶 2湯匙
5. 蛋黃 3隻
6. 吉士粉 40g
7. 牛油 60g
8. 清水 250ml

製法：

1. 西米加入清水略浸，準備半窩水煲滾，水滾落西米以慢火煮至看見西米漲起，
關掉爐火密蓋焗２０分鐘或至西米完全透明．倒出西米隔去水份放入冷開水中浸泡備用。
2. 將清水250ml 煲滾，水滾落牛油及糖，淡奶煉奶拌勻。
3. 把西米隔去冷開水到落煲並轉調慢火。吉士粉用2湯匙清水調開加入鍋中煮至濃稠（邊煮邊攪拌）即關掉爐火把蛋黃逐隻加入拌勻。
4. 在布甸模內先注入一半西米溶漿，再放蓮蓉，然後再注入剩餘一半西米溶漿。
5. 先把焗爐以250℃ 預熱(如有上下發熱線，可先開下發熱線)，放入布甸焗約15分鐘
再關掉下發熱線，開啟上發熱先至150℃至表面焦黃即成。

這個甜品的愛好起源,來自我祖母的生日宴會上,小時候,由我懂性以來,祖母每年都會在美孚的好世界酒樓設生日宴(可能因為爺爺在此工作的關係,所以從無更改過地點),無論菜單上如何更改,糖品總會是這個好味的焗蓮蓉西米布甸,因此......我們一群的表兄弟姊妹,總會留肚來品嚐這道菜,可惜,自從好世界結業後,已不能在每次生日會上吃得到了!!!

上一次吃過,便是自己的婚宴上,都隔了差不多年半啊!!

小熊bb成長日程

仲有131日,就會見到小熊bb了!!

超聲波---勁!! 母親---更勁!!

真佩服以上幾代的母親!!今時今日,我們這一代做母親,有很多檢驗可以幫助自己去了解bb在肚皮內的情況,例如驗血(以前就算有,相信所檢查的範圍都沒有現在的多),用電腦去計算bb的患病機會率等,當中,最令母親感到開心的,就是每次照超聲波!!

27/7/06 11am,盧醫生介紹我去中環的產前診斷中心,目的是檢查小熊bb的結構有否出現問題,例如d器官發育是否完全,手指腳指是否齊5隻,骨骼發育是否足周數,會否出現兔唇等,結果......一切正常,還再一次確定,小熊bb是個男孩子呢!!

回家後與媽媽傾談,亦感到上一代生兒育女,是天職,是勇氣,是無私的愛......一直懷胎十月後,才驚見自己的孩兒有缺憾,真是一個很大的打擊,但......母親亦欣然接受,同時樂意付出,怪不得以往的社會大都重視母親節啊!

各位母親,感謝你們為永無止境的生命帶來色彩,同時,亦要認同自己的付出及能力,因為你們真的很偉大啊!!

族長第一次與小熊bb的接觸!

近日每當靜靜坐下時,總會感到小熊bb的彈跳,昨晚臨睡前,同樣也感覺到,所以立即叫族長將手放在肚皮上(之前試過一次,但族長感覺不到,所以好希望是次他兩父子有第一次接觸!)

族長感應了約30秒,仍未見到小熊bb有反應,於是我們齊聲與小熊bb說:"爸爸第一次想感覺你的跳動,你再彈跳多一次,好嗎?"過了5秒左右,小熊bb真的來一個有力的彈跳,族長立時回應:"我感覺到喇,好大力呀!!"接著,我們同時大笑起來,而族長就帶著好滿足的心情去找周公了!!

人......總需要勇敢生存......

人生......是這樣啊!!
http://a779.com/mk/flash/walktour.swf

胎動+大肚婆,都在同一日發生!

胎動

近幾日,當我靜靜坐下時,都會覺得個肚有些東西在彈跳,但次數不多,每次一至兩下便會停止.早在18週時,我已向媽媽查詢,"胎動"感覺是怎樣呢,媽媽說:好似有些東西篤你個肚咁,咪係胎動羅!但我近日所感覺到的,又不似媽媽所描述啊!今晚回家食飯時,再向她問清楚,並告訴她我近日的感覺,她說:係架喇,你亞婆話好似隻蝦咁彈彈下的,就係胎動!

啊!原來是這樣!!


大肚婆

回家在屯門站乘輕鐵,上車後,找個有扶手的位置企穩,突然有位女士叫我:你坐吖......有點不知所措,但見她已企起身,那我便坐下來,坐下後感覺怪怪的......原來已經是個好容易被人識別的大肚婆了!!

都是凍檸茶累事啦!!

昨日放假,在樓下茶餐廳叫了個生炒牛肉飯+凍檸水,誰知回家後才發現,他......給了我一杯凍檸茶!!心想:在整個懷孕期間,我完成戒飲所有茶類,現在只是飲一杯啫,應該無問題掛!!

其實我真的想過不飲它,但實在太熱了,所以在--飲一杯半杯應該無問題的大前提下,我終於將整杯凍檸茶放進肚裡,點知在出事了.......

我整個晚上都睡不著,好勉強只能睡了兩小時,所以今早上班期間,終於感到疲倦,比起平日,我只有在站得太久時才會覺得雙腳疲倦,在這5個月期間,我無一日試過好似今日這樣,是精神上感到疲倦,最慘........仲要開會啊!!!

好不容易到4點,拿拿臨執好個袋,返娘家食晚飯!!族長就要返P,以及招待那些從台灣來的訪客啊!

希望今晚有覺好瞓啦!!

終於完成呢個blog了.

多得家銘仗義襄助,我終於完成這個blog了.大家一定感到奇怪,為何好端端要改個blog呢......因為之前那個site,原來大家不可以隨意回應的,所以請教"高人"後,終於完成到一個方便自己又方便各方好友的site.

在這個過程中,確實讓我學到不少電腦上的知識,對於他人來說,可能製作這樣的分享是很容易,但對我來說,真是要慢慢研究才能完成,另外,我還link了些相片,希望在小熊bb出世後,可以讓大家容易分享啊!!

一直都覺得這張相好靚,多謝各位!!

人---的確有不同的潛能!!

我好相信"造物主"是公平的!
(本身沒有宗教信仰的我,實在想不到用那個名詞去描述做出世界萬物的物體是最好)

娛樂圈中的俊男美女,就算樣貌有多好,都總會有樣東西是較弱的---聲沙,腳粗,無創意......這都是他們不可改變的!!

工作上,面對的朋友,都有他們不同程度的限制,但他們永遠都對生活充滿希望,亦會懂得如何讓自己快樂,更重要的,是他們都會將有限變成無限!!

人與人的相處,不論何種人,原本都會亙相關心,所謂對社會是否有貢獻,實不用過份放大來看,只要能做到關心身邊的人,做好自己的本份,我認為已經是對社會有貢獻,做到一個有用的人了!!

好開心自己能找到一份與人一起成長的工作!!

小熊bb......係個男仔呀!

昨日到盧醫生處覆診,醫生终於照到小熊bb......是個男仔啊!!

其實是男是女對我同族長來說都無所謂,重要的是他/她要健健康康,而我們知道後,便可以著手為他添置適合的衣服鞋襪了!!

談到是男是女,身邊都有很多人去估計,我爸爸說仔女都是福氣,我媽媽呢,則覺得生個女會近媽媽多些,所以想我生個女,老爺奶奶則想有個女孫,因為族長家實在陽氣旺盛,有個女會高興d!!至於同事,則大多數都話我會生個仔,原因之一是我懷孕得很輕鬆(希望到生的時候都是這麼輕鬆!!),族長同事都話我們會生個仔,因為覺得族長有老爺相啊!!

每次照超聲波,我都覺得很得意,看到bb在肚內活動,更感到好欣喜,欣喜生命奇妙及力量很強,很期待下次照超聲波的時刻啊!

六星期重了3.8kg,要嚴格控制體重了.

今日到母嬰健康院作檢查,磅重後便告知護士,我的磅數是--58.3kg,之後竟然看見她用支紅筆,在那個體重紀錄上做了個紅色記號,之後對我說:好似重左d喎!!!係咪好食得呀!!

是啊,的確我是很食得,而且前陣子還每晚在看法証先鋒時都吃一支甜筒呢,之後我告知族長,族長立即下命令,表示留在雪櫃內的雪糕,通通充公,放入他的肚子裡......這麼,小熊bb就會得到一個肚爸爸了!!

族長,你真的要好好考慮這個方法是否一個好方法啊!!

族長弄傷手指公啊!

6:30pm正和媽媽傾計,收到族長來電,他說自己PK,我以為他講笑,點知原來講真啊,事原今日好大風,他在工作期間,不慎滑倒,結果著地時便屈到手指公了!!!心痛死喇,返到屋企,連除手錶都要我支援,我諗明日還是要他去看醫生了,不過佢一定話唔使呢!!

多謝同事們的照顧啊!

由知道有左小熊bb開始,我心態上無咩野大改變,都係一貫作風--我應付到o既能力範圍內,我都會自己完成!奶奶講過,以前佢返工o既時候,都係樣樣自己做,有時甚至乎忘記了自己是懷孕中呢,而我,想法與她一樣,雖然係大左肚,但工作一樣要照做,無可能每一樣事情都會找他人幫手的!!

但同事們每個都好好,當見到我推住輪椅,搬檯,或學員有情緒時,都會叫我小心,或是叫我行遠d,有些同事還主動告知我,學員最近情緒有起伏,處理時一定要小心!!

我真係好感謝每一位同事的照顧和關心,事實上,不論是否大肚,我覺得大家在工作上都一樣要小心啊,因為若果不幸受傷,除了自己辛苦外,還會影響到家庭呢,所以大家都要小心保重身體呀!!

今日仲收到碧姐孫女的私家車,返到屋企,即刻同族長研究,發現好啱用,所以小熊bb唔使買私家車喇,都係時候要買番份禮回俾碧姐喇!!

第一件買俾小熊bb的衣服,竟然係夏天衫!!

早幾日行過吉之島,見d bb仔衫有特價,已經望過下,但又唔知咁早買好唔好,所以打電話俾d有經驗的媽咪,問下佢地d意見啦,佢地都話可以襯特價買定d,就咁,我琴日就去左吉之島再睇!!

睇左一輪,原本想買d冬天長袖的,因為小熊bb會o係12月出世,但係都睇唔啱,所以無買,點解唔啱,因為d size太細喇,只係得50,即係出世後著得個1個星期,咁唔化算,所以咪唔買羅!!

之後睇左d夏天衫,有幾件都幾好,size係90,我估到左出年夏天,即係小熊bb大約6個月o既時候,應該著到啦,之後我梗係打俾族長啦,佢話好我先買,經過一輪商討之後,我地都係買在3件夏天衫.就咁,小熊bb o既第一件衣服,就係夏天衫喇!!

經歷左一場既開心又傷心o既世界盃決賽!

熊族一家人一齊支持o既意大利,經過120分鐘+12碼之後,終於可以捧走隻大力神盃喇,這是開心的!施丹最後一次代表國家隊,竟然係咁樣完場!!這是傷心的!

我唔係場場都睇足,只係8強開始先睇,由英格蘭vs葡萄牙個場開始,我已經唔鐘意葡萄牙,唔鐘意o既原因係因為佢地無品,其實呢個世界每一個圈子都好細,遲早有一日會再見面,點解可以好似c朗咁,做埋D小動作去損害他人,對自己一D好處都無!況且,踢波o者!!施丹,仲奇怪,一路都覺得佢好穩定,無論腳法,球技同EQ都應該唔錯,不過族長就話佢後生o既時候都好好火,咁依家都老啦,仲有咁多經驗喎,應該控制得好D o架,點知,都係咁!!!

EQ,一個近年都好HIT o既課題,自問都需要好好繼續學習,而且將來仲要教小熊bb呢!!到左下一屆,小熊bb應該3歲半喇,應該有自己鐘意o既球隊去支持,到時真係要好好做個EQ教育喇!!

收費電視台

正當族長整緊晚餐o既時候,突然有人按門鐘......我唔識個喎!!開門後,佢即刻話:我地係xx電視台架,你依家都睇緊我地個台喎,我地依家有個優惠俾番你,我地會幫你安裝一個解碼器,之後你就可以收到超過30個頻道架喇.

我緊係即刻問佢收唔收錢啦,佢就話:呢個係答謝你對我地個台o既支持,唔會收費用架!得族長同意後,我就開左門俾佢入黎,入到黎,佢就話:呢個優惠為期15個月,裝左個解碼器,你本身個電視台都會清D架,到期後如果你覺得唔適合o既,你可以除時取消,而呢15個月,每個台每日都係收番1毫子咋!!!!!!

我緊係即刻問佢:咁即係要收錢啦!!佢就答我:其實呢個係答謝你一路支持我地個台,所以每個台每日都只係會收番1毫子咋.

咁即係要收$$啦!!話係咪得o羅!!我同族長對望左一眼,就一齊同佢講:咁唔使喇,唔該晒!最後,佢緊係帶住失望o既心情離開啦!

基因革命--好犀利呀!!

星期五,我同族長都放假,諗o左好耐,都唔知去邊好,未有小熊bb之前,我地一齊放假,唔使諗多數都會去搵陽光與海灘--浮潛實無走雞啦!天氣無咁熱就多數去o左釣魚,但係為o左待埋小熊bb一齊先去玩,所以惟有選擇其他活動!

最後,族長帶o左我去一個好有教育意義,而我又真係咁大個人都未去過o既--香港科學館!!基因革命去到發現有個基因革命o既解說,原來有d人,一出世就有疾病,例如精神病/巨人症/先天性糖尿病等,都係因為DNA內有些異常,而影響到o架!唔怪得我去見醫生o既時候,都會問我家族有無人有呢一類先天性o既病啦!

其實要帶一個健健康康o既小生命o黎,都唔係一件容易o既事,當中除o左媽媽在懷孕期間要小心之外,小生命自己都要付出好多努力,佢先可以o黎到!所以,我都係個句,一切隨遇而安啦!!但最緊要係珍惜自己能與家人相處o既每一刻呀!!

平常心!

記得去年12月,參加了"平常心工作坊",填寫報名表時,其實是想透過工作坊,多點認識自己的長弱處,以使自已在工作上更能懂得定位,同時亦讓自己在差不多8年的工作中,得到一個休息及自省的機會!

直到三日兩夜的工作坊完結後,我才明白過程不單達到我之前的期望,更有超越期望的感覺,因為內容簡直是一個生命教育工作坊!!

除了談及愛之外,還談到生和死,要"放下"家人,丈夫,兒女",於我來說實在不容易,但亦很快讓我明白,不容易也得要放下.

生命不在於我們能擁有多少,而在於我們有否珍惜及享受每一個過程,懂得這樣去想,自然每日都會過得開心,快樂一點!

完成工作坊後,開始有製造小生命的念頭,帶他/她來到這個世界,作為父母,當然要承擔其成長過程,但更重要的,是可以讓他/她享受及欣賞世界美好的東西,而這個過程,更讓我有重新學習及享受生命的意義呢!

族長再一次帶住失落的心情......瞓覺去!!

我游說左族長好耐,佢都唔肯同我一齊,支持法國,最後,佢緊係又再一次帶住失落o既心情啦,不過今次就唔使咁早返工,所以可以去瞓覺!!

到決賽o既時候,族長終於都同我和小熊bb同一陣線,支持意大利喇,今次我地全家總動員o既支持,意大利一定贏呀!!

至於今晚,就緊係一覺瞓到大天光啦,如果晚晚都係咁,我怕小熊bb以後3點就叫醒我啦!!

族長帶住失落的心情上班去了!

2006世界杯,一直都話德國會攞冠軍o既熊族族長,终於o係今朝,要帶住非常十分極之失落o既心情,上班去了!

而我呢個女主人,就緊係懷住興奮o既心情,繼續大覺瞓啦!!今晚我會繼續帶住小熊bb,支持法國隊,因為實在唔鐘意葡萄牙o既"大菲"同"c朗",最唔鐘意d人無品!!

琴晚我叫到差d有差人上門警告,仲好似feel到小熊bb踢我添,不過其實直到依家,我都未好feel到小熊bb的動作,希望佢快d為我帶來驚喜啦!!