小熊b...o係11月22日出左世喇!!

睇番自己上次所寫,11月21日9:28am在blog中,話小熊b就快出世,正如軒爸所講,之前一晚"見啡",以為冇咩野大不了......

11月21日健康院約了我11am覆診,我同族長見個時間咁吊腳,所以先將飯盒攞返公司,打算覆診完食埋午餐就各自返工!!10:30am連早餐都未食就去到健康院,好快輪到我,個姑娘問我有冇特別野,我咪答佢都冇咩野吖,係個肚有時會扯住,但唔密,同埋20/11晚上有d啡色流出黎羅,佢即刻好緊張,話我就生得喇!!

吓,我一D都唔覺喎!!!佢話我呢D叫做"見紅"!!!

吓!!!見紅唔係真係見到紅色架咩!!!我以為好似M咁先叫見紅喎!!!等我仲大覺瞓添!!個姑娘即刻鬧鬼我,仲叫我即刻去見醫生!車見咪見羅,鬼知咩!!我又冇唔妥當,咁緊係唔為意啦!!

入到醫生房,檢查左一輪之後,佢話我已經見左紅同穿左少少羊水,要即刻入院生仔!!喂,我一D都唔覺得喎,但佢都冇回應我,就寫野叫我入院!!奶奶担心我在去醫院途中有危險,例如即時穿好多羊水,所以request醫生call救護車送我入港安......

就係咁,我就開始我一生人第一次o既生仔旅程,包括坐救護車...原來坐上張咁高o既床,好驚架!!!去到港安,仲俾D護士笑,佢地話從來都未見過咁樣入黎生仔o既孕婦!!!佢地個個見我鬼打咁精神,都覺得好攪笑!!期實我自己都覺得,仲係咁問D姑娘:"我真係生得喇???我一D都唔覺喎,痛都唔痛,咪淨係流左D啡色之麻...."

經過佢地同我做完一輪檢查後,話我係生得喎,因為子宫已經開左2度!!噢,要入產房待產了!!

1:30PM入去,o係張床度睇住電視等,等,等......................等到4pm,醫生聲控護士姑娘幫我放藥,幫我開得快D,跟住又係等,等,等.......................去到8pm都開到3度咋,又唔係太痛,但就好肚餓!!!

鬼咩,我今朝都冇食早餐,1:30pm族長買左個三文治+維他奶俾我咋!!之後話唔俾食野喇!我咪係咁問姑娘可唔可以食野羅,8pm先開到3度,有排都未生得啦,唔食野,一陣真係生得咪冇力!!!

8:30pm有好消息,就係盧醫生有指示可以食野,但唔可以食咁飽!!!族長買左個魚旦米+凍利賓納俾我,10pm護士又按盧醫生指示,幫我吊催生水,吊到11:30pm,開始有D反應,因為比起之前痛左,11月22日12AM盧醫生黎睇我同幫我穿左羊水,之後就甘羅.....................

痛到講唔到野,不過我好記得Nikata講過,最緊要對自己有信心,忍住唔好嗌,唔好"晒力",唯有捉到族長實一實,攪到佢對手有麻痺o既感覺(佢之後同我講番)!!到2:15am醫生黎到,我就可以生喇,用左約20分鐘,小熊bb就順利出世,有7磅1安士,仲喊到鬼死咁大聲,護士姑娘幫佢抺身時,仲鬼馬咁請左佢地"飲茶"呢!!!唔知咩野叫飲茶...即係"痾尿"啊!!!

之後,麻醉藥發揮功效,我就瞓左,連醫生幫我做咩野,我都唔多知道,5:15am族長先叫醒我......