族長開始放大假,協助照顧我同小熊bb,太好了!!由於家人給予無形壓力,我對住族長喊左幾次,嚇到佢以為我有產後抑鬱!!
我當然冇事啦,不過小熊b自從自己o係醫院,俾姑娘用奶樽餵奶後,就唔肯埋身食人奶了!!28/11晚上6:30pm個餐奶,奶奶表示要佢試o下食人奶,o係我唔係好自在o既情況下(因為俾人睇住餵^~^),小熊b係咁依食左幾口,我冇再迫佢,奶奶俾佢飲左安半水,跟住叫我繼續俾佢食人奶,唔好補奶粉!!
小熊b係我生o既,果然遺傳了一點點的性格--硬頸!!攪左佢成晚,喊又唔理佢,佢都繼續堅持--唔食!!俾奶樽佢,就係咁食!!
29/11我同族長帶佢去健康院見醫生,醫生話佢呢個情況,已經習慣左食奶樽,如果要佢一定要埋身食人奶,就唔可以再用奶樽補奶,要用匙羹遂羹餵!!但佢話好多個好努力o既媽咪,堅持近一至兩個月,都可能唔成功!!!
Nikita知我呢個情況,好好咁主動打俾我,仲同我分享了一d好有用o既意見,多謝你啊!!有個媽媽用左兩個月o既時間,不眠不休咁埋身餵,補奶又用匙羹,仲同家人攪到嗌晒交,最後都成功!餵到全人奶!!我覺得佢真係好叻!我之後同族長分享過,佢就叫我唔好俾大壓力自己,有得餵就餵,冇都有辦法,食奶粉都可以,因為我地o既年代,都係食奶粉大!!
所以我打算按醫生指示,先多d泵奶,希望增加奶量,至於埋身餵...硬頸o既大口仔睇怕佢都係會繼續硬頸,所以我大多會選擇用奶泵!!同時坐月期間,我諗我都想多d休息,經過果晚小熊b肚餓,喊到鬼死咁妻涼,又真係唔係好忍心,話晒"食"都應該o係開心o既情況下進行,族長話既然佢習慣食奶咀,咁如果泵到人奶而用奶樽餵佢又肯食,咁為何要強迫大家做件咁辛苦大家o既事呢!!
另外,多謝藍mama的資料,好有用啊,我會繼續嘗試增加奶量,希望用"奶樽"餵到"全人奶"!!
2 則留言:
你唔開心對住老公喊都好架，我果時日日夜夜見親老公都喊添呀。
如果你餵人奶，可不用比水BB 飲，人奶有九成係水，BB 個胃好細，飲水都會頂住胃，會唔願埋身餵。
最衰間醫院啦，未問過你意見就bottle feed，整懶左小熊B，遲下我會撰文狂罵下先得。
我會建議你慢慢教小熊B 埋身餵，因為我見過不少BB 大大下教教下會肯埋身餵，當然，初初佢地都會同媽咪「搏鬥」，小熊B 唔係硬頸，係懶豬，要糾正佢懶豬，你要tum 佢，食奶奶唔可以做懶豬架，你係小熊B，要好似爸爸媽媽咁醒目架嘛~
一日小熊B 未滿月，一日都可以教到佢埋身餵，唔好咁快決定轉做全泵形，長遠來說做全泵形奶媽比起埋身餵會辛苦好多。你有咩問題，即管打來問我啦。
nikita講得啱,dBB大大吓就肯啜,我隻仔就係咁,大大吓先肯正正經經啜。嗰時餵佢成日同佢搏鬥,餵一餐要大戰幾廿個回合。
醫院d姑娘梗係用奶樽餵小熊b啦,方便嘛!我喺醫院d姑娘都無話比我地聽唔好用奶樽補奶,但係聽人講政府醫院d姑娘(幾年前,唔係依家)肯幫人奶媽媽用匙羹補奶比bb。
發佈留言