成功轉型做全人奶媽咪!!

小熊B出世第10日,族長突然問了一個問題:"你泵1安人奶,再補2安奶粉,咁得唔得架!!"

我唔識答呢個問題,所以打左電話去問一路幫襯開o既家庭醫生梁醫生,佢個答案係:"你當呢個時代係古時,冇奶粉呢樣野,佢幾時想食你就俾佢啜就得!!"

^~^......................................................

跟住我打去醫院問姑娘,佢地正常地回答:"得!!"

經過我同族長商討左一陣,決定試o下再俾一次機會小熊b同我自己,10:30pm佢開始想食奶奶,所以我就同佢講:"喇,由依家開始,淨係得人奶咋,再冇奶樽呢樣野喇,食就食,唔食都冇辦法!!你試o下啦,你o係醫院時都識架,你記o下啦,俾心機啦,Aunt Nikita話你唔可以做懶豬豬架,試o下啦,媽媽知你記得架......"

呢句說話我重覆同佢講左15分鐘,當然佢緊係一路喊一路爭扎啦!!但唔知佢係咪真係識聽呢,原本佢對住我擰晒頭架,突然真係識啜呀!!我當時真係開心到飛起,我冇諗過只係用15分鐘就改變到佢,因為我之前試過,就連健康院o既醫生都話好難!!!

個晚總共起身餵左3次奶,不過就用錯左方法,我俾佢啜一邊一個鐘呀!!俾梁醫生鬧,佢話咁樣我唔使3日就唔使再餵,因為實發炎!!之後佢教我飲鮮奶,魚湯,葡萄適,餵之前用暖水沖o下個乳房,bb食緊時可以用手泵o下幫bb食多d!!

我都唔敢咁快話成功,但到今日(出世第13日,即係小熊b食左全人奶2日半),佢都冇再用過奶樽,我同族長都用匙羹餵佢飲水,我相信都叫做成功喇!!我成功教識小熊b食全人奶喇!!!好開心呀!!!依家比較緊張佢d小便同大便,因為怕佢食唔夠,又會再黄番!族長話聽日再帶佢到健康院度o下黄疸!!等我唔使咁担心喎!!

同時我開始知道點解Nikita一直都叫我要試,原來真係方便好多架,佢喊我就俾佢食,唔使好似之前咁,預早半個鐘泵人奶,之後族長又要忙住洗奶樽,減刪好多功夫,族長又可以多d時間休息,又有時間做到自己o既工作,仲可以睇o下報紙添,依家我地o既分工係:我做bb的奶樽,佢做bb的清潔工人--沖涼同換片!!

在此特別鳴謝Nikita同藍mama的精神支持同提供非常有用o既資料,thanks!!