8個月3星期的天天,下排兩顆牙仔已完整地長出,上排兩隻大板牙,竟同時一齊出啊,現在已見到一絲的白線,婆婆前日告知,原來在天天3個幾月大時,她做了點手腳,一直有話我知,她聽上一代說,bb到了3個幾月時,可以用韮菜渣汁,將d汁搽到bb的牙肉上,那到他出牙仔時,便不會太辛苦了,我問:為何之前你冇講過呢?"婆婆答:"我驚你話我迷信同個方法古老囉!"
噢,你是我媽啊,我絕對投你最信任的一票呀,放心去做吧!
出了牙仔另一需要教的,便是食奶時之配合,今日天天第一次因為未肚餓,但我又叫他食奶,終於引起他以"咬一口"的方法來拒絕,當然,後果便是引來罵聲及哭聲呢!其他時間,担白說,他的牙仔都會無意間"high到我,我知他不刻意的,所以也沒責備他,這也是我所說的--要配合,還未找到方法呢!
今日,回家扭開電視,睇到宣傳及鼓勵媽媽餵母乳的廣告呀,老公即對天天說:你也是其中一份子呀!的確,除了天天初出世的那個星期飲過配方奶粉外,之後幾乎全是母乳,我由初時好擔心奶量不夠供應,到現在好多時都要棄掉一些過期奶(過了3個星期的便算過期--我定義的),當中真的經過好多努力及堅持!
現在天天快9個月了,我的另一問題是:他何時要食兩餐粥仔呢,若食了兩餐粥仔,那即代表,飲奶的數量減少,以天天現時的飲食時間表:
7am埋身食奶
9:30am生果蓉
11:30am食冰奶--約8-9安
4:30pm粥仔一大碗(大人飯碗一整碗,好勁)
8:30pm埋身食奶
晚上睡覺期間,仍會不定時地埋身食,老實說,我還未幫他解夜奶呢,真失禮!
以這個時間表來看,食兩餐粥仔的話,他便只會早晚埋身食,6個月時到健康院,姑娘曾這樣說:奶奶對6個月以上的bb來說,已經變了副食品喇,他主要的營養來源,其實是來自其他天然的食物啊!
這個疑問,各位有經驗的部落媽媽,可否幫吓我呢?
7 則留言:
必必由六個月左右開始食粥, 開始無耐就餵兩餐粥lu, 因為佢中意食囉. 而我係一餐煮埋餵兩餐既(即lunch 同dinner 食同一款), 無其他媽媽咁勤力咁有心機.
其實餵夜奶都有度好, 剌激到多d分泌. 必必個幾月就訓通宵, 之後我就奶量急降,頭兩個星期半夜都重谷谷地, 之後? 咪無貨囉.
天天而家咁健康大隻. 你真係唔怕餵喎.
天天大個仔，要食兩餐粥啦，按你的時間表：你可以咁：
7am 埋身
9:30am 生果蓉
11:30am 粥仔
3:30pm 冰奶
6:30pm 粥仔
臨訓埋身
咁樣同大人飲食時間表貼近，一日三餐奶，兩餐粥加小食。
小盈而家係咁:
630am 奶 (8oz)
11am 粥
~2pm 水果
3pm 奶 (4oz)
5pm 粥
830pm 奶 (8oz)
多謝各位嘅意見,婆婆今日開始會餵天天食兩餐粥仔,初步嘅時間表同大家所講的都類近,不過因為婆婆除左湊住天天外,仲要照顧埋我,我老公,我細佬同我老豆的晚餐,同第二日的我&我老豆返工所帶嘅飯盒,所以我都唔敢要求佢煮唔同粥仔俾天天食喇!!
我跟怒火一樣都係一次過煮兩餐粥仔. 至於時間表方面, 跟nikita一模一樣.
一次過煲晒兩餐粥就得，食完第一餐餘下的放入雪櫃，食第二餐要熱翻。
我前幾日開始俾天天食兩餐粥仔喇,效果幾好吖,佢好鐘意喎,我媽都係一次過煲兩餐粥,方便d呢!
發佈留言